جۇڭگو ئۇيغۇرچە رادىيو تورى 3-سىنتەبىر بېيجىڭ خەۋىرى:

تۈنۈگۈن تاجىكىستان پىرېزىدېنتى راخمان، رۇسىيە پىرېزىدېنتى مېدۋېدېۋ، پاكىستان پىرېزىدېنتى زەردارى ۋە ئافغانىستان پىرېزىدېنتى كارزايى تاجىكىستاننىڭ پايتەختى دۈشەنبىدە يىغىن ئىچىپ، رايون بىخەتەرلىكىنى كۈچەيتىش، تېررورلۇققا قارشى تۇرۇش، زەھەر چەكلەش ۋە سودا قاتارلىق ساھەلەردىكى ھەمكارلىق مەسىلىسى توغرىسىدا مۇزاكىرىلەشتى. تۆت دۆلەت پىرېزىدېنتى يىغىن ئاخىرلاشقاندىن كېيىن ئىمزا قويغان بىرلەشمە باياناتتا مۇنداق دېيىلدى: تاجىكىستان، رۇسىيە، پاكىستان، ئافغانىستان تۆت دۆلەت ئافغانىستان مەسىلىسى، تېررورلۇققا قارشى تۇرۇش، تېررورچىلىققا زەربە بېرىش، زەھەر چەكلەش ۋە تەشكىللىك جىنايەت ئۆتكۈزۈشكە زەربە بېرىش قاتارلىق ساھەلەردىكى ھەمكارلىققا ئەھمىيەت بىرىدۇ.

يىغىن قاتناشچىلىرى مۇنداق دەپ قارىدى: تۆت دۆلەت ئۆز ئارا، شۇنداقلا، رايون تەشكىلاتى ۋە خەلقئارا تەشكىلاتلار بىلەن ھەمكارلىشىپ، زەھەر ئەتكەسچىلىكى ۋە زەھەرلىك چېكىملىك چېكىش قىلمىشىغا زەربە بېرىشى زۆرۈر؛ شاڭخەي ھەمكارلىق تەشكىلاتى ۋە مۇستەقىل دۆلەتلەر بىرلەشمىسى بىخەتەرلىك شەرتنامىسى تەشكىلاتى بىلەن ھەمكارلىشىپ، تېررورچىلىققا، ئېكسترىمىزمغا ۋە چېگرا ھالقىغان جىنايى ھەرىكەتلەرگە زەربە بېرىشى زۆرۈر.