سۆي ، نامرات بولسىمۇ ئۇ سىنىڭ داداڭ ...
ئىسىلزاد بولسىمۇ ئۇ سىنىڭ داداڭ،
ئۇلۇغزاد بولسىمۇ ئۇ سىنىڭ داداڭ .
سۇمباتلىق بولسىمۇ ئۇ سىنىڭ داداڭ ،
باياشات بولسىمۇ ئۇ سىنىڭ داداڭ ،
سۆي ، نامرات بولسىمۇ ئۇ سىنىڭ داداڭ ...
ئۇ سىنى چوڭ قىلدى مىڭ تەستە بىقىپ ،
جىنىم دەپ پەپىلەپ باغرىغا بەسىپ .
ئوتۇڭدا كۆيۈپ ، سۈيۈڭدە ئىقىپ ،
قاق سەنەم بولسىمۇ بارىنى سىتىپ ،
سۆي ، نامرات بولسىمۇ، ئۇ سىنىڭ داداڭ ...
ساڭىلا تۈگۈنۈپ ئۆزى يىمەيدۇ ،
سەنىلا كەيسۇن دەپ ئوزى كەيمەيدۇ .
جاپا ھەم زەربىگە ۋايساپ كەتمەيدۇ ،
بەلكى كۆز يۇمغىچە غىمىڭنى يەيدۇ ،
سۆي ، نامرات بولسىمۇ ئۇ سىنىڭ داداڭ ...
پۇتلىرى مىڭ قاداق ، قوللىرى يىرىق ،
يىل بويى ئىشلەپمۇ كىيىمى يىرتىق .
ئۈستىدە تۇرسىمۇ تۈمەن مىڭ سىلىق ،
ئۇ شۇنچە مۇلايىم ، ئۇ شۇنچە سىلىق ،
سۆي ، نامرات بولسىمۇ ئۇ سىنىڭ داداڭ ...
ئۆتكۈزدى ئۇ ئۆمرىنى بالام ، بالام دەپ ،
كۈندۈزى ئىتىزدا ، كەچتە كالام دەپ .
تىخى كۆپ بالامغا مىھرىم چالام دەپ ،
ياشىدى ھەممىگە ئوخشاش سالام دەپ ،
سۆي ، نامرات بولسىمۇ ئۇ سىنىڭ داداڭ ...
سەن ئۇنىڭ ھالىنى سوراپ باقتىڭمۇ ،
بىشىغا بىر تەلپەك بىرىپ باقتىڭمۇ .
مۈكچەيگەن قەددىگە قاراپ باقتىڭمۇ ،
ئاقارغان چىچىنى سىلاپ باقتىڭمۇ ،
سۆي ، نامرات بولسىمۇ ئۇ سىنىڭ داداڭ ...
ئۇ سىنى مەكتەپتە ئوقۇتۇپ قويدى ،
شۇنداقلا دۇنيانى تونۇتۇپ قويدى .
بەختنىڭ تەمىنى تىتىتىپ قويدى ،
سەنى دەپ ياشلىقىنى يوقۇتۇپ قويدى ،
سۆي، نامرات بولسىمۇ ئۇ سىنىڭ داداڭ ...
شۇ گۇزەل ھۆسنۈڭگە كۆچكەن ياشلىقى ،
سەن ئۈچۈن كەتمەسكە كەتكەن شاشلىقى .
سىنى دەپ يوقالغان ھەم ئوت شاشلىقى ،
سىنى دەپ ئاقارغان بىشى چاچلىقى ،
سۆي ، نامرات بولسىمۇ ئۇ سىنىڭ داداڭ ...
ئەۋەتىپ تۇرىدۇ ساڭا ئايدا ئاش ،
نەۋرىلەر يىسۇن دەپ چامغۇر ھەم كۆكباش .
ھىچيەردىن ئالمايدۇ بىر تىيىن مائاش ،
ئۇ شۇنچە چىداملىق ئۇ شۇنچە يۇۋاش ،
سۆي ، نامرات بولسىمۇ ئۇ سىنىڭ داداڭ ...
كۆمۈرگە پۇلى كەم ، قالايدۇ مەدەك ،
پۇل ئۈچۈن ئىتىزدا تىرىيدۇ غوزەك .
ئەمما سەن قەھرىڭنى چاچىسەن بۇزدەك ،
ئەيتقىنا سەندىكى ئۇ قانداق يۈرەك ،
سۆي ، نامرات بولسىمۇ ئۇ سىنىڭ داداڭ ...
كوچىدا كۆرسەڭ قاچىسەن تىخى ،
كەمسىتىپ ئەيىۋىنى ئاچىسەن تىخى .
ئاچچىقلاپ زەھرىڭنى چاچىسەن تىخى ،
شۇندىمۇ بالام دەپ كۆيەر ئۇ تىخى ،
سۆي ، نامرات بولسىمۇ ئۇ سىنىڭ داداڭ ...
تۇرقىغا قاراپ باق ، كىيىمى جۇل - جۇل ،
ھەممىدىن ئايرىلىپ بولۇپ قالدى تۇل .
تۇرمۇشنىڭ يولىدا يۈرىكى چۇل - چۇل ،
پۇرىۋال ، ئۇ دىگەن خۇش پۇراقلىق گۈل ،
سۆي ، نامرات بولسىمۇ ئۇ سىنىڭ داداڭ ...
قاراپ باق بەستىگە مۈكچىيىپ كەتتى ،
ئىش - ئەمگەك دەستىدىن چەيلىنىپ كەتتى .
ئۇششۈگەن گۈل كەبى شۈمشىيىپ كەتتى ،
دەردىنى ئەيتالماي ئۈمچىيىپ كەتتى ،
سۆي ، نامرات بولسىمۇ ئۇ سىنىڭ داداڭ ...
ئۇنىڭدا يوق قىلچە كىبىر - تەمەننا ،
ھەر باسقان ئىزىدا تۈمەن مىڭ مەنا .
ئەپسۇسكى ياشىنىپ قالدى ئۇ ئەمما ،
لىكىن سەن قەرزىڭنى قىلدىڭمۇ ئادا ،
سۆي ، نامرات بولسىمۇ ئۇ سىنىڭ داداڭ ...
بىلەمسەن سەن ئۇنىڭ نامراتلىقىنى ،
نامراتلىق تەختىگە سۇلتانلىقىنى .
بىلسەڭمۇ ئەڭ ئاددى پاك زادلىقىنى ،
بىلمەيسەن قەرزىڭنىڭ قات - قاتلىقىنى ،
سۆي ، نامرات بولسىمۇ ئۇ سىنىڭ داداڭ ...
كىيىشىڭ ئىسىل تون ، ساڭا كۈندە توي ،
ئىچىشىڭ مەي - شاراپ ، يىيىشىڭ قوي .
سەن گويا بىر ئەنبەر ، ئۇ بولسا بەدبۇي ،
شۇ سەۋەپ داداڭنىڭ بەشىدا مىڭ ئوي ،
سۆي ، نامرات بولسىمۇ ئۇ سىنىڭ داداڭ ...
ئۇ بەرگەن پاختا رەخ ئۇستاخانلاردا ،
ئۇ بەرگەن ئاش - غىزا داستىخانلاردا .
ئۇ تەرگەن سەي - كوكتات شۇ قازانلاردا ،
ئۇ يەنە ئوتەلمەس ئىمتىھانلاردا ،
سۆي ، نامرات بولسىمۇ ئۇ سىنىڭ داداڭ ...
سەن ئۇنى بىر قىتىم يوقلاپ باقتىڭمۇ ،
بىرەر رەت قورسىقىنى توقلاپ باقتىڭمۇ .
ئۇ سۇنغان داغ چاينى ئوتلاپ باقتىڭمۇ ،
بايرىمىڭ بولدى دەپ قۇتلاپ باقتىڭمۇ ،
سۆي ، نامرات بولسىمۇ ئۇ سىنىڭ داداڭ ...
ياشىدى ئۇ ھامان ھەقنى - ھەق سۆزلەپ ،
ئەۋلادىم ، خەلقىم دەپ يىراقنى كۆزلەپ .
ئىش - ئەمگەك ئەزسىمۇ ھەتتا ھەسسىلەپ ،
چىداشلىق ئۆتكۈزدى ئۆمرىنى بەزلەپ ،
سۆي، نامرات بولسىمۇ ئۇ سىنىڭ داداڭ ...
ئۇ كەتسە قايتىدىن تاپقىلى بولماس ،
ئۇ كەتسە تاي بولۇپ چاپقىلى بولماس .
ئۇ كەتسە قوشاققا قاتقىلى بولماس ،
پۇل خەجلەپ بازاردىن ئالغىلى بولماس ،
سۆي ، نامرات بولسىمۇ ئۇ سىنىڭ داداڭ ...
| 
شۆھرەت
تۆھپە
تىللا
قىزغىنلىق
ۋاقتى: 2013-9-12 20:08:14
ۋاقتى: 2013-9-15 14:33:41
ۋاقتى: 2014-8-14 08:39:56