جۇڭگو ئۇيغۇرچە رادىيو تورى 18-سېنتەبىر خەۋىرى:

روسىيە دىپلوماتىيە مىنىستىرلىقى تۈنۈگۈن بايانات ئېلان قىلىپ، ئامېرىكا ۋە شىمالىي ئاتلانتىك ئەھدى تەشكىلاتىنىڭ ياۋروپا باشقۇرىلىدىغان بومبىغا قارشى تۇرۇش سېستىمىسىنى ئورۇنلاشتۇرۇشنى پىلان بويىچە تىزلەتكەنلىكىدىن ئەندىشە قىلغانلىقىنى بىلدۈردى.

يېقىندا ئامېرىكا ۋە شىمالىي ئاتلانتىك ئەھدى تەشكىلاتى رۇمىنىيە، تۈركىيە ۋە پولشادا ئارقا-ئارقىدىن باشقۇرۇلىدىغان بومبىغا قارشى تۇرۇش سېستىمىسىنى ئورۇنلاشتۇرۇشنى قارار قىلغان.

روسىيە دىپلوماتىيە مىنىستىرلىقى مۇنداق دېدى: روسىيە ئامېرىكا ۋە شىمالىي ئاتلانتىك ئەھدى تەشكىلاتىنىڭ ياۋروپادا ئورۇنلاشتۇرغان باشقۇرىلىدىغان بومبىغا قارشى توسۇش قۇرۇلمىسىنىڭ روسىيەنىڭ ئىستىراتېگىيەلىك يادرولۇق كۈچىگە قارىتىلمىغانلىقى توغرىسىدىكى كاپالىتىگە جىددىي ئېھتىياجلىق. ئىككى تەرەپ روسىيە-شىمالىي ئاتلانتىك ئەھدى تەشكىلاتى كېڭىشى رامكىسىدا ياۋروپا باشقۇرىلىدىغان بومبىغا قارشى تۇرۇش سېستىمىسىنىڭ قۇرۇلمىسى شۇنىڭدەك بۇ سېستىمىنى ئورۇنلاشتۇرۇش پىرىنسىپىغا ئۈنۈملۈك ۋە ئېنىق قارار چىقىرىشى كېرەك.