ھايات قەسىيدىسى (مۇزاتى)

مۇزاتى

ھايات قەسىيدىسى

مەخمۇت ئاۋۇت(مۇزاتى)

ساڭا بۈگۈن  غەنىمەتتۇر،  ئۆتمىسەڭمۇ پاراغەتتە،
ئۇنۇتمىغىن تۈنۈگۈننى ،ئۆتكۈنۈڭنى ئازاپ-دەرتتە،
ئەتەڭ ئۈچۈن ئاساس سالغىن، يۈرمە ھەرگىز نادامەتتە،
سېلىنسا گەر ئۇلۇڭ پۇختا ، باردۇر ئۈمۈت سائادەتتە،
بولۇر ئورنۇڭ ئەل ئىچىدە، يېتىلسەڭ گەر ماھارەتتە.


جاپا تارتماي جاھاندا ھېچ ، ھالاۋەتمۇ بولمايدىكەن،
بولار ئىنسان قانائەتسىز،كېمى ھېچ بىر تولمايدىكەن،
تۈنۈگۈننى ئۇزۇتۇپلا ، بۈگۈننى ھەم ئويلايدىكەن،
ئەجرىدىن گەر ئۇتۇق تاپسا، كۆڭلى خوشال يايرايدىكەن،
ئىشچانلارغا ياغار ئالقىش، كۆتۈرەر باشتا-ھۆرمەتتە.



ئۆكۈنمىگىن كۈنلىرىڭدىن ، بىركۈن ئامەت ياغار ساڭا،
ئەجىر-مېھنەت بېرىپ مېۋە، بەخىت كۈلۈپ باقار ساڭا،
ئۇتۇقىڭنى ئاۋام بىلگەچ ، شەرەپ گۈلى تاقار ساڭا،
كۆڭلۈڭدىكى شۇ نىگارىڭ كېلىپ باغرىن ياقار ساڭا،
ئەمما يەنە خىرىس مەۋجۇت، كېرىلمىگىن قانائەتتە.


بىلسەڭ بىر چاغ قولۇڭ قىسقا، ئۆتەر ئىدى كۈنۈڭ تەستە،
قىينار ئىدى جاپا -مۈشكۈل، تۇرار ئورنۇڭ ئاياق-پەستە،
نىچاغ باغلاپ بېلىڭنى سەن، نىشان تاپتىڭ ئەشۇ پەيتتە،
بەخىت كۈلۈپ باققىنىدا ، ئۆتكەن كۈنۈڭ بولسۇن ئەستە،
قىممىتىمنى ساقلاي دېسەڭ،  يېتىلگىن سەن كامالەتتە.


بىلمەك كېرەك، ھايات قەدرىن، كېلەر ئىنسانغا ئۇ بىر رەت،
بىھۇدە ئۆتسە ھەر بىر كۈن، يېنىپ كەلمەس ئۇ ئاقىۋەت،
ئۆمۈر مەنزىلى بەك قىسقا، كۈلۈپ ياشا، كۆرمىگىن دەرت،
پۇشايماندا كۆزۈڭ ياشلاپ ، ئۆكۈنۈشتە ئۆتمە پەقەت،
شۇڭا قەدىرلە ھەر كۈننى، بىلىپ ئۇنى غەنىمەتتە.

مەنبە: ئۆز ئىجادىيىتىم.

زەپەر

رەخمەت سىزگە

ئامان

ئىجادى يازمىلىرىڭىز بىلەن مۇنبەرنى ئاۋاتلاشتۇرۇۋاتىسىز، رەھمەت سىزگە.