سېنى تونۇغۇم بار

بودەك

سېنى تونۇغۇم بار
(نەسر)

ئاپتۇرى: بودوك

    سەن بىلەن قاچانلاردىن باشلاپ تونۇشۇشنى ئويلاپ قالغىنىمنى ئەسلىيەلمەيمەن.چەلەڭگۈللىشىپ كەتكەن ئەسلىمەمدە سېنى يادقا ئالغۇدەك ئالتۇندەك قۇرلار ساقلانغان. لېكىن شۇ خاتىرىلىرىمدە چىرايىڭ شۇنچىلىك غۇۋا، ئاۋازىڭ شۇنچە ناتونۇش ... نەسەۋەپ؟خاتىرەمدىكى ئىزلىرىڭنى كەپسىز قۇشلار ئوغۇرلاپ كەتكەنمىدۇ؟ قەلبىمدىكى يۇلتۇزۇمنى شاماللار ئۇچۇرۇپ كەتكەنمىدۇ؟ بىلمىدىم. ئەقلىم بىرەر جايدا چۈشۈپ قالغاندەك قايتا-قايتا ئىزلىدىم، ئىزلىدىميۇ ھېچ بىر يەردىن تاپالمىدىم. نېمە ئۈچۈنلىكىنى سورىما! ئىشقىلىپ سەن يوق تۇرمۇشقا ھەرقانچە قىلىپمۇ كۆنەلمىدىم. نە چارە؟ كۆنمەكتىن باشقا ئامال يوق ئىكەن. شۇندىمۇ سېنى ئىزدەشتىن ۋاز كەچمىدىم، نام-نىشانسىز ئىزدەۋاتىمەن. تاغدىمۇ يوق، باغدىمۇ يوق؛ ئاسماندىمۇ يوق، يەردىمۇ يوق؛ كۈندىمۇ يوق، تۈندىمۇ يوق. نەگىمۇ كەتكەنسەن؟ بىرەر بۇلۇڭ-پۇچقاقلارغا مۆكۈنۈۋېلىپ « قېنى قانداق قىلىسەنكىن ؟ « دەپ مېنى كۆزىتىۋاتامسەن يا؟ تۇيۇقسىز ئۆزۈمنىڭ سېنى ئەسلا تونۇمايدىغانلىقىمنى ھېس قىلدىم. سەن مىنىڭ خىيالىممۇ؟ ئارزۇيۇممۇ ؟ بەختىممۇ يا؟ بۇمۇ بولمىساڭ دىلدارىممۇ؟

   مەن ئۈچۈن ھەر كۈي، ھەر تىلدا، ھەرخىل ھەۋەستە سايراۋاتقان بۇلبۇللىرىمنىڭ ماڭا ئاتاپ يازغان قەسىدىلىرىنى، ئېيتقان ناخشىلىرىنى ئاڭلاپ كېلىۋاتىمەن. لېكىن شۇ تۈگىمەس ناخشىلاردىن ئۆزۈمنى تاپالمىدىم. ئۇلارمۇ مېنى تونۇماپتۇ. غەلىتە يېرى، ئۇلار مېنى كۈچلۈك ھېسابلاپ ماڭا يۆلىنىۋېلىشىدۇ. ئەمما مەندە ئۇلارنى تىرەپ تۇرغۇدەك كۈچ يوق. مەنمۇ ئۇلاردەكلا ئاجىز، يىقىلايلا دەپ قالدىم. ھاۋادا ئېسىلىپ قالغان جانسىز قوللىرىم ئۆچەيلا دەپ قالغان ئۈمىد نۇرىدا سېنى ئىزدەپ بار كۈچى بىلەن ھەريانغا چېپىشماقتا. چۈشلىرىمدىكىدەك تاساددىبى پۇرسەتتە سېنى مەھكەم تۇتۇۋالسام، يېنىڭغا ئۈچقاندەك بېرىپ سېنى تۈۋرۈكۈم قىلىۋالسام، ساڭا تايىنىۋالسام، ئەڭ مۇھىمى - سېنى تونۇۋالسام دەيمەن.

  مەن باھارغا ئۆچ ئىدىم، چېچەك پەسلى يېتىپ كېلىشى بىلەن ئۇزۇن يىللىق بۇرۇن ياللۇغىنىڭ ئاسارىتىدە قىينىلىپ، چەت-ياقىلاردىكى دېرىزىسىز قاراڭغۇ ئۆيلەرگە تۇتقۇن بولاتتىم. قايسىدۇر بىر يىلدىكى باھاردا سەن كۆز ئالدىمدا ئاشىقىمدەكلا پەيدا بولۇپ، ئۆزۈڭ ئۈزۈپ كەلگەن چېچەكلەردىن بىر دەستە گۈل تۇتتۇڭ. « ئال جېنىم، بۇلار ساڭا زىيانلىق ئەمەس! « دېگەنلىكىڭنى بىلىمەن. شۇنىڭدىن كېيىن، ئەسىرگە چۈشكەن تۇتقۇندەك قاراڭغۇ ئۆيلەرگە سولىنىشتىن ئازاد بولدۇم ، باغلارغا ئەركىن كىرىپ سەيلە قىلالايدىغان، ئىشچان ھەسەل ھەرىلىرىنىڭ ئايىغى تەگكەن خىيالىمدىكى ئاشىقىمدەك گۈزەل چېچەكلەرنى قېنىپ– قېنىپ پۇرىيالايدىغان بولدۇم. مەن باھارنى ياقتۇرۇپ قېلىۋاتاتتىم...
     كېيىنكى يىلى باھاردا سېنى يەنە مەن ئۈچۈن گۈلدەستە تەييارلاۋاتقان ھالىتىڭدە دەرەخ ئۈستىدە ئۇچراتتىم. مېنىڭ كەلگىنىمنى كۆرۈپ ماڭا قاراپ كۈلۈمسىرىدىڭ، چوڭقۇر مەنىگە يوشۇرۇنغان تەبەسسۇمۇڭ ئىچىدە سېنىڭ كۈلگەن ئاۋازىڭنى ئاڭلىغاندەك بولدۇم... تۇيۇقسىز، قاياقتىندۇر كەلگەن شامال سېنى ئۇچۇرىۋەتتى. سەن يىقىلدىڭ. سېنى تۇتۇۋالماقچى بولۇپ يۈگۈردۈم، يېتەلمىدىم. سەن يەرگە چۈشەيلا دېگەندە، ھەسەل ھەرىسىگە ئايلىنىپ ئۇچۇپ كەتتىڭ ... تېخى تولۇق تىزىپ بولالمىغان چېچەكلىرىڭ يەردە چېچىلىپ ياتقانچە قالدى... شۇنىڭدىن كېيىن خېلى يىللارغىچە سېنى كۆرمىگەنىدىم.

     تۇغۇلغان كۈنۈم يېقىنلاپ قالدى، تۇغۇلغان كۈنۈمدە سېنى كۆرەرمەنمۇ؟ « سوۋغات ئېلىپ بەر « دېمەيتتىم، يۈرەك تارىلىرىمنى تىترىتىدىغان خىيالىمدىكى شۇ تاتلىق ئاۋازىڭنى ئاڭلىساملا بولاتتى.
     ماڭا ياخشى تىلەكلەرنى تىلەرسەنمۇ؟ ھازىرغىچە نۇرغۇن-نۇرغۇن تىلەكلەرنى ئاڭلىدىم، سېنىڭكىدەك تاتلىق تۇيۇلمىدى. خىيالىمدىكى سەن ھەر قېتىم ئەشۇ يېقىشلىق ئاۋازىڭ بىلەن شۇنچە يېقىملىق، غايىۋى تىلەكلەرنى تىلەيتتىڭ. لېكىن ئەمەلىيەتتە بولسا قاراڭنىمۇ كۆرسەتمەي، نەلەردە يۈرىدىغانسەن؟ ھەي، سېنى بۇرۇنراق تونۇۋالسام ھە! ئەشۇ ئاۋاز ئارتىسلىرىنىڭكىگە ئوخشايدىغان تاتلىق ئاۋازىڭنى ئەمەلىيەتتىمۇ ئاڭلىيالىسام.

      خىيالىمدىكى سەن پەرىلەردەك تەڭداشسىز بولمىساڭمۇ، مېھرى ئىسسىق، گۈزەل بىر جانان، ھاياتنىڭ ھەرخىل داۋان-خىلمۇخىل ئاچاللىرىدا ئازماي توغرا يولغا باشلايدىغان غايەمدىكى نىگار. كۆرۈنمەس ئورا، شېكەر يالىتىلغان بومبىلاردىن توسىدىغان، تۈمەنمىڭ مىكىرلەرگە تاقابىل تۇرۇپ، سېھىرلەردىن ساقلايدىغان قەلبىمدىكى ئەزىمەت.

    سەن دائىم چۈشۈمگە كىرىسەن. بەزىدە دوستۇم بولساڭ، بەزىدە يارىم بولىسەن. بەزىدە ئاشىقىم بولۇپ ماڭا ئاتاپ قوشاقلارنى توقۇيسەنۇ، يەنە بەزىدە باشلىقىم بولۇپ، قاپاقلىرىڭنى تۈرىسەن...
    بۈگۈن يەنە چۈشۈمگە كىردىڭ. لېكىن مىنى تاپالمىدىڭ. باشقا بىرىنى ماڭا ئوخشىتىپ، «مىنى« تېپىۋالغىنىڭغا خۇشال بولۇپ، سەكرەپ كەتكۈدەكسەن. ئۇنى قولتۇقلىۋېلىپ ھاياجان بىلەن مېڭىشلىرىڭ، نېمىلەرنىدۇر سۆزلەپ ھوزۇرلىنىپ كۈلۈشلىرىڭ ئوغامنى قايناتتى، ئۇنىڭ بىلەن قول تۇتىشىپ ئاشىق- مەشۇقلاردەك ماڭغىنىڭدا ئالدىڭغا باراي دېدىميۇ، ساڭا تونۇشلۇق بېرىشكە پېتىنالماي، جايىمدا قاققان قوزۇقتەك تۇرۇپ قالدىم. چۈنكى بۇ چۈشۈمدە سەنمۇ مېنى تونۇمايتتىڭ. < مەن يۈرۈكىمنى قانىتىپ، كۆزۈمدە يىغلىدىم. مىنى چوڭقۇر سۆيىدىغان دىلدار ياشلىرىم قانداقتۇر«مىنى قۇتقۇزىۋال« دەپ تىك قىيادىن قولۇمنى چىڭ سىقىپ، پەسكە ئېسىلىپ قالغان چىن دوستۇمدەك، كىرپىكىمنىڭ بوينىغا مەھكەم يېپىشىپ تۇراتتى. مەن كۆزۈمنى چىڭ يۇمۇپ تۇرۇپ، باغرى تاشلىق بىلەن يېشىمنىڭ قولىنى قويىۋەتتىم. ئۇ قاتتىق ۋارقىرىغىنىچە تۆۋەنگە چۈشۈپ كەتتى...  (كەسىپدىشىم مەمەتجاننىڭ «كۆز يېشىمنىڭ تەبىرى ناملىق ئەسىرىدىن«)>
    سەن كەتكەندىن كېيىن خىياللار قاينىمىغا غەرق بولغۇدەكمەن. سىنى بالدۇرراق تونۇۋالغان بولسام، باشقىلارنى ماڭا ئوخشىتىپمۇ يۈرمەستىڭ. تومۇزدا يۈرگىنىڭدە مۇزدەك ئۇسسۇلۇق سۇنىدىغانغا مېنى ئىزدىگەنسەنمۇ؟ جۇدۇندا قالغىنىڭدا ئىسسىق بىر جايدا ساڭا ئاتاپ قىززىق چاي دەملەپ ساقلاۋاتقىنىمنى ھېس قىلارسەنمۇ؟

    تالاي يىللار ئۆتكەن بولسىمۇ، سەن بىلەن كۆرۈشۈپ، ھەقىقىي سىردىشىپ باقماپتىمەن. خىيالىمدىكى سەن يەنىلا شۇنداق غەيرەتلىك، يەنىلا شۇنداق جەسۇر. مەيلى نېمىلا قىلماي، ساڭا تايىنىۋالغۇم، سەندىن مەسلىھەت سورىغۇم كېلىدۇ. مەيلى نېمىلا كۆرمەي، ساڭا كۆرسەتكۈم، ساڭا سۆزلەپ بەرگۈم كېلىدۇ. مۇڭلىنىپ ئۇلتۇرغانلىرىمدا ئاسماندىن چۈشكەندەكلا كۆز ئالدىمدا پەيدا بولسىكەن، ئاپتاپتەك كۈلۈپ كېلىپ، قايغۇلىرىمنى قوغلىۋەتسىكەن دەيمەن. بەخت – خۇشاللىق ئىچىدە ئەللەيلەنگىنىمدە بولسا، سېنى بەختىمدىن تەڭ كۈلۈپ، شادلىقىمدىن تەڭ شاتلانسىكەن دەيمەن.مۇھىمى ساڭا ئۆزۈمنى تونۇتۇۋالسام، سېنى تونۇۋالسام دەيمەن!

نىدا

خىيال كەپتەرلىرىمنى پەرۋاز قىلغۇزىۋەتتىڭىزغۇ؟ كىملەرنى ئويلاپ كەتتم ھوي مەن.... توۋا   توۋا

بەختىيار(بايقاش

نەسىرىڭىزنى ئوقۇپ تولىمۇ سۆيۈندۈم،قەلىمىڭىزگە دەرت كەلمىسۇن،بارىكاللا،ياخشى يېزىپسىز!

گۈلزار

ئەڭ مۇھىمى  بىر بىرڭلارغا تونۇشلۇق بەمەي مۇشۇ گۈزەل ئەسلىمىلەر قوينىدا مەڭگۈ ياشاڭ . شۇندىلا بۇ تاتلىق ھېسلار سىزگە مەڭگۈ ھەمرا بولغۇسى !!!

زەپەر

ياخشى نەسىركەن ئىجادىيتىڭىزگە ئتۇق تىلەيمەن .ئەھۋالدىن قارىغاندا   ئۈزىڭىزنىڭ خىيال كەپتىرىڭىزنى قۇيۋەتكەن ئۆخشايسىز ، بوردەك قىز .  بۇ نەسىرنى ھەقىيقەتەن قابەھەتلىك سۆزلەر ئارقىلىق ياخشى يېزىپسىز
تىمىڭىزنى ئۇقۇپ يەنىلا ئۇقۇغۇم كىلىۋاتىدۇ . سىز راستىنلا ھىسسىياتقا باي ئىكەنسىز  . خىيال كەپتىرىڭىز مەڭگۈ ئالغا باسقاي . قۇلىڭىزغا دەت بەرمىگەي

زەپەر

ياخشى نەسىركەن ئىجادىيتىڭىزگە ئتۇق تىلەيمەن .ئەھۋالدىن قارىغاندا   ئۈزىڭىزنىڭ خىيال كەپتىرىڭىزنى قۇيۋەتكەن ئۆخشايسىز ، بوردەك قىز .  بۇ نەسىرنى ھەقىيقەتەن قابەھەتلىك سۆزلەر ئارقىلىق ياخشى يېزىپسىز
تىمىڭىزنى ئۇقۇپ يەنىلا ئۇقۇغۇم كىلىۋاتىدۇ . سىز راستىنلا ھىسسىياتقا باي ئىكەنسىز  . خىيال كەپتىرىڭىز مەڭگۈ ئالغا باسقاي . قۇلىڭىزغا دەت بەرمىگەي