جۇڭگو ھۆكۈمىتى جەنۇبى ئافرىقىدىكى جۇڭگو مۇھاجىرلىرى، جۇڭگولۇقلارنى قوغداشنى كۈچەيتتى

     دېكابىرنىڭ باشلىرىدا جەنۇبىي ئافرىقىدا زىيارەتتە بولغان جۇڭگو جامائەت خەۋپسىزلىكى مىنىستىرلىقى خىزمەت گۇرۇپپىسى 23- دېكابىر جوھانىسبۇرگتا تاراتقۇلارغا تونۇشتۇرۇپ مۇنداق دېدى: زىيارەت مەزگىلىدە خىزمەت گۇرۇپپىمىز جۇڭگو مۇھاجىرلىرى، جۇڭگولۇقلار تۇرۇشلۇق رايوننىڭ جەمئىيەت ئامانلىق ئەھۋالىنى پائال ئىگىلىدى ھەمدە جەنۇبى ئافرىقىدىكى قانۇن ئىجراسى تارماقلىرى بىلەن ھەمكارلىشىپ جەنۇبىي ئافرىقىدىكى جۇڭگو پۇقرالىرىغا زىيان يەتكۈزگەن بىر قانچە جىنايى شايكىنى پاش قىلدى.

    جۇڭگو جامائەت خەۋپسىزلىكى مىنىستىرلىقى خىزمەت گۇرۇپپىسىنىڭ باشلىقى، جۇڭگو جامائەت خەۋپسىزلىكى مىنىستىرلىقى خەلقئارا ھەمكارلىق ئىدارىسىنىڭ مۇئاۋىن باشلىقى چېڭ سەنخۇ مۇنداق دېدى: جەنۇبىي ئافرىقىدىكى جۇڭگو مۇھاجىرلىرى، جۇڭگولۇقلارنىڭ كۆپ قىسمى قانۇنغا ئەمەل قىلىدىغان ۋەتەنپەرۋەر قېرىنداشلار، ئەمما ئاز بىر قىسىم قانۇنسىز ئۇنسۇرلار خەتەرگە تەۋەككۈل قىلىپ، جۇڭگولۇق پۇقرالارغا زىيان يەتكۈزىدىغان جىنايى ھەرىكەتلەر بىلەن شۇغۇللىنىپ، جۇڭگولۇقلار مەھەللىسىنىڭ بىخەتەرلىكىگە خەۋپ يەتكۈزدى، جۇڭگو ھۆكۈمىتى بىلەن ساقچىلار جەنۇبى ئافرىقىدىكى قانۇن ئىجراسى تارماقلىرى بىلەن ئەمەلىي ھەمكارلىشىپ، ئۇنىڭغا قەتئىي زەربە بېرىدۇ.

    بۇ يىل كىرگەندىن بۇيان، جۇڭگو مۇھاجىرلىرى ۋە جۇڭگولۇقلارنى بۇلاش قاتارلىق جىنايى ھەرىكەتلەر بىر قانچە قېتىم يۈز بەردى، بىر قىسىم جۇڭگو مۇھاجىرلىرى ۋە جۇڭگولۇقلار زور ئىقتىسادىي زىيانغا ئۇچرىدى. نۆۋەتتە جەنۇبىي ئافرىقىدا تەخمىنەن 300 مىڭ جۇڭگو مۇھاجىرى ۋە جۇڭگولۇق بار.