بۇ يىل 2-ماي بىن لادېننىڭ ئۆلۈمىدىن كېيىن ئەلقائىدىنىڭ رەھبەرلىك ئورنىغا چىققان مىسىرلىق ئەيمان ئەل زاۋاھىرىنىڭ سۆزلىرى ئېلىنغان بۇ ۋىدېئونىڭ ئىسمى "غەلىبىنىڭ سۈبھى نۇرى" بولۇپ، 12-سىنتەبىر كۈنى تالىباننىڭ كونتروللىقىدا دەپ قارالغان بىر تور بەتتە ئېلان قىلىنغان. ۋىدېئودا يەنە بىن لادېننىڭ بۇرۇن ئاشكارىلانمىغان بەزى كۆرۈنۈشلىرىگىمۇ ئورۇن بېرىلگەن.

62 مىنۇتلۇق بۇ ۋىدېئودا زاۋاھىرى ئاساسەن ئەرەب ئىنقىلابى ۋە ئوتتۇرا شەرقنى قاپلىغان قارشىلىق دولقۇنى ھەققىدە توختالغان. ئۇ 11-سىنتەبىر ۋەقەسى ئەمەلىيەتتە ھازىرقى ئەرەب ئىنقىلابىنىڭ پىلتىسى دېگەن. مىسىر، لىۋىيە ۋە تۇنىستىكى ھاكىمىيەت ئالمىشىشلارنى ئىسلامنىڭ ۋە ئەلقائىدىنىڭ غەلىبىسى دەپ ئاتىغان. ئۇ يەنە سەئۇدى ئەرەبىستانى خان جەمەتى ۋە باشقا بىر قىسىم غەربپەرەس ئەرەب ھۆكۈمەتلىرىنى تەنقىد قىلغان. (Hechkim)