ئەي قىز (2) (مۇزاتى)

مۇزاتى

ئەي قىز
(2)
مەخمۇت ئاۋۇت(مۇزاتى)

پەرىلەر پەرىسى-ئايجامال ئەي قىز،
ئاشىدۇ ھۆرمىتىم ، بولغاچ غۇبارسىز؛
پەخرىسەن مىللەتنىڭ،ئاۋامنىڭ ئەي قىز،
ھاياتلىق يولىدا قالدۇرغاچ پاك ئىز.

زىممەڭگە يۈكلەنگەن بۇرچۇڭ مۇقەددەس،
كەلگۈسى ئانىسەن، بۈيۈكسەن پەۋەس؛
لايىقتۇر تەرىپلەش، قامچىلاش ئەمەس،
گەر ئېزىپ شەيتانغا قىلمىساڭ ھەۋەس.

قۇياشتەك چېھرىڭگە باققاندا كىشى،
جېنىغا جان قوشار ياققاچقا ئىشى؛
پاك شەرمى-ھايالىق ساپتۇر دىلكىشى،
شادلىنار بارچە دىل بولۇپ قۇردىشى.

تەگمىسۇن يامان كۆز پاكلىق جىسمىڭغا،
قالمىسۇن داغ چۈشۈپ  گۈلدەك ئىسمىڭغا؛
چۈشمىسۇن ھەم كۈيە كەڭرى رىسقىڭغا،
تىلەيمەن چىن ئىنساپ سەبىي دىلىڭغا.

پاكلىقىڭ-ھۆرمىتىڭ، ئاۋامنىڭ بەختى،
غۇرۇرۇڭ-ۋىجدانىڭ ئۇ تاجۇ-تەختى؛
ئەخلاقىڭ ئاشۇرار  ئەلنىڭ ھۆرمىتى،
بولغۇسى سەن بىلەن يۇرتۇم جەننىتى.

سۆيۈنەر ئەل دىلى سېنىڭدىن ئەي قىز،
تەرىپلەر، ماختىشار بولغاچ پەخرىمىز؛
ئەل گۈلى-زىننىتى، كىرسىز-غۇبارسىز،
ئاداشما، ئۆڭمىگىن  يولۇڭدىن ھەرگىز.

مەنبە: ئۆز ئىجادىيىتىم.