ئولتۇرمىسام بوپتىكەن.(مۇزاتى)

مۇزاتى

ئولتۇرمىسام بوپتىكەن

(بىنا ئۆيگە كۆنەلمىگەن بىر  مويسىپىت  تىلىدىن)

مەخمۇت ئاۋۇت(مۇزاتى)

ئەسلى ئۆيۈم ئازادە  شەھەرگە بەك يېقىندى،
ئەتراپلىرى ئورمانزار سۈيى ئەلۋەك ئېقىندى؛
يولغا كەلگەچ ئۆيلىرىم ھايال ئۆتمەي چېقىلدى،
قىستىمىسا بىنادا ئولتۇرمىسام بوپتىكەن.

باردى ئۆيۈم يېزىدا كەڭرى ئايۋان-سارايدەك،
نېمە قىلسام ئۆزەمنىڭ،سۇلتان گايى مالايدەك؛
ئەمەس مۈمكىن بۇ جايدا ،تىكمەك كۆچەت قورايدەك،
بۇنى بىلسەم  بىنادا ئولتۇرمىسام بوپتىكەن.

توك توختايدۇ بىر كۈنى،بىر كۈنىسى ھەم سۇ يوق،
پار توختىسا بەزىدە مەش قويۇشنىڭ ئورنى يوق؛
قاخشىساممۇ كۈندەبىر پۇشايماننىڭ ئورنى يوق،
بولدى ئەلەم  بىنادا ئولتۇرمىسام بوپتىكەن.

خوشنىلارمۇ شۇنچە كۆپ تونۇمايمەن بىرىنى،
ئىشىكلەرنى دۈم ئېتىپ كۆرسەتمىگەچ ئۆزىنى؛
دوقۇرۇشساق سالام يوق،چۈشەنمەيمەن سىرىنى،
بۇنى بىلسەم  بىنادا ئولتۇرمىسام بوپتىكەن.

ئىگىز قەۋەت ياخشى دەپ چىقىۋېلىپ ساماغا،
چۈشسە ھاجەت شۇ ھامان چىقماق قىيىن تالاغا؛
بولدى ماڭا بەك ئەلەم سولاندىمغۇ كامارغا،
مىڭ پۇشايمان بىنادا ئولتۇرمىسام بوپتىكەن.

ئەسلى ئۆيۈم-داچىدا توخۇ-كەپتەر قىلاتتىم،
شادلانغاچقا تەنلىرىم،ئەركىن نەپەس ئالاتتىم؛
مېۋە بەرگەچ كۆچەتلەر ، ھوزۇرلىنىپ كۈلەتتىم،
بالدۇر بىلسەم  بىنادا ئولتۇرمىسام بوپتىكەن.

ساتاي دېسەم ئەمدى مەن نەرقىغە ھېچ چىقمىدى،
قىلدى مازاق خالايىق،دەردىمنى ھېچ ئۇقمىدى؛
كاتەك ئۆيگە سولانماي ماڭا ئامال يوقمىدى؟
نېمە  ئەلەم بىنادا ئولتۇرمىسام بوپتىكەن.

چىقىملىرى شۇنچە كۆپ،خوجىلىققا بېرىگلىك،
باردۇر يەنە خەجىسى سۇ،پار،توكقا تۆلەگلىك؛
گەر بولسىمۇ قولاي ئۆي،بىزگە تېجەش كېرەكلىك،
بۇنى بىلسەم  بىنادا ئولتۇرمىسام بوپتىكەن.

مەنبە: ئىلھامىم.
(ئەسكەرتىش:  بۇ تېمىىدا ئوتتۇرىغا قويۇلغان ئىدىيە پەقەت بىر قىسىم ياشانغانلارنىڭ ئىنكاسلىرىدىنلا ئىبارەت خالاس،مېنىڭ كۆز قارىشىمغا ۋەكىللىك قىلمايدۇ.)

گۈلزار

خوشنىلارمۇ شۇنچە كۆپ تونۇمايمەن بىرىنى،
ئىشىكلەرنى دۈم ئېتىپ كۆرسەتمىگەچ ئۆزىنى؛
دوقۇرۇشساق سالام يوق،چۈشەنمەيمەن سىرىنى،
بۇنى بىلسەم  بىنادا ئولتۇرمىسام بوپتىكەن.

مانا  بۇ كۈپلىتلاردا ئىپادىلەنگەندەك بىنا  ئۆيلەردە ئولتۇرۋاتقانلاردا خوشنىدارچىلىق مۇناسىۋىتى بولمايدىكەن  .  بۇ زادى نىمە ئۈچۈن ؟ بۇنىڭغا مەنمۇ ھەيران .
  داداملارمۇ قىش كۈنلىرى بىنا ئۆيدە ،ياز كۈنلىرى يېزىدا ئولتۇرغاچقا ، ئۇلارمۇ قوشنىدارچىلىق مۇناسىۋەتكە  ناھايىتى ئەھمىيەت بېرەتتى .  قۇربان ھېيتتا  داداملار ئۆيدە نېزىر قىلىپ قوشنىلارنىڭ ھەمىسىنى چاقىرغان بولسىمۇ ،ئۇلاردىن پەقەت ئىككى ئادەملا  كىرىپتۇ. بۇنى كۆرۈپ دادامنىڭمۇ كۆڭلى شۇنداق يېرىم بولغان ئىدى .
بۇ ھەقىقەتەن مويسىپىتلارنىڭ يۈرەك سۆزلىرى .
رەھمەت ئەپەندىم . مۇشۇنداق ئېسىل شېئىرلارنى ۋۇجۇتقا چىقارغان ئاشۇ دىللىرىڭىز بىلەن قوللىرىڭىزغا اللا دەرت بەرمىسۇن .

نىدا

ياخشى تەسۋېرلەپسىز    ،قەلىمىڭىزگە كۆز تەگمىسۇن!