بۇ ھايات (مۇزاتى)

مۇزاتى

بۇ ھايات

(مەخمۇت ئاۋۇت) (مۇزاتى)

قىزىققاچ ھاياتقا يۈردۈم ئەل كېزىپ،
ھېس قىلغاچ ھاياتنى كەتمىدىم ئېزىپ؛
تەرىپلەپ ھاياتنى قويدۇم مەن يېزىپ،
ھاياتلىق كارتىسىن يۈزەكى سىزىپ.

ئىنسانغا بۇ ھايات نىسىپ ئامانەت،
قوشماقتۇر ھاياتتا قىسمەتۇ-ئامەت؛
قىلسا گەر تىرىشىپ ھەركىشى مېھنەت،
بولغۇسى شۇنچە ئۇ گۈزەل-كارامەت.

چەكلىكتۇر بۇ ھايات شۇنچىلىك قىسقا،
ئۈنۈمگە ئېرىشىش باغلىق تونۇشقا؛
كېتەر ئۇ  بىھۇدە ئۆتسە گەر بوشقا،
بېرىدۇ مول مېۋە سالساڭ گەرئىشقا.

ئىنسانغا بۇ ھايات كېلەر بىر نۆۋەت،
كۆرسىتەر كىشىگە جاپا-ھالاۋەت؛
تەقدىرنىڭ چاقچىقى كېلەر نەچچە رەت،
مۈشكۈلنى يەڭگۈچى كۆرىدۇ راھەت.

بۇ ھايات شۇنچە-ئەڭ قەدىرلىك،ئۇلۇق،
يېتىپ ئۇ قەدرىگە چۈشەنسە تولۇق؛
بېغىشلاپ دىللارغا مۇھاببەت-ئوتلۇق،
بەخت ۋە لەززەتكە قاندۇرار بولۇق.

ئادەمگە بۇ ھايات تەقدىم-مۇكاپات،
قەدرىگە يەتكەنگە بېرىدۇ قانات؛
بىلمىسەڭ قەدرىنى بولۇر ساڭا يات،
خارلىساڭ ئۇنى گەر قىلۇر سېنى مات.

كىشىگە بۇ ھايات بېغىشلار ھوزۇر،
بەزىلەر بوغۇلار، بەزىلەر پوزۇر؛
يارىلىش ئوخشاشتۇر،ياشاش پەرقى زور،
ئۆتىسەن قەدىرلىك بولسىلا غۇرۇر.

ئەزىزلەپ سۆيگەنگە- لايىق بۇ ھايات،
قەدىرلەپ كۆيگەنگە- تالىق بۇ ھايات؛
باغرىنى ياققانغا  - ئاشىق بۇ ھايات،
پايدىلىق بىلگەنگە - سادىق بۇ ھايات.

مەنبە: ئۆز ئىجادىيىتىم.

گۈلزار

ئەزىزلەپ سۆيگەنگە- لايىق بۇ ھايات،
قەدىرلەپ كۆيگەنگە- تالىق بۇ ھايات؛
باغرىنى ياققانغا  - ئاشىق بۇ ھايات،
پايدىلىق بىلگەنگە - سادىق بۇ ھايات.
بۇ قۇلارنى بەك ياقتۇردۇم ، مانا بۇ ھايات   ھەقىقىتى . رەھمەت ئەپەندىم .