خەلق ماقاللىرىدىن ئىقتىباسلار

راۋاپچى

خەلق ماقاللىرىدىن ئىقتىباسلار

(ئابدۇرىھىم ئۆتكۈر)

ئالىمىڭنى كەڭ ياراتتىڭ،زامانەڭنى تار،
زالىمىڭنى بەگ ياراتتىڭ،ئالىمىڭنى كار.
كوزا چاققان تاپتى دۆلەت،تاپتى ئىززەت،تاپتى بەخت،
سۇنى كىم كەلتۈرسە بولدى ھەر قەيەردە خارۇ-زار.
قاغا تاپتى ئىتىبار،بۇلبۇل نەزەردىن يىراق،
چىتىلىپ قالدى ئىشەكنىڭ قۇيرۇقىغا بۇغرا-نار.

كەتمەن دىگەننى بىز چاپساق،يېتىپ يەيدۇ خىيمۇزا،
بىر زاغرىنى زورلۇق يەپ،ئۈچ كۈن تۇتىمىز روزا.
دەي دىسەم گەپ بولىدۇ،دېمەي دېسەم دەرت بولىدۇ،
تارتىپ كۆرگىلى دەرتنى تېپىلارمۇ تارازا!
ھەر ئىشنىڭ ئامالى بار،ھەر گەپنىڭ زامانى بار،
كۈنىدە سۇنمىغان بىلەن،كۈنىدە سۇنار كوزا.

كۆرمەيىن باستىم تىكەننى،تارتاردۇرمەن دەردىنى،
كۆرسەم ئەردىم،باسماس ئەردىم،تارماس ئەردىم دەردىنى.
تارتا-تارتا دەرد-ئەلەمنى زەپىران بولدى يۈزۈم،
قاينىمى تاشقان بۇلاقتەك توختىماس ياشلىق كۆزۈم.
كۆزيىشىم دەرياسىدا غەرىق بولسا جانىم ياخشىراق،
چۈنكى كۈندە مىڭ قىتىملاپ ئۆلتۈرەدۇر ئەلپىراق.
بولمىغاي ھىچكىم مىنىڭدەك بەختى قاچقان ناتىۋان،
ناتىۋان بولسا بولۇر،بولماس مىنىڭدەك باغرى قان.

باغرى قان بولغان كىشىنىڭ دەردىنى دەرتمەن بىلۇر،
دەردى يوق بىدەرد كىشىلەر بەلكى دەردمەندىن كۈلۇر.
كۈلمىگەي ھىچكىم بىراۋدىن،ئۆتنە ئالەم بۇزامان،
ياخشىنى يامان دىگەن يامان ئۆزى قالماس ئامان.
كۆرمەيىن باسما تىكەننى،تارتما ھەرگىز دەردىنى،
يۈرمىگىن ئاخىر كىيىپ مەندەك كۇلايۇ-جەندىنى.

مەنبە:-ئابدۇرىھىم ئۆتكۈر ئەسەرلىرى39-40-بەتلەر

ئامان

ئېسىل شېئىر. ئابدۇرېھىم ئۆتكۈر ئەپەندىنىڭ شېئىرلىرى ھەقىقەتەن ئېسىل شېئىرلار-ھە!  ئادەم ئوقۇسا ئوقۇغۇسى كېلىدىغان، مەزمۇن ئىچىدىن مەزمۇن كۆرۈنۈپ تۇرىدىغان....
رەخمەت سىزگە بۇرادەر، قولىڭىزغا دەرت كەلمىگەي.

گۈلزار

ئابدۇرېھىم ئۆتكۈرنىڭ شېئىرلىرى بىر ئۈزۈلمەس كۈي. ئۇنىڭ شېئىرلىرىدا  ھايات ھەقىقەتلىرى روشەن ئەكىس ئەتتۇرۈلگەن . ئامان ئەپەندى ئېيتقاندەك ئابدۇرېھىم ئۆتكۈرنىڭ شېئىرلىرىنى ئوقۇغانچە ئوقۇغۇسى كېلىدىغان مەزمون ئىچىدىن مەزمون ئىپادىلىنىپلا قالماي بەلكى شۇ زاماندىكى  كىشىلەرنىڭ كەشمىشلىرى كۆز ئالدىمىزدا نامايەن بولىدۇ .
مۇشۇنداق ئېسىل شېئىرلار بىلەن ئۇچراشتۇرغىنىڭىزغا كۆپ رەھمەت .