توي ھەققىدە قوشاقلار (مۇزاتى)

مۇزاتى

توي ھەققىدە قوشاقلار

مەخمۇت ئاۋۇت(مۇزاتى)



مۇبارەك توي بۈگۈن بىزگە قۇتلۇق كۈن،
كۆڭۈللەر شادلىنىپ چۇقان سالار ئۈن؛
تىلەك شۇ:ئوغۇل-قىز بەختلىك بولسۇن،
كۈتكەندۇق پەيتنى تالاي كۈندۈز-تۈن.
.
ئوغۇلنى قاتارغا  قوشتۇق بىز بۈگۈن،
قىز ئۈچۈن داۋانلار ئاشتۇق بىز بۈگۈن؛
ئوغۇل-قىز شەنىگە راسلاپ بىز سورۇن،
بەختتىن چاچقۇلار چاچتۇق بىز بۈگۈن.
.
راستلاپ بىز داستقان ئانا دىيارغا،
چىللىدۇق ئەل-يۇرتنى مۇبارەك تويغا؛
كۈتىدۇ   بارچىنى ئەزىز مېھمانغا،
ئۈمىدتە ساھىپخان قارايدۇ  يولغا.
.
باغلىدى رېشتىنى ئىككى يۈرەكنىڭ،
ئاشۇردى كۈچىنى ئىشچان بىلەكنىڭ؛
بېشى باش،ئاياق تاش قوشماق يۈرەكنىڭ،
ھاسىلدۇر مۇرادى شۇندا تېلەكنىڭ.
.
ھاياتلىق بېتىنى ئاچتى بۈگۈن توي،
چىن ۋاپا ئوتىنى ياقتى بۈگۈن توي؛
قالمىدى كۆڭۈلدە ئەمدى تۈگۈن  توي،
شۇڭلاشقا ئەۋجىگە چىقتى بۈگۈن توي.
...............................................
چىللىدۇق دوستلارنى بىز چىن كۆڭۈل بوستانىغا،
قەلىبدىن شەربەت قىلىپ چاڭقىغان دىلكانىغا؛
جەم قىلىشچۈن يارەنلەرنى بۇ شادلىق ماكانىغا،
راستلىدۇق داستقان بۈگۈن كۆڭۈللەر ئارامىغا.

مەنبە: ئۆزەمنىڭ خاس ئىجادىيىتىم .
(بۇ توي قوشىقىنى مېنىڭ رۇخسىتىمسىز  توي باغاقلىرىغا ئىشلىتىشكە بولمايدۇ، بايقالسا «ئەسەر ھوقۇقى قانۇنى»بويىچە مەسئۇلىيەت سۈرۈشتە قىلىنىدۇ)