باشلىق بول (مۇزاتى)

مۇزاتى

باشلىق بول

مەخمۇت ئاۋۇت(مۇزاتى)

ئۆزنى ئەمەس،ئۆزگىنى،
ئويلايدىغان باشلىق بول؛
لەۋزى ھالال، ئەل-ئاۋام،
قوللايدىغان باشلىق بول.

ئادىللىقنى كۆزلىگىن،
ھەقنى-ھەق دەپ سۆزلىگىن؛
شۇم نىيەتلەر كۆزىنى،
ياشلايدىغان باشلىق بول.

بولساڭ ئەگەر كىچىك پېئىل،
بېرەر ئاۋام قەلىب-دىل؛
ئەمەلدارلىق كېبىرى ،
يۇقمايدىغان باشلىق بول.

تىرىش ھارما، تىرماشقىن ،
يېڭىلىققا يول ئاچقىن؛
مۈشكۈللەردىن، خىرىستىن ،
قورقمايدىغان باشلىق بول.

ئاجىزلارنى يۆلىگىن،
ئۆز  بىل ، تۆۋەن كۆرمىگىن؛
تاشلىۋەتمەي ئۇلارنى،
يوقلايدىغان باشلىق بول.

ئەلنى پۈكسەڭ دىلىڭغا،
ئۇل قوشۇلار ئۇلۇڭغا ؛
ئەل يىغلىسا ئەكسىچە ،
كۈلمەيدىغان باشلىق بول.

قىلغىن روشەن كۆزۈڭنى،
«داغ»دىن ساقلا يۈزۈڭنى؛
شەيتان«ھاڭ»غا سۆرىسە،
يۈرمەيدىغان باشلىق بول.

پاكلىق ساڭا يار بولسۇن،
دىلىڭ ئاپئاق قار بولسۇن؛
ئەيشى-ئىشرەت پەيزىنى،
سۈرمەيدىغان باشلىق بول.

مەنبە :ئۆز ئىجادىيىتىم.

گۈلزار

باشلىق بولسا مانا مۇشۇنداق بولسا  ، خەلىق تۇرمۇشىمۇ  ھەقىقى كاپالەتكە ئىگە بولغان بولاتتى .
بۇ شېئىرىڭىزنى  ئەسلىنى بىلەلمەيۋاتقان ئاشۇ باشلىقلارغا ئوقۇپ بەرگۈم كېلىۋاتىدۇ ، رەھمەت ئەپەندىم . اللا قوللىرىڭىزغا دەرت بەرمىسۇن .