ئۇيغۇر خەلق قۇشاقلىرى

ئاتا

سىز كىلەمسىز بۇياققا،
مەن بارايمۇ ئۇياققا.
ئۆيلەنمىسەم بولمايدۇ،
سىزدەك گۈزەل ئۇماققا!

يارىم ناخشا ئېيتىدۇ،
ئەجەپ مۇڭلۇق، يېقىملىق.
ئايرىلغاندا بىلىندۇ،
كۆڭۈلدىكى يېقىنلىق.

ئېرىقتا بېلىق يارىم،
گەپ - سۆزى سىلىق يارىم.
ساڭا بولغان مۇجەسسەم،
بارچە ئۇز  قىلىق يارىم.

بازاردىكى ماللارنىڭ،
ساختا ئىكەن بەزىسى.
راستمىدۇ يالغانمىدۇ،
سەن يارىمنىڭ ۋەدىسى.

تۈن كېچىدە تولدۇردۇم،
قۇشاق يېزىپ دەپتەرنى.
يارىم بىلسۇن بۇنىڭدىن،
ئىچىمدىكى دەرتلەرنى.

ئىككى - ئۈچ تۈپ چىڭگىلىك،
يامىشىپتۇ يۇلغۇنغا.
ئاغرىمىدى ئىچىڭىز،
مەندەك كۆڭلى سۇلغۇنغا.

قارىسايغا كىرگىچە،
ئونيەتتە يەردە مەدرىسە،
مەن يارىمنى چاقىرچام،
ئومۇ دەرھال ھە دېسە.

گەپ قىلمىسام،زېرىكمىڭ،
چاقچاق قىلسام تېرىكمەڭ.
ۋەدىلەشكەن ۋاقىتتىن،
ئۆتكەنكىدەك كېچىكمەڭ.

ئاخشىمى قاراڭغۇدا،
ئارزو قىلىمەن ئاينى.
سەن يادىمغا يەتكەندە،
ئىچمەي قويىمەن چاينى.

يارىم كۆينەك كىيىپتۇ،
ئاق تاۋاركەن گۈلى يوق.
ئىشقىڭىزدا يۈرىكىم،
كۆيۈپ بولدى كۈلى يوق.

قوشنىمىزنىڭ قىزى بار،
بويى زىلۋا چىۋىقتەك.
جاننى ئېلىپ قاچىدۇ،
قەددى مەغرۇر كېيىكتەك.

ئالتۇن باغلىق سائىتىم،
كۈمۈش باغلىق سائىتىم.
يارىم بولسا ۋاپادار،
كەلگىنى شۇ ئامىتىم.

ئاڭلىنىدۇ يىراقتىن،
تراكتورنىڭ شەپىسى.
ھەرگىز يالغان بولمىسۇن،
ئىككىمىزنىڭ ۋەدىسى.

ئاخشىمى قاراڭغۇدا،
ئوت كۆرۈندى يىراقتا.
قاچانغىچە يۈرەرمىز،
بۇ ھىجراندا - پىراقتا.

قوغۇننىڭ پىلەكى بۇ،
تاۋۇزنىڭ پىلەكى بۇ.
سىزگە تۇتقان قىزىلگۈل،
ئاشىقنىڭ يۈرەكى بۇ.



تارىم تورىدىن ئېلىندى

yarkanboy

مۇزىكا ئىشلەيدىغان، ناخشا ئوقۇيدىغانلار كۆرمەمدىغاندۇ مۇشۇنداق خام ماتىرياللارنى .........................  
ياكى بۇ قوشاقلارغا مۇزىكا ئىشلەپ ناخشا قىلىپ ئىېيتسا بولمامدىغاندۇ يە ................

ئاتا

ئەدەبىيات-سەنئەت خەلقتىن ئايرىلالمايدۇ. ئەدەبىيات-سەنئەت خادىملىرىمىز خەلق ئارىسىغا چوڭقۇر چۆككەندىلا، ئاندىن خەلق ياقتۇرىدىغان ياخشى تىمىلارنى ۋۇجۇدقا چىقىرالايدۇ. ئەمما ھازىر بىزنىڭ ئاز بىر قىسىم سەنئەتكارلىرىمىز خەلق ئارىسىغا ئەمەس، باشقا ئەللەرنىڭ ئارىسىغا چوڭقۇر چۆكىۋاتىدۇ. ئۇلارنىڭ كۆتۈرۈپ چىقىۋاتقىنى ئەبجەش، ئارلاشما تىمىلار بۇلىۋاتىدۇ. ئابدىكىرىم ئابلەزنىڭ «كىندىكى ئوچۇق ئۇيغۇر قىزىنى ھىندىستاننىڭ ناخشىسى ۋۇججەللىگە ئۇسسۇل ئوينىتىمەن» دىگىنى دەل شۇلارغا ئۇرۇلغان بىر قامچا. ئەمما بۇ ئىنتايىن ئاز بىر قىىسىم ئەھۋال خالاس. بىزنىڭ كۆپ سانلىقنى ئىگەللەيدىغان شۇنداق سەنئەتكارلىرىمىز باركى، ئۇلار خەلقتىن ئالىدۇ، خەلققە بىرىدۇ. شۇڭا خەلق ئۇلارنى مەدھىيلەيدۇ، ئەسەرلىرىنى سۆيۈپ ئاڭلايدۇ. كۆپ ئىشلار بارغانسېرى تۈزىلىپ كىتىۋاتىدۇ.