شىزاڭدا 250 مىڭ ئادەم ساياھەت كەسپى بىلەن شۇغۇللىنىدىكەن

      مۇخبىرنىڭ شىزاڭ ئاپتونوم رايونلۇق ساياھەت ئىدارىسىدىن ئىگىلىشىچە ، كۆپ يىللىق تەرەققىيات ئارقىلىق ، شىزاڭدا ساياھەت كەسپى بىلەن قاپلانمىغان يەر قالمىغان ، كەسىپ كۆلىمى ئۈزلۈكسىز كېڭىيىۋاتقان بولۇپ ، ھازىر 250 مىڭ ئادەم ساياھەت كەسپى بىلەن شۇغۇللىنىۋىتىپتۇ.

شىزاڭ ئاپتونوم رايونلۇق ساياھەت ئىدارىسىنىڭ تونۇشتۇرىشىچە ، بۇ يىل يىل بېشىغىچە ، شىزاڭدىكى ھەرخىل ساياھەت كەسپى كارخانىلىرى 1365 كە يەتكەن . بۇنىڭ ئىچىدە ،ساياھەت كوپىراتىپى 104 كە ، يۇلتۇز دەرىجىلىك مېھمانخانىلار 194 كە ، ساياھەت ماشىنىسى شېركەتلىرى 7 گە ، ھەرقايسى ساياھەت نۇقتىلىرىدىكى ساياھەت ماشىنىلىرى 3250 كە يەتكەن . پۈتۈن كەسىپنىڭ مۇقىم مەبلىغى 15 مىليارد يۈەن بولۇپ ، ساياھەت كەسپى بىلەن شۇغۇللانغۇچىلارنىڭ سانى 247 مىڭ 800 گە يەتكەن .

ھازىر شىزاڭدا دۆلەت Ａ دەرىجىلىك ساياھەت مەنزىرە رايونى 70 تىن، ساياھەت مەنزىرە نۇقتىلىرى 300 دىن كۆپرەك ئىكەن . ساياھەتچىلەر مەنبەسىمۇ بۇرۇنقى يالغۇز چەتئەللىك مېھمانلاردىن تەرەققىي قىلىپ بۈگۈنكى دۆلەت ئىچى ، ئاپتونوم رايون ئىچى ۋە سىرتىدىكى مېھمانلارغا كېڭەيتىلگەن. شۇنىڭ بىلەن بىر ۋاقىتتا يەنە قېتىق بايرىمى ، جۇفىڭ مەدەنىيەت بايرىمى ، ئات بەيگىسى بايرىمى قاتارلىق يەرلىك پۇراققا ئىگە ، مىللىي ئۇسلۇبتىكى بايراملار ئورۇنلاشتۇرۇلۇپ ، مىللىي ساياھەتچىلىك ، ئىكولوگىيىلىك ساياھەتچىلىكنىڭ تەرەققىياتىغا ۋە ئېكسپېدىتسىيە، دالا پائالىيىتى ، تاۋاپ قىلىش قاتارلىق مەخسۇس ساياھەت تۈرلىرىگە ئاساس سېلىنغان . 2011-يىلى شىزاڭنىڭ دۆلەت ئىچى ۋە سىرتىدىن كۈتۈۋالغان ساياھەتچىلەرنىڭ سانى 8 مىليون 697 مىڭ 600 گە يېتىپ ، ساياھەتتىن قىلىنغان ئومۇمىي كىرىم 9 مىليارد 706 مىليون يۈەنگە يەتكەن .

شىزاڭ ئاپتونوم رايونلۇق ساياھەت ئىدارىسى پارتگۇرۇپپىسىنىڭ شۇجىسى يۈ يۈنگۈي مۇنداق دېدى : <12-بەش يىللىق پىلان> مەزگىلىدە ، شىزاڭ ئومۇميۈزلۈك ھالدا ساياھەتنى ھەسسىلەپ ئاشۇرۇش پىلانىنى يولغا قويىدۇ، 2015-يىلىنىڭ ئاخىرىغا بارغاندا ساياھەتچىلەر ئومۇمىي سانى 15 مىليونغا ، ساياھەتچىلىكتىن قىلغان كىرىم 18 مىليارد يۈەنگە يەتكۈزىلىدۇ .ساياھەت كەسپى بىلەن شۇغۇللانغۇچىلار سانى 300 مىڭغا يەتكۈزۈلۈپ ، ساياھەتچىلىك كەسپى مۇقىم مەبلىغى 25 مىليارد يۈەنگە يەتكۈزىلىدۇ