شىنخۇا ئاگېنتلىقى، ب د ت، 12 – يانۋار تېلېگراممىسى. ھايتىدا يەر تەۋرىگىنىگە بىر يىل بولغان پەيتتە، ب د ت خەۋپسىزلىك كېڭىشى 12 – يانۋار ئاخبارات ۋاسىتىلىرىگە بايانات ئېلان قىلىپ، ھايتىدىكى يەر تەۋرەشتە قازا قىلغانلارغا تەزىيە بىلدۈردى ھەم خەلقئارا جەمئىيەتنى ھايتىنىڭ قايتا قۇرۇش ئىشلىرىغا ياردەم بېرىش ۋەدىسىنى تېزرەك ئەمەلىيلەشتۈرۈشكە دەۋەت قىلدى.
   باياناتتا مۇنداق دېيىلدى: خەۋپسىزلىك كېڭىشى قازا قىلغۇچىلارنىڭ ئائىلە تاۋابىئاتلىرىدىن ھال سورايدۇ ھەم بۇ تىراگېدىيە تۈپەيلى تۇرمۇشى ئۆزگىرىپ كەتكەن كىشىلەرگە چوڭقۇر ھېسداشلىق قىلىدۇ. خەۋپسىزلىك كېڭىشى ب د ت نىڭ ھايتىنىڭ مۇقىملىقىنى ساقلاشقا ئەۋەتكەن خاس ۋەكىللەر ئۆمىكىدىكى يەر تەۋرەشتە بەختسىزلىككە ئۇچرىغان 102 خىزمەتچىنى چوڭقۇر ياد ئېتىدۇ، شۇنداقلا ب د ت نىڭ ھايتىغا ئەۋەتكەن خاس ۋەكىللەر ئۆمىكىنىڭ خىزمىتىگە ھەم ئۇلارنىڭ ھايتى خەلقىنىڭ يۇرت – ماكانىنى قايتا قۇرۇشىغا ياردەم بېرىش جەھەتتىكى تىرىشچانلىقىغا پۈتۈن كۈچى بىلەن مەدەت بېرىدۇ.
   باياناتتا مۇنداق دېيىلدى: خەۋپسىزلىك كېڭىشىگە ئەزا دۆلەتلەر ھايتى ھۆكۈمىتى ۋە خەلقىنىڭ قايتا قۇرۇش خىزمىتىنى داۋاملىق قوللايدۇ ھەم ھايتىغا داۋاملىق ياردەم بېرىدىغانلىقىنى تەكىتلەيدۇ.