[شىئېر] ئۆزۈڭنىڭ تەقدىرى ئۆزۈڭ قولىدا

پەشتاق

ئۆزۈڭنىڭ تەقدىرى، ئۆزۈڭ قولىدا
(يەكەن ناھىيە ئاۋات بازارلىق ئوتتۇرا مەكتەپتىن- ئابدۇسەمەت داۋۇت)

مال- دۇنيا دىگەنلەر بايلىق ئەمەس ئۇ،
ئىلىم-پەن ئۆگەنگىن، بايلىق دىگەن شۇ.
تەپەككۈر يولىدىن ئېزدە بەختىڭنى،
سەندىكى كۈچ-قۇۋۋەت، ئەقىل دىگەنشۇ.

ياشلىقنى قەدىرلە مېھنىتىڭ بىلەن،
ئەجرىڭدىن خۇشپۇراق گۈللەر ئېچىلسۇن.
تىرىشىپ-تىرمىشىپ يىڭىلىق يارات،
ئىجادىڭدىن ئەلگە تۆھپەڭ قېتىلسۇن.

ئەقىدە باغلىغىن ھۈنەر-كەسىپكە،
ۋىجدانىڭ نۇرلانسۇن شۇ كەسپ بىلەن.
ساقتىلىق قىلمىغىن، پۇل-مال قوغلىشۇپ،
ئۆرلەيسەن پەللىگە ھالال نەپ بىلەن.

ئېزدىگىن دائىما ئۆز بەختىڭ ئۈچۈن،
تەدبىرنى، ئۇسۇلنى، كەسپ يولڭدىن.
يېتىشكىن ئەل ئۈچۈن بولۇپ پىداكار،
ياردەملەر ئايىما، كەلسە قولۇڭدىن.

ئەخلاقنى، ئىنساپنى دوست تۇتقىن ئەسلا،
يىتىلەر سېنىڭدە ۋىجدان تۇيغۇسى.
ئېچىلسا ئىجادتىن تەپەككۈر كۆزۈڭ،
كۆتۈرلەر قەلبىڭدىن غەپلەت ئۇيقۇسى.

ئىزدەنگىن، ۋاقتىڭنى بەرمە قولۇڭدىن،
كەلمەيدۇ بۇ ھايات، ئۇيان- بۇياندىن.
ئەڭ ئاۋۋال ئۆزۈڭنى قەدىرلە ھەرۋاق.
باشقىلار يىتىدۇ قەدرىڭگە ئاندىن.

يىتىلدۈر ئۆزۈڭدە ئەپۇچانلىقنى،
ئىنسانىي پەزىلەت دىگەن ئەنە شۇ.
ئۆچ ئالما بىراۋدىن، كەچۈرۋەت ئۇنى،
سەندىكى ئەل ئۈچۈن خىزمەت دىگەنشۇ.

ھاجىتىڭدىن ئېشىپ قالسا پۇل مېلىڭ،
بۇزۇپ چاچما، ئاجىزلارغا ياردەم قىل.
ئەڭ شەرەپلىك خىزمەت دىگەن ئەنە شۇ،
بۇنداق ئىشنى سوراپ تىپىپ، ئېزدەپ قىل.

تاللاپ سالساڭ يەرگە، ئېسىل ئۇرۇقنى،
شۇ ئۇرۇقتىن كۆپلەپ ھوسۇل ئالىسەن.
تېرىۋالساڭ ئېتىزىڭغا شۇمبۇيا،
ھوسۇل ئالماي، قۇرۇق قوللا قالىسەن.

ئىرادە تىكلىگىن سۇنماس روھ بىلەن ،
ئىشەنچ، چىدام- غەيرەت سەندىن قاچالماس.
ئۆزۈڭنىڭ تەقدىرى ئۆزۈڭ قولىدا،
سېنىڭدىن باشقىسى ئۇنى تاپالماس.


مەنبە: ئۆز قەلىمىم
2014-يىل يەكەن ئاۋات

ئەزھەر36

بەك ياخشى يېزىپسىز ، قولىڭىزغا دەرد كەلمىگەي .  تېمىلىرىڭىز ئۈزۈلۈپ قالمىسۇن .

ھاشىم

ھەقىيقەتەن ياخشى مەزمۇنكەن، ئەقلىڭىزگە بارىكاللا
نادىر تىما دىسەك، مۇشۇنداق تىمىنى دىسەك بولغۇدەك