تۆكۈلەر يۈرەكتىن تەشەككۈر سىزگە (مۇزاتى)

مۇزاتى

تۆكۈلەر يۈرەكتىن  تەشەككۈر سىزگە



(جاپاكەش مۇھىت تازىلىق ئىشچىلىرىغا بېغىشلايمەن)

مەخمۇت ئاۋۇت(مۇزاتى)

مەدداھلار-ناتىقلار ئۇستىدۇر سۆزگە،
ئېلانچىك،پۇلدارلار كۆرۈنەر كۆزگە؛
پاكلىقنىڭ ئۇلچىسى يوق سىزدىن ئۆزگە،
تۆكۈلەر يۈرەكتىن  تەشەككۈر سىزگە.

باشلىنار تاڭ بىلەن كەسپ- ئىشىڭىز،
پاكىزلاش مۇھىتنى خىيال-چۈشىڭىز؛
ئۇنتۇلماس دىللاردىن،ساۋاپ ئىشىڭىز،
تۆكۈلەر يۈرەكتىن تەشەككۈر سىزگە.

رەستىدە  ئادەملەر دېڭىز بوپ ئاقار،
تالايلاپ تاشلىنىپ  ئەخلەتلەر ياتار؛
بۇلغانغان شۇ مۇھىت سىزدە پاكلىنار،
تۆكۈلەر يۈرەكتىن تەشەككۈر سىزگە.


كەسپىڭىز جاپالىق بولسىمۇ قانچە،
ۋايساش يوق ۋە ياكى پۇشايمان قىلچە؛
ھالال-پاك تەر بىلەن ئۈنگۈسى ئۈنچە،
تۆكۈلەر يۈرەكتىن تەشەككۈر سىزگە.

پاكىزە مۇھىتتا يۈرىمىز راۋان،
يارالغاچ سىز بىلەن گۈزەل بۇ ماكان؛
سىز گويا  پەرىشتە سۈپەت بىر ئىنسان،
تۆكۈلەر يۈرەكتىن تەشەككۈر سىزگە.


قىلسىمۇخىرىسلارھەتتا جۇت،تومۇز،
باش ئېگەر ھەممىسى،ئەمەس سىز يالغۇز؛
قىلماقلىق ئارماندۇر مۇھىتنى پاك-ئۇز،
تۆكۈلەر يۈرەكتىن تەشەككۈر سىزگە.

سىز بولغاچ ياساندى يۇرتۇم توز كەبى،
پارلىدى قۇياشتەك ئاۋامنىڭ قەلبى؛
باقىدۇ ھۆرمەتتە سىزگە يۇرت ئەھلى،
تۆكۈلەر يۈرەكتىن تەشەككۈر سىزگە.

بارچە پاك گۈزەللىك مۇجەسسەم سىزدە،
بولار ساپ مۇھىتتىن ساغلاملىق تەندە؛
شۇ سەۋەپ تۇغۇلدى چىن ھۆرمەت مەندە،
تۆكۈلەر يۈرەكتىن تەشەككۈر سىزگە.

مەنبە: ئۆز ئىجادىيىتىم.

گۈلزار

ئىجادىيەتلىرىڭىزگە ئۇتۇق تىلەيمەن . ئەتە يەنە يېڭى ئەسەرلىرىڭىزنى كۆرۈشكە تەييارمەن رەھمەت .