گۈزەللىكنى سۆيمەيدىغان ھەم گۈزەللىككە ئىنتىلمەيدىغان ئىنسان بولمىسا كېرەك. ئىنسان گۈزەللىككە ئىنتىلگەن ۋە گۈزەللىكنى سۆيگەندىلا، گۈزەللىكتىن بەھر ئالالايدۇ ھەم باشقىلارغا گۈزەللىك ئاتا قىلالايدۇ.
 تەبىئەت دۇنياسىدا جىمى مەۋجۇداتنىڭ ئۆزىگە خاس گۈزەللىكى ھەم گۈزەللىكتىن بەھر ئېلىش ئىقتىدارى بولىدۇ. ئەمما گۈزەللىك ئاتا قىلىش ۋە گۈزەللىكتىن بەھر ئېلىش ئۇسۇللىرى، يوللىرى ئوخشاش بولمايدۇ. مەۋجۇداتلار ئىچىدە ئىنسان ئۈچۈن گۈزەللىك ئەڭ مۇھىم ھەم ئەڭ قىممەتلىك. ئىنسان قەلب گۈزەللىكىگە ماسلاشقان سىرتقى گۈزەللىكى بىلەن ئىززەتلىكتۇر. ئادەمدە گۈزەللىكنىڭ ئىپادىسى تولىمۇ كەڭ دائىرىدە بولۇپ، ئۇ يۈرۈش - تۇرۇش، سۆز - ھەرىكەت، ئوزۇقلۇنۇش، كىيىنىش، كەسىپنى سۆيۈش، كەسىپتە نەتىجە قازىنىش، ئىجتىمائىي پائالىيەت قاتارلىقلارنىڭ ھەممىسىگە سىڭگەن بولىدۇ. ئىنسان تەبىئىي مۇھىت ھەم تەربىيە ئارقىلىق گۈزەللىكنى يارىتالايدۇ ھەم تاپالايدۇ. گۈزەللىكنى تەرتىپلىك ئائىلە تەسىرى، مەكتەپ تەربىيەسى، جەمئىيەتنى كۆزىتىش، ئېسىل ئەخلاق - پەزىلەت بىلەن ياراتقىلى، ئىش - ھەرىكەت، گەپ - سۆز، كەسىپ، ئىجتىمائىي پائالىيەت ھەم مۇناسىۋەتتە قوللىنىش ئارقىلىق تىكلىگىلى بولىدۇ.
تەبىئىي گۈزەللىك كىشىلەر ئارا مۇناسىۋەت، ئائىلىۋى تەرتىپ، كەسىپنى سۆيۈش، ئىلمىي پوزىتسىيە، ئەستايىدىل ئىش - ھەرىكەتتە تەدرىجىي يېتىلىدىغان بولغاچقا، ئۇنى ئىزدىگەندىن كۆرە، ئەڭ ياخشىسى، گۈزەللىكنى قانداق يېتىلدۈرۈش ۋە قانداق قەدىرلەش ھەققىدە ئىزدەنگەن تۈزۈك.
بىزگە مەلۇم، ئەخلاقلىق ئادەم مەدەنىيەتلىك كېلىدۇ، مەدەنىيەتلىك ئادەم گۈزەللىككە ئىنتىلىدۇ. ئادەمدە بىلىم بولۇپ، ئەخلاق بولمىسا، ئۇنىڭ ھۆرمىتى بولمايدۇ. كونىلار«ئالىم بولماقتىن ئادەم بولماق قىيىن» دەپ بىكار ئېيتمىغان. ئادەم ئەخلاقلىق بولۇپ، ئۇنىڭدا بىلىم بولمىسا، ئۇ بىلىم ئىگىلەشكە تىرىشىدۇ، ئىگىلىگەن بىلىمى ئارقىلىق ئۆزى ۋە ئۆزگىنى يېتەكلەيدۇ، باشقىلارغا كۆڭۈل بۆلىدۇ، جەمئىيەت ئۈچۈن تۆھپە قوشىدۇ.