مەندە كېسەل - زۇكام بار(ئابدۇللا ياقۇپ)

نونى

مەندە كېسەل-زۇكام بار

(ئابدۇللا ياقۇپ )

يۇقىرىدا ئاكام بار،تۆۋەندە ھەم ئۇكام بار،

مۇناسىۋەت تورىنى توقۇيدىغان موكام بار.

.

كۈندە قاتراپ ئۇخلىماي، ياتالمايمەن يوقلىماي،

ئاكام ئۈچۈن كۆتۈرسەم قولدا تەخسە –چوكام بار.

.

ئەكەل دېسەم بۆكىنى ،كېسىپ كەلگەن بېشىنى ،
مىنسەم قوتۇر ئېشەكتەك بوينى يۇمشاق دوكام بار.

.

يۈرىكىممۇ چوڭ مېنىڭ،شۇڭا ئىشىم ئوڭ مېنىڭ ،

خوشۇم يوققا ئالايسام قاپىقىمدا غورام بار.

.

مۇناسىۋەت-قالقىنىم، يېتەر ھەريان ئالقىنىم،

چىقسام ئېگىز ئۆگزىگە تەييار تۆمۈر شوتام بار.

.

سۆزلىگەندە توغرىمەن، كۆزلىگەندە ئوغرىمەن،

مال توپلىدىم ھارامدىن، تامدا ئىزىم –شورام بار.

.

تويماس كۆزۈم چانىقىم، تاشمۇ بولار تامىقىم،

ماڭالمايمەن پۇشۇلداپ سېمىز قۇيرۇق يوتام بار.

.

ئۆز قىنىمغا پاتمايمەن، ئەلگە تۆھپە قاتمايمەن،

رەزىللىكتىن يانمايمەن، گەدىنىمدە توقام بار.

.

قازان چاقتىم ئاشنى يەپ، ئۆلەرمەنمۇ باشنى يەپ،

دېمەك ، مەندە ساقايماس ئېغىر كېسەل-زۇكام بار.

1996-يىل 12-ئاي

گۇلزار

جەمىيىتىمىزدە مانا مۇشۇنداق بىر قىسىم كىشىلەر باركى ئۇلار باشقىلارنىڭ چاپىنىدا تەرلەپ ھەم باشقىلارنى چېقىشتۇرۇپ جان بېقىشنى ئۆزلىرىگە پەرز قىلىۋالغان . ئۆتكۈر قەلەملىرىڭىز ئارقىلىق ئۇلارنىڭ ئەپتى - بەشىرسىنى ئېچىپ بېرىپسىز رەھمەت سىزگە .
  نادىر ئەسەرلىرىڭىزنى كۈندە كۆرۈپ تۇرۇش  نېسىپ قىلسۇن .