رەزىللەر (مۇزاتى)

مۇزاتى

رەزىللەر


(بۆلگۈنچى كۈچلەرگە رەددىيە)

مەخمۇت ئاۋۇت(مۇزاتى)

پىتنە-ئىغۋا تارقىتىپ ،كۆڭۈل ئۇتقان رەزىللەر،
ئىناقلىققا تىغ ئۇرۇپ، يات يول تۇتقان رەزىللەر،
بىگۇناھقا قەسىت قىلىپ، يالماپ يۇتقان رەزىللەر،
چىقىپ  ئىنسان قېلپىدىن،ياۋغا قاتقان رەزىللەر،
ئەلگە قىلىپ بىۋاپالىق ، ۋەتەن ساتقان رەزىللەر.



دىنىي تونغا ئورۇنۇپ ، قايمۇقتۇرغان خەلقنى،
شۇم نىيەتتە«دەريادىن ئايرىماق بوپ بېلىقنى»،
سالماق بولغان ئارىغا بۆلگۈنچىلىك-يېرىقنى،
قىلماس دۇرۇس ئىنسان ھېچ ئاڭا ئوخشاش قىلىقنى،
ئۆز پۇتىغا چاغلىماي پالتا چاپقان رەزىللەر.



بىلىپ ئۆزىن بەك تادان ، قوي كۆرسەتكەن قاۋاننى،
سېزەلمەيدۇ دەپ ئەلنى، ياخشى بىلەن ياماننى،
«ئىستىقباللىق بۈيۈك يول»قىپ كۆرسەتكەن داۋاننى،
زۇلىمەت -تۈن ئىچىگە باشلىماق بوپ ئاۋامنى،
جاھانگىرلار قوينىغا ئۆزىن ئاتقان رەزىللەر.



ئەلگە بەرمەس ئەمىنلىك ،نىيەت-قەستى ياماندۇر،
سۆزلىرىدە ئاساس كەم ، بۇغدىيى توق ساماندۇر،
قىلمىشىدا گۇمان بار، كۆڭلى ئەمەس ئاماندۇر،
يۈرەلمەيدۇ ئاشكارە ، گەر كۆرۈنسە تامامدۇر،
نىيىتىگە جاۋابەن گۆردە ياتقان رەزىللەر.



كەسىپ قىلغان ئۆزىگە ئۆسەك سۆزنى،ئىغۋانى،
تاراتماق بوپ يۇرت-ئەلدە ئارازىلىق-غەۋغانى،
گەر بۇزۇلسا ئىناقلىق -بولار ھاسىل ئارمانى،
سالسىمۇ جار ئالەمچە ، يوق جىسمىدا دەرمانى،
قىلمىشىنى يوشۇرۇپ ،چاپان ياپقان رەزىللەر.



بىخۇتلاشساك ئەگەر بىز ، شۇم نىيەتلەر قاۋاندۇر،
تۇتۇشۇلسا قولغا-قول ،ياۋنىڭ رەڭگى ساماندۇر،
كەلدى ئەل-يۇرت لەرزىگە ،ئاۋام پەيلى ياماندۇر،
بولسا بىت-چىت ياۋ قەستى،شۇندا خەلقىم ئاماندۇر،
«ئەل قىساسى مىنەل ھەق»زاۋال تاپقان رەزىللەر.


مەنبە : ئۆز ئىجادىيىتىم.

گۈلزار

ئىجادىيەتلىرىڭىزگە ئۇتۇق تىلەيمەن ، ياخشى ئەسەرلەرنى مۇنبەر ئەھلىگە سۈنۈپ تۇرۇشىڭىزنى ئۈمىد قىلىمەن .  رەھمەت