ئاسان شاللىنىپ كېتىدىغان ئالتە خىل ئادەم

★parixta★

                                                ئاسان شاللىنىپ كېتىدىغان ئالتە خىل ئادەم



تۇزىنى يەپ تۇزلۇقىنى چاقىدىغانلار شىركەتنىڭ بايلىقىدىن پايدىلىنىپ، شېرىنكانە ئېلىش، يەڭ ئىچىدە زاكاز قوبۇل قىلىش، شەخسىي ئىشلىرىنى بېجىرىۋېلىش يوللىرى بىلەن ئۆزىگە تېگىشلىك بولمىغان مەنپەئەتكە ئېرىشىدىغانلارنى كۆرسىتىدۇ. تۇزىنى يەپ تۇزلۇقىنى چاقىدىغان بۇنداق ئادەملەرنىڭ خوجايىن تەرىپىدىن بايقالغان ۋاقتى دەل خوجايىننىڭ ئىشەنچىدىن ئايرىلىشقا باشلىغان ۋاقتى بولۇپ، بۇنداق ئادەملەرنىڭ كەسىپ جەھەتتە ئىلگىرىلىيەلىشى تولىمۇ قىيىن.
ئىككىنچى، ئۆگەنمەيدىغانلار
ھەممە نەرسە ئۈزلۈكسىز تەرەققىي قىلىپ ئۆزگىرىۋاتىدۇ. بىر ئىزدا توختاپ قالغانلىقنىڭ ئۆزى كەينىگە چېكىنگەنلىكتۇر. بىلىم ئىنتايىن تېز سۈرئەتتە يېڭىلىنىۋاتقان بۈگۈنكى كۈندە مەكتەپتە ئۆگەنگەن ياكى ھازىرغا قەدەر ئۆگىنىپ بولغان بىلىمگىلا تايىنىۋېلىش يېتەرلىك ئەمەس. شۇنىڭ ئۈچۈن ھەر بىر خىزمەتچى توختاۋسىز ئۆگىنىشى ۋە تىرىشىشى، ئۆزىنىڭ بىلىمىنى ئۈزلۈكسىز يېڭىلاپ تۇرۇشى لازىم. مۇشۇنداق قىلغاندىلا رىقابەتتە پاسسىپ ئورۇنغا چۈشۈپ قېلىشتىن ساقلانغىلى بولىدۇ.
ئۈچىنچى، زىيادە زىغىرلايدىغانلار
كەسىپ ساھەسىدىكى ئادەملەر ‹‹ئېلىپ بە›› نى بىلىشى لازىم. بېرىشنى بىلگەنلەر ئالالايدۇ، بەرگىنى قانچە كۆپ بولسا، ئالىدىغىنىمۇ شۇنچە كۆپ بولىدۇ، ئاز بەرگەنلەرنىڭ ئالىدىغىنىمۇ ئاز بولىدۇ. زىيادە زىغىرلايدىغان ئادەملەر كۆز ئالدىدىكى مەنپەئەتنىلا كۆرۈپ، كەلگۈسىدىكى پۇرسەت ۋە تەرەققىياتقا سەل قارايدۇ. سىز بىلەن ئالاقە قىلىدىغان ئادەملەر سىزنىڭ ئېلىشنىلا بىلىپ بېرىشنى بىلمەيدىغان پىخسىق ئادەم ئىكەنلىكىڭىزنى بىلسە، ئۇلارنىڭ سىزگە نەپ بېرىشى مۇمكىن ئەمەس. ئۇزاق مۇددەت مۇشۇنداق كېتىۋەرسىڭىز، تەدرىجىي ھالدا ئۆزىڭىز تۇرۇۋاتقان كەسپىي ئالاقە چەمبىرىكىنىڭ سىرتىغا چىقىپ قالىسىز. مۇناسىۋەتكە ئېغىر دەرىجىدە تايىنىدىغان جۇڭگودا زىيادە زىغىرلايدىغان ئادەمنى رەھبىرىنىڭ ياخشى كۆرۈشى، شۇنداقلا بۇنداق ئادەمنىڭ باش كۆتۈرۈپ چىقىشىمۇ قىيىن.
تۆتىنچى، ھىيلە – نەيرىڭى كۆپلەر
كەسىپ ساھەسىدە ھەر بىر قەدەمنى ئېھتىيات بىلەن ئېلىش زۆرۈر. ئەمما بۇ ھەرگىزمۇ ھىيلە – نەيرەڭ بىلەن باشقىلارغا تاقابىل تۇرۇش كېرەك، دېگەنلىك ئەمەس. ئۆزىنىڭ ھەر بىر سۆز – ھەرىكىتىگە دىققەت قىلىش، ئوچۇق – يورۇق بولۇش، ئىشلارنى زىيادە مۇرەككەپلەشتۈرۈۋەتمەسلىك، ھىيلە – نەيرەڭنى كۆپ ئىشقا سالماسلىق كېرەك. بۇ ئالەم ئۆتنە ئالەم، باشقىلارغا قانداق مۇئامىلە قىلسىڭىز، باشقىلاردىن شۇنداق مۇئامىلىگە ئېرىشىسىز، مەلۇم نەرسىگە قانداق ئۇسۇلدا ئېرىشكەن بولسىڭىز، يەنە شۇنداق ئۇسۇلدا بۇ نەرسىدىن ئايرىلىپ قالىسىز.
بەشىنچى، خۇشامەتچى ۋە تەخسىكەشلەر
خۇشامەت قىلىشنى مۇتلەق يامان ئىش دەپ كەتكىلىمۇ بولمايدۇ، كەسىپ ساھەسىدىكى ھەر قانداق بىر ئادەمدە ئازدۇر – كۆپتۇر خۇشامەتچىلىك خاراكتېرى بولىدۇ، پەقەت دەرىجىسى ئوخشىمايدۇ. خۇشامەتچىلىك چەكتىن ئېشىپ كەتسە، باشقىلارنىڭ بىزارلىقىنى قوزغاپ، ئادەمنى باشقىلارنىڭ نەزەرىدىن چۈشۈرۈۋېتىدۇ. ئەمىلىڭىز ۋە مائاشىڭىزنىڭ ئۆسۈشىدە ناتوغرا ئۇسۇللارغا ئەمەس، خىزمەت ئىقتىدارىڭىزغا تايىنىشىڭىز لازىم.
ئالتىنچى، ھېسسىياتى كەمچىللەر
كەسىپ ساھەسىدىكى ھەر بىر ئادەم ئېغىر خىرىسقا ئۇچراپ تۇرىدۇ، خىزمەت بېسىمىنىڭ ئېغىرلىقى، كىشىلىك مۇناسىۋەتنىڭ مۇرەككەپلىكى، خەۋپسىرەش تۇيغۇسىنىڭ كۈچلۈكلۈكى ئادەمنى تولىمۇ قىينايدۇ. شاللىنىپ قېلىشنى خالىمايدىغان ھەر بىر ئادەم چوقۇم ئۇرغۇپ تۇرغان قايناق ھېسسىياتى بىلەن خىرىسنى كۈتۈۋېلىشى لازىم. بۇنداق قايناق ھېسسىيات قىسقا مۇددەت يوقاپ كەتسە مەيلى، ئەمما ئەتىگىنى چوقۇم قايناق ھېسسىياتى ئۇرغۇپ تۇرغان ھالەتتە ئورنىدىن تۇرۇش كېرەك، چۈنكى ھايات يەنىلا داۋاملىشىدۇ. خوجايىننىڭ نەزەرىدە چۈشكۈن، روھسىز ھالەتتىكى خىزمەتچىلەر پۈتۈن كوللېكتىپقا تەسىر كۆرسىتىدۇ. شۇنىڭ ئۈچۈن، خىزمەت ھەر قانچە جاپالىق بولسىمۇ، تولۇپ تاشقان قىزغىنلىق بىلەن ئىشلەش كېرەك، بۇنداق بولغاندا خىزمەتنى ئەركىن – ئازادە ئىشلىگىلى، شۇنداقلا خوجايىننىمۇ رازى قىلغىلى بولىدۇ.
ما يۈن
نىجات قۇربان تەرجىمىسى
شىنجاڭ گېزىتى

گۈلزار

ھەر بىر ئادەم ئوقۇپ قويۇشقا تىگىشلىك ئەھمىيەتلىك تېمىكەن . رەھمەت دوستۇم

مەتتۇردى

ئەسسىلامۇ ئەلەيكوم!
بۇبەك ياخشى تىمىكەن ھەربىرئادەمنىڭ ئۇقۇشىغا ئەرزىيدىكەن!رەخمەت سىلەرگە

asrar

شاللىنىپ كەتمەي دىسىڭىز بۇ تېمىنى قايتا -قايتا ئوقۇڭ! ئوقۇڭلا ئەمەس ،ئەمەلىيتىڭىزدە دىققەت قىلىڭ !...تېمىڭىز نىڭ تەربىيىۋى ئەھمىيىتى كۈچلۈككەن ،رەخمەت !

زەپەر

ناھايتى ئەھمىيەتلىك ياخشى تىمىلارنى يوللاۋاتىسىز پەرىشتە داۋاملىق يوللاپ تۇرغايسىز

pari

ئەھمىيەتلىك تېمىلىرىڭىز ئۈزۈلمىگەي !!