ئەي قىز (مۇزاتى)

مۇزاتى

                                                                         ئەي قىز

                                                                   مەخمۇت ئاۋۇت(مۇزاتى)

                                                             ئاناڭنىڭ ئىزىدىن  قالمىغىن ئەي قىز،
                                                             مەنزىلىڭ يولۇڭدىن تايمىغىن ئەي قىز؛
                                                              ئاياندۇر گۈزەللىك ئىش-ھەركىتىڭدىن،
                                                              سەتلىشىپ چاۋاڭنى يايمىغىن ئەي قىز.

                                                               قىلسىمۇ جامالىڭ ئاينى خوپ خىجىل،
                                                               ئۆتمىكىڭ كېرەكتۇر ھايالىق-ئېسىل؛
                                                                ئىنسانىي خىسلەتنى يوقاتساڭ ناۋا،
                                                                ئوقۇيدۇ مىڭ لەنەت ساڭا بارچە دىل.

                                                              «مۇھاببەت»ئىزدىمە بايلىقنى كۆزلەپ،
                                                              ئالدىما كۆڭۈلنى قەن-شېكەر سۆزلەپ؛
                                                              ئايىماس سېنىمۇ (ئۆتنە ئالەم بۇ)،
                                                             بىرسىگە قىلساڭ گەر يانىدۇ يۈزلەپ .

                                                            ئوخشىسۇن قىلىقىڭ ئىسمىڭغا«گۈل»گە،
                                                            ياراتقىن ئىشىڭدا ئىجابىي ئۈلگە؛
                                                            رىقابەت،خىرىسقا باش ئەگسەڭ ئەگەر،
                                                            جامالىڭ نە كېرەك باراۋەر نۆلگە .

                                                            كۈتمەكتە ئەل-ئاۋام كۆزىنى ساڭا،
                                                            كۈتمەكتە ھەم ئاناڭ ئۈمۈدلەر ساڭا؛
                                                            ئاقلىساڭ بارچىنىڭ ئۈمۈدىنى گەر،
                                                            كېلەچەك،شان-ئۇتۇق نىسىپتۇر ساڭا.

                                                           قانۇندىن، ئەخلاقتىن چەتنىمە ھەرگىز،
                                                           كەلگۈسى ئانىسەن قالدۇرغىن پاك ئىز؛
                                                           بەڭباشلىقىڭغا ئەمدى سال يۈگەن،
                                                            پاك شەرمى-ھايالىق ياشىغىن ئەي قىز.

                                                          ئەجدادىڭ ئۈمۈدىن ئاقلىغىن ئەي قىز،
                                                          چىن ئەخلاق،ۋىجداننى ياقلىغىن ئەي قىز؛
                                                          شەيتاننىڭ دېپىغا ئوينىماي ئۇسسۇل،
                                                          ئىپپىتىڭ،غۇرۇرۇڭ ساقلىغىن ئەي قىز.

شېئرىنىڭ ئاپتورى : باي ناھىيىسىدىن : مەخمۇت ئاۋۇت (مۇزاتى)
بۇ شېئىر : «شىجاڭ قانۇنچىلىق گېزىتى» دە ئېلان قىلىنغان.

زەپەر

مۇنبەرگە يىڭىدىن بىر شائىر نىڭ يىتىشىپ چىققانلىقىنى قىزغىن تەبىرىكلەيمەن  . ئىجادىي يازمىللىرىڭىزنى بايقاش ئەھلىدىن ئايماسلىقىڭىزنى تەۋسىيە قىلىمەن

مۇزاتى

رەخمەت، باشقۇرغۇچى!
تەنقىدىي پىكىر ۋە تەكلىپلەرنى سەمىمى قوبۇل قىلىمەن.

pari

ياخشى يېزىلغان شېئىرلار بىلەن ئۇچراشقىنىمدىن خۇشالمەن رەھمەت .

گۈلزار

شېئىرلىرىڭىزنى دائىم ئوقۇپ تۇرۇش نېسىپ بولسۇن . بەك ئېسىل شېئىرلار ئىكەن رەھمەت .

مەتتۇردى

ياخشى يېزىلغان شېئىرلار بىلەن ئۇچراشقىنىمدىن خۇشالمەن رەھمەت .