شەكىلۋاز (مۇزاتى)

مۇزاتى

شەكىلۋاز  

(ساتىرىك شېئىر)

   مەخمۇت ئاۋۇت(مۇزاتى)


ئۆپكىنى گۆش كۆرسىتىدۇ شەكىلۋاز،
قىلنى پىل دەك كۆپتۈرىدۇ شەكىلۋاز؛
ئەيىبىنى مۆكتۈرىدۇ شەكىلۋاز،
ساڭا ۋىجدان ساتتۇرىدۇ شەكىلۋاز.

كەلگەچ ئېلىپ قۇت سىياسەت ياخشىلىق،
بولدى ساقىت ئاۋام-ئەلدىن باج-سېلىق؛               
كۆنۈپ قالغاچ باشقۇرۇپلا تايىنلىق،
تۇخۇمدىن تۈك ئۈندۈرىدۇ شەكىلۋاز.

چىققاچ ئويلاپ ئۆز ئالدىغا پەتىۋا،
بولدى گاھى ئۈزۈمدىن تەك ئەتىۋا؛
قۇرۇق تاغار ئۆرە تۇرغان نەدىۋا،
قىلىپ بېسىم كۆندۈرىدۇ شەكىلۋاز.

ھېلە بىلەن ساقتا ھېساپ ئويدۇرۇپ،
قىلىشىدۇ«قەغەز جېڭى»يەڭ تۈرۈپ؛
رىئاللىقتا ئاسمان-زىمىن پەرق تۇرۇپ،
چەللىدە ئات چاپتۇرىدۇ شەكىلۋاز.

بېيىغانلار ئەل ئىچىدە ئاز ئەمەس،
ھەممە تەكشى،كۈندە باھار-ياز ئەمەس؛
يەنە ئاجىز ،نامراتمۇ بار،ئاز ئەمەس،
ھاللاندى دەپ ئاتتۇرىدۇ شەكىلۋاز.

جابدۇپ،ياساپ نامراتلارنىڭ ئۆيىنى،
ئوتتۇز قىلىپ قوتىنىدا قويىنى؛
كۆرسەتمەكچۈن ياساندۇرۇپ بويىنى،
كەتسە رەھبەر ، سالدۇرىدۇ شەكىلۋاز.

چۆلنى بوستان، ئۇز كۆرسىتىپ يۇقۇرغا،
ئېرىشمەكچۈن يەنە ئىگىز ئوقۇرغا؛
چېچىپ شالە ، چىقىۋېلىپ ئوتتۇرغا،
ئايانماستىن لاپ ئۇرىدۇ شەكىلۋاز.

بۇ خىل ئىللەت باردۇر ھەممە ساھەدە،
كۆز بويايدۇ ، مەنسەپ كويى، تامادە؛
ئالدامچىلار بولغۇسىدۇر  شەرمەندە،
مات بولغۇچە قىپ تۇرىدۇ شەكىلۋاز.

تىغ ئۇرايلى ئەشۇ ناچار ئىللەتكە،
تارتىپ يىلتىز ئايلانمىسۇن ئادەتكە؛
ئەۋلادلارنى قالدۇرمايلى بۇ دەرتكە،
ئەل دىلىنى كۆيدۈرىدۇ شەكىلۋاز.

مەنبە: ئۆز ئىجادىيىتىم.

ئىلغار

ياخشى يېزىلىپتۇ شەكىلۋازلىق قىلدىغانلارغا بىر قېتىملىق تەنقىت بوپتۇ رەخمەت سىزگە