بىلىم ئال (مۇزاتى)

مۇزاتى

بىلىم ئال

مەخمۇت ئاۋۇت(مۇزاتى)

مەنزىلىمدە ئاداشماي يۈرەي دېسەڭ بىلىم ئال،
ئەجىرىمدىن ھالال نەپ كۆرەي دېسەڭ بىلىم ئال.

ھايات يولۇڭ ئىگىز-پەس،بولساڭ مىشچان كۈنۈڭ تەس،
ياقاڭ يىرتىپ يىغلىماي، كۈلەي دېسەڭ بىلىم ئال.

بۈگۈننىلا كۆزلىمە ، ئورۇنسىز لاپ سۆزلىمە ،
رىقابەتتە مۈشكۈلنى يېڭەي دېسەڭ بىلىم ئال.

قانات بىلگىن ئىلىمنى ، نۇرلاندۇرار دىلىڭنى ،
نادانلىقنىڭ چۆلىدە يۈرمەي دېسەڭ بىلىم ئال.

بىئەقىللىق -نادانلىق ، ئۇندىن كېلەر نامراتلىق،
بۇردا نانغا زار بولۇپ ئۆتمەي دېسەڭ بىلىم ئال.

ياتساڭ ئۇخلاپ غەپلەتتە، ئۆتەر كۈنۈڭ مۇڭ-دەرتتە،
بەختىم كۈلۈپ ياخشى كۈن كۆرەي دېسەڭ بىلىم ئال.

تالەي كۈلۈپ باقسىمۇ، گەر ئەمىلىڭ ئۆسسىمۇ،
يېڭى مەنزىل ، نىشانغا ئۆرلەي دېسەڭ بىلىم ئال.

يۈزۈم يورۇق دېسەڭ گەر، كېلەر ھۆرمەت تۆكسەڭ تەر،
ئەلدە مەزمۇت پۇت تېرەپ تۇراي دېسەڭ بىلىم ئال.

ئىناقلىقنى كۆزلىگىن ، ھەقىقەتنى سۆزلىگىن ،
ھەق-ناھەقنىڭ پەرقىنى بىلەي دېسەڭ بىلىم ئال.

بولسا سەندە شىجائەت، ياردۇر بەخت-شان،ئامەت،
دۇنيالىقتا ئارمانسىز ئۆتەي دېسەڭ بىلىم ئال .

مەنبە:«جۇڭگو مۇسۇلمانلىرى»ژورنىلىنىڭ 2011-يىل 1-سانىدىن
شېئىرىنىڭ ئاپتورى: باي ناھىيىسىدىن : مەخمۇت ئاۋۇت (مۇزاتى) (ئۆز ئىجادىيىتىم)

ئامان

بايقاش مۇنبىرىگە كەلگەن قەدىمىڭىزگە مەرھابا!
شېئىرنى بەك ياخشى يېزىپسىز، مۇنبىرىمىزگە تالانتلىق شائىردىن يەنە بىرى قېتىلىپتۇ، قارشى ئالىمىز. مۇشۇنداق سەرخىل ئىجادىيەتلىرىڭىز بىلەن مۇنبەرنى يەنىمۇ ئاۋاتلاشتۇرغايسىز، رەھمەت.

گۈلزار

ئېسىل شېئىرلىڭىز بىلەن مۇنبەرنى ئاۋاتلاشتۇرۋەتتىڭىز ، رەھمەت ئەپەندىم . سىزنىڭ مۇنبىرىمىزنىڭ دائىملىق ئەزاسى بولۇپ قېلىشىڭىزنى ئۈمىد قىلىمىز .
  بۇندىن كېيىنكى ئىجادىيەتلىرىڭىزگە ئۇتۇق تىلەيمىز ھەم مۇنبەردە كۆرۈشكە تەشنامىز .

pari

شېئىرىڭىز كىشىنى سۈيۈندۈرىدىكەن رەھمەت سىزگە داۋاملىق يوللاپ تۇرڭ