جۇڭگو ئاخبارات تورىنىڭ 12-ئىيۇل خەۋىرى: چەتئەل ئاخباراتلىرىنىڭ خەۋىرىگە ئاساسلانغاندا، فرانسىيە پىرىزدېنتى ساركوزىي شۇ جاي ۋاقتى 12-ئىيۇل ئافغانىستانغا يېتىپ بېرىپ، ئافغانىستاندا تۇرۇشلۇق فرانسىيە ئارمىيىسىنى يوقلىغان،  2012-يىلىنىڭ ئاخىرىدىن بۇرۇن 1000 نەپەر فرانسىيە ئەسكىرىنى چېكىندۈرۈپ بولىدىغانلىقىنى جاكارلىغان.
خەۋەرگە ئاساسلانغاندا، بۇ ساركوزىينىڭ پىرىزدېنت بولغاندىن بۇيانقى 3-قېتىم ئافغانىستاننى زىيارەت قىلىشى ئىكەن. ئۇ 2007-يىلى تۇنجى قېتىم ئافغانىستاننى زىيارەت قىلغان، 2008-يىلى 8-ئايدا 10 نەپەر فرانسىيە ئەسكىرى تالىبان بىلەن ئۇرۇشقاندا ئۆلگەندىن كېيىن، ئۇ ئىككىنچى قېتىم ئافغانىستاننى زىيارەت قىلغان.
ساركوزىي ئافغانىستان پايتەختى كابۇلغا يېتىپ كەلگەندىن كېيىن، ئافغانىستاننىڭ ئوتتۇرا قىسىمىدىكى كاپىسا ئۆلكىسىدىكى بىر گازارمىغا دەرھال ئاتلىنىپ، ئۇ يەردىكى فرانسىيە ئارمىيىسىنىڭ ئوفىتسېر-ئەسكەرلىرىنى يوقلىغان. ساركوزىي ئەسكەرلەرنى يوقلىغاندا، «ئۇرۇشنى ئاخىرلاشتۇرۇش زۆرۈر»، «قوشۇنلار ئافغانىستاندا مەڭگۈ تۇرۇپ قالمايدۇ» دېگەن.
ساركوزىي يەنە:«2012-يىلىنىڭ ئاخىرىغا بارغاندا، بىز تۆتتىن بىر قىسىم ئەسكەرنى، تەخمىنەن 1000 نەپەر ئەسكەرنى چېكىندۈرۈپ كېتىمىز»دېگەن.
فرانسىيەنىڭ نۆۋەتتە 4000 نەپەر ئەسكىرى ئافغانىستاندا تۇرۇۋاتقان بولۇپ، كۆپ قىسىمى پايتەخت كابۇلنىڭ شىمالىي قىسىمىدىكى ساروبى رايونى ۋە كاپىسا ئۆلكىسىنىڭ شەرقىي شىمالىدا تۇرىۋاتىدۇ.