شىنخۇا ئاگېنتلىقى، قاھىرە، 12 – يانۋار تېلېگراممىسى. ئەرەب ئەللىرى ئىتتىپاقىنىڭ باش كاتىپى مۇسا 12 – يانۋار بايانات ئېلان قىلىپ لىۋاننىڭ ھازىرقى ۋەزىيىتىدىن ئەپسۇسلاندى ھەم لىۋان سىياسىي رەھبەرلىرىنىڭ سوغۇققان بولۇپ، دۆلەت مەنپەئەتىنى قوغدىشىنى مۇراجىئەت قىلدى.
   مۇسا باياناتىدا مۇنداق دېدى: لىۋاندىكى ھەرقايسى مەزھەپلەرنىڭ رەھبەرلىرى مىللىي مەنپەئەتنى مۇھىم بىلىپ، سۆزلىشىش يولىنىڭ راۋانلىقىنى ساقلاپ، ھازىرقى ۋەزىيەتنى ئەقىل – پاراسەتكە ۋە ئاساسىي قانۇنغا تايىنىپ بىر تەرەپ قىلىشى كېرەك.
   ئۇ لىۋان زۇڭتۇڭىنىڭ كېيىنكى باسقۇچتىكى مەسئۇلىيەتنى زىممىسىگە ئېلىپ، مىللىي ئىتتىپاقلىقنى قوغدايدىغانلىقىغا ئىشىنىدىغانلىقىنى بىلدۈردى.
   لىۋان ئىچكى كابىنېتىنىڭ 11 ئەزاسى 12 – يانۋار كەچتە ئىستېپا بەرگەنلىكىنى جاكارلىدى. ئىستېپا بەرگەن كابىنېت ئەزالىرىنىڭ ۋەكىلى، لىۋان ئېنېرگىيە ۋە سۇ بايلىقى مىنىستىرى جىبران بەشىر ئىستېپانامىسىدە: بىزنىڭ ئىستېپا بېرىشىمىزگە سەۋەب بولغان ئامىل لىۋان زۇڭلىسى سائاد ھەرىرى رەھبەرلىكىدىكى ‹‹14 – مارت›› ئىتتىپاقىنىڭ خەلقئارا سوت مەسىلىسىدە ئامېرىكىنىڭ بېسىمىغا تىز پۈكۈپ، سەئۇدى ئەرەبىستان ۋە سۈرىيەنىڭ لىۋان كىرىزىسىنى ھەل قىلىش ئۈچۈن كۆرسەتكەن تىرىشچانلىقىنىڭ مەغلۇپ بولۇشىغا سەۋەب بولغانلىقىدۇر، دېدى