بەيگە مەيدانى — ئېكولوگىيەلىك مۇھىتنى قوغداپ ، شەھەر ئىقتىدارىنى مۇكەممەللەشتۈرۈپ ، خەلق ئاممىسىنىڭ ماددىي مەدەنىيەت ئېھتىياجىنى قاندۇرىدىغان بىر تۈرلۈك ئۇنىۋېرسال خەلق تەنھەرىكەت قۇرۇلۇشى .

   بورتالا بەيگە مەيدانى نۆۋەتتە شىنجاڭدىكى ئەڭ چوڭ بەيگە مەيدانى بولۇپ ، ئات بەيگىسى، يېنىك ئاتلېتىكا، پۇتبول ، قارىغا ئېتىش ، ئوقيا ئېتىش ، چېلىشىش، قوچقار سوقۇشتۇرۇش ، توخۇ سوقۇشتۇرۇش، ئەدەبىيات–سەنئەت نومۇرلىرىنى ئورۇنداش قاتارلىق نۇرغۇنلىغان ئىقتىدارلار بىر گەۋدىلەشتۈرۈلگەن ئۇنىۋېرسال مەدەنىيەت–تەنتەربىيە كۆڭۈل ئېچىش سورۇنىدۇر.

   ئۇنىڭ پىلاندا ئىگىلىگەن يەر كۆلىمى 420 نەچچە مو بولۇپ ، 20 مىڭدىن ئارتۇق تاماشىبىننى سىغدۇرالايدۇ . جەمئىي 10 مىليون يۈەن مەبلەغ سېلىش مۆلچەرلەنگەن بولۇپ ، 2002–يىلى قۇرۇلۇش باشلىنىپ ، ئالدىنقى قارارلىق قۇرۇلۇشىغا 6 مىليون 500 مىڭ يۈەن مەبلەغ سېلىنىپ ، بەيگە يولى، مۇسابىقە مەيدانى ، شىمالىي كۆرۈش سۇپىسى ۋە شۇلارغا قاراشلىق ئەسلىھەلەر قاتارلىق ئاساسىي گەۋدە قۇرۇلۇشى تاماملانغان . 2003–يىلى يەنە 3 مىليون 500 مىڭ يۈەن مەبلەغ سېلىنىپ ، داۋاملىق قۇرۇلۇش ئېلىپ بېرىلغان .

   بەيگە مەيدانى قۇرۇلۇشى بىلەن ، ھەر يىلى سايرام كۆلى بويىدا ئۆتكۈزۈلىدىغان نادام چوڭ يىغىلىشى بۇ جايغا كۆچۈرۈپ كېلىنىپ ، سايرام كۆلى بويىنىڭ ئېكولوگىيەلىك مۇھىتى ئۈنۈملۈك قوغدىلىپلا قالماي، يەنە تېخىمۇ كۆپ ئاممىنىڭ نادام چوڭ يىغىلىشىغا قاتنىشىشى قولايلاشتى ، رايون ئىچى ۋە سىرتىدىكى تېخىمۇ كۆپ ساياھەتچى بۇ جايغا ساياھەت ، سودا قىلغىلى كېلىشكە جەلپ قىلىنىپ ، ئىككىنچى ، ئۈچىنچى كەسىپ ۋە يەر قوشۇلما قىممىتىنىڭ ئېشىشىغا تۈرتكە بولۇپ ، بورتالا رايونى ئىقتىسادىنىڭ تەرەققىياتى ئىلگىرى سۈرۈلدى