مۇھەممەد مۇرسى 1951-يىلى 8 - ئايدا مىسىرنىڭ نىل دەرياسى دېلتىسىدىكى مەشرىق ئۆلكىسىدە تۇغۇلغان، قاھىرە ئۇنىۋېرسىتېتىدا قۇرۇلۇش ئىلمى بويىچە باكالاۋىرلىق ۋە ماگىستىرلىق ئۇنۋانىغا ئېرىشكەن. 1982-يىلى ئامېرىكا كالىفورنىيە ئۇنىۋېرسىتېتىدا قۇرۇلۇش ئىلمى بويىچە دوكتورلۇق ئۇنۋانىغا ئېرىشكەن، شۇنىڭدىن كېيىن كالىفورنىيە ئىشتاتى ئۇنىۋېرسىتېتى ۋە مىسىرنىڭ مەشرىق ئۆلكىسىدىكى زەقاقىق ئۇنىۋېرسىتېتىدا ئوقۇتقۇچى بولغان. 2000-يىلى مىسىر خەلق پارلامېنتىنىڭ ئەزاسى بولغان. 2005-يىلى مىسىر مۇسۇلمان قېرىنداشلار جەمئىيىتى يېتەكچىلىك ئىدارىسى (ئالىي قارار چىقىرىش ئورگىنى)نىڭ ئەزاسى بولغان. 2011-يىلى 4 - ئاينىڭ ئاخىرى مىسىر مۇسۇلمان قېرىنداشلار جەمئىيىتى يېتەكچىلىك ئىدارىسىدىن ئىستېپا بېرىپ، ئەركىنلىك ۋە ھەققانىيەت پارتىيەسى قۇرۇشقا مەسئۇل بولغان ھەم بۇ پارتىيەنىڭ رەئىسى بولغان. مۇبارەك پىرېزىدېنت بولغان مەزگىلدە ئىككى قېتىم تۈرمىگە قامالغان.