دەريا ئېقىنى تۈز ئاقماسلىقنىڭ ئاساسلىق سەۋەبى شۇكى، ئەگرى-بۈگرى ئېقىش تەبىئەت دۇنياسىدىكى نورمال ئەھۋال، ئەمما تۈپتۈز ئېقىش بىر خىل بىنورماللىق. چۈنكى دەريا ئېقىنى ئالغا ئىلگىرىلەۋاتقان ۋاقىتتا، ھەرخىل توسالغۇلارغا ئۇچرايدۇ. شۇ باسقۇچ، شۇ مەزگىل، شۇ شارائىتتا دەريا ئېقىنى ئۇ توسالغۇلاردىن ھالقىپ ئۆتەلمەيدۇ. شۇنىڭ ئۈچۈن دەريا ئېقىنى ئەگرى يوللارنى تاللاپ، قاتمۇ-قات قىيىنچىلىقلاردىن ئايلىنىپ ئۆتۈپ، ئەڭ ئاخىرىدا چەكسىز دېڭىزغا قۇيۇلىدۇ.
ئەمەلىيەتتە كىشىلىك ھاياتمۇ شۇنداق. ئادەم ھاياتىدا ئوخشمىغان ۋاقىت، ئوخشىمىغان شارائىتتا، نۇرغۇن قىيىنچىلىق، ئوڭۇشسىزلىققا ئۇچرايدۇ. شۇ ۋاقىت، شۇ شارائىتتا بۇ قىيىنچىلىقلارنى يېڭەلمەيدۇ. شۇ ۋاقىتتا، روھىي چۈشكۈنلۈكتە ئۈمىدسىزلەنمەڭ، ئاھ ئۇرۇپ ھەسرەت چەكمەڭ ياكى نىشانىڭىزدىن ئاسانلىقچە ۋاز كەچمەڭ. سىز ئاشۇ قىيىنچىلىقتىن ئايلىنىپ ئۆتىدىغان يەنە بىر خىل يولنى تاللاپ، ئۆزىڭىزنىڭ چوڭ نىشانىغا يىتىڭ.