نەپ بەرسەڭ (بىر باشلىقنىڭ تىلىدىن)

نونى

نەپ بەرسەڭ

(مەمتىمىن ياسىن)

نەپسى يوغان باشلىقمەن ، كېسەلەيمەن نەپ بەرسەڭ،
دىل ياراڭغا مېھرىمنى سېپەلەيمەن نەپ بەرسەڭ .

قورقۇپ كەتمە ئالدىراپ  سالاپىتىم –ھەيۋەمدىن،
پىلىك كەبى مەن يۇمشاپ كېتەلەيمەن نەپ بەرسەڭ.

قۇرۇق گەپكە مۈشۈكمۇ قاقلانمايدۇ ئاپتاپقا،
يېشىلمىگەن تۈگۈننى يېشەلەيمەن نەپ بەرسەڭ.

ياقماي قالسا بىراۋلار سېنىڭ نەزەر –كۆزۈڭگە،
ئۇنداقلارنىڭ كۆتىگە تېپەلەيمەن نەپ بەرسەڭ .

ھەل قىلىمەن ئىشىڭنى ،ساقايتىمەن بېشىڭنى،
تاياق بىلەن تاشنىمۇ ئېشەلەيمەن نەپ بەرسەڭ.

زېغىرچىلىك نەپ ئۈچۈن قىلنى قىرىق يارىمەن،
تېرىقنىمۇ ئۈشكىدە تېشەلەيمەن نەپ بەرسەڭ .

ئېگىلىدۇ ھەقىقەت مېنىڭ ئەپچىل قولۇمدا،
نىجاسەتنى تۇتىيا دىيەلەيمەن نەپ بەرسەڭ .

سوقۇپ شۇنداق بۇيرۇقنى ، تۇتقۇزماستىن قۇيرۇقنى
مۆكۈپ تۇرۇپ مەقسەتكە يېتەلەيمەن نەپ بەرسەڭ.

مەنبە : ئۆز ئىجادىيىتىم
2013-يىل 1-ئاينىڭ 25-كۈنى

pari

ئىجادىيەتلىرىڭىز ئۈزۈلمىگەي  داۋاملىق يوللاپ تۇرۇڭ.

ئوغلانبەگ

قەلەم قۇۋۋىتىڭىزگە ئاپىرىن،يەنىمۇ ياخشى دۇردانىلەرنى ئۈزۈلدۈرمىگەيسىز!

زەپەر

ئىجادىيتىڭىز ئۈزۈلمىگەي بۇرادەر  شىئېر يېزىش جەھەتتىكى قەلەم قۇۋىتىڭىز ياخشىكەن رەخمەت سىزگە

بايقاش

جەمئىيىتىمىزدىكى بىر قىسىم پۇل؛ مال-دۇنياغا تويمايدىغان ئەمەلدارلىرىمىزنىڭ  تۈۋەندىكىلەرگە دېمەكچى بولغان گەپلىرىنى ئوچۇق ئىپادىلەپ بېرىپسىز . شىئېرىڭىزنى ئوقۇپ تېلفۇندا ئىنكاس يېزىۋاتىمەن . بۇ تېلفۇندا يوللىغان تۇنجى قېتىملىق ئىنكاس  .

سەييارە0

دىيارمىزدىكى مال-دۇنياغا تويمايدىغان ئەمەلدارلىرىمىزنىڭ  تۈۋەندىكىلەرگە دېمەكچى بولغان گەپلىرىنى ئوچۇق ئىپادىلەپ بېرىپسىز .

ئاۋارى

ھەقىقەتەنمۇ ياخشى يېزىلغان شىئر ئىكەن،، مەن ھەقىقەتەنمۇ مەمنۇن بولدۇم، ئىمكان بولسا «چ چ»رىمننىڭ تور ئادرىسىنى يوللاپ بەرگەن بولسىڭىز

گۈلزار

نەپسانىيەتچىلەرنىڭ ئەپتى - بەشىرسىنى ئاشكارلاپ بېرىپسىز . رەھمەت سىزگە

سىرداش

شىئېرىڭىز  بەكمۇ ياخشى چىقىپتۇ،  رەھمەت  سىزگە،

نونى

ئاۋارى يوللىغان ۋاقتى  2013-1-25 22:06
ھەقىقەتەنمۇ ياخشى يېزىلغان شىئر ئىكەن،، مەن ھەقىقەتەن ...

ئالاقىلىشىش ئادرېسىڭىزنى بىلمىگەچكە  «چچ رىم» نىڭ تولۇق تېكىستىنى بۇيەرگە ئىنكاس شەكلىدە يوللاپ قويدۇم:

چچ   رىم
(مەمتىمىن ياسىن)

ئۇچۇر دەۋرى سازىنى چېلىپ كەلدىڭ چچ رىم،
قىزىلگۈلنى چېكەڭگە قىسىپ كەلدىڭ چچ رىم،
تۇرمۇشۇمغا توساتتىن كىرىپ كەلدىڭ چچ رىم،
ھاياتىمغا يېڭىلىق ئېلىپ كەلدىڭ چچ رىم،
يۈرىكىمگە بىر ئوتنى سېلىپ كەلدىڭ چچ رىم

«ئوربېتا» دەپ تەخەللۇس قويۇۋالدىم ئۆزگىچە،
چىقىپ تۇردۇم زېرىكمەي قىشتىن تاكى كۈزگىچە،
«كاۋاپ » يېدىم باشقىلار سۇدىن بېلىق سۈزگىچە،
ئات چاپتۇردۇم دۆڭ، ئويمان، ھەتتا ئېدىر، تۈزگىچە،
ماڭا كەڭرى پۇرسەتنى بېرىپ كەلدىڭ چچ رىم.

قېتىۋالدىم ئۆزۈمگە«قەشقەر قىزى» ، « ئوماق» نى،
«ساھىپجامال »دەپ بىلىپ، قوغلاپ يۈردۈم كوماكنى،
بۇ يولدىن ھېچ يانمىدىم يەپ تۇرساممۇ چوماقنى،
مەستانىگە ئايلاندىم، ھەتتا، ئۇنتۇپ تاماقنى،
يېڭى ئىشنى كۈندە بىر تېرىپ كەلدىڭ چچ رىم.

سايراپ كەتسەڭ، ئايالىم دەرھال كېلەر قېشىمغا ،
سۈرۈشتۈرۈپ تەكتىنى،چۆمۈچ تەڭلەر بېشىمغا،
مانا ئەشۇ سەۋەپتىن توپا چۈشتى ئېشىمغا،
ماس كەلمىدى بۇ ئىشلار مېنىڭ قىرىق يېشىمغا ،
ماڭا چەكسىز دەرت-ئەلەم ئېلىپ كەلدىڭ چچ رىم.

زېرىكسەم مەن پاراڭدىن ، ئويۇن ئويناپ ھارمىدىم،
ئوچىقىغا خوتۇننىڭ بىرەر كۆتەك يارمىدىم،
ئۆلۈم-يېتىم،توي-تۆكۈن،يوقلاشلارغا بارمىدىم،
ئويلاپ كۆرسەم چچ دا توغرا يولغا ماڭمىدىم،
خۇمارىمنى ئەشۇنداق بېسىپ كەلدىڭ چچ رىم.

باشتا بىرتىڭ ،كۆپىيىپ ئەمدىلىكتە بەش بولدۇڭ،
بىردە يىگىت ،بىردە قىز ، بىردە جاپاكەش بولدۇڭ،
بەزى چاغدا «ئەپەندىم»، بەزى چاغدا «خەس »بولدۇڭ،
چېلىپ باقتىڭ ئۆزگىنى، بارغانسېرى پەس بولدۇڭ،
ھەر تەرىقە نىقاپنى كىيىپ كەلدىڭ چچ رىم.

كارغا كەلمەي دوكلاتنى يۇقىرىغا يوللاشقا ،
تەنقىت ئىشتتىم باشلىقتىن، ئېرىشەلمەي قوللاشقا.
تۆرەلگەنمۇ سەن پەقەت باشقىلارنى گوللاشقا؟!
بولۇپ كەتتىڭ قويمىچى كىرمەي تۇرۇپ بىر ياشقا،
ۋەزىپەڭدىن ئەشۇنداق  قېچىپ كەلدىڭ چچ رىم.

تۆكۈۋالدىم ئابروينى ، قىلىپ يۈرۈپ ئاقسالىق،
ياراشمىدى جىسمىمغا لايغەزەللىك-لەقۋالىق،
يېتەر ئەمدى قىلغىنىڭ، تۈگەپ كەتسۇن رەسۋالىق،
ئورۇن ئالسۇن قەلبىمدىن بىغۇبارلىق –تەقۋالىق،
يوقال ! چۈنكى ،يۈرەكنى ئېزىپ كەلدىڭ چچ رىم.