ساختا دۇنيا ئاپتورى : جەمىلە بارات كۈلۈپ قاراۋاتقان قۇياشنىڭ ئاداققى نۇرلىرى يۈزلىرىمنى سۆيەلمىدى،ئاخشامنى تۇيغۇلارنىڭ كۆيۈپ كېتىۋاتقان ئاددىي تىۋىشلىرى يۈرىكىمنى چېكىپ كۆكسۈمگە نەقىش قىلىشقا باشلىغان كۆلەڭگۈسى سېنىڭ تۇيغۇللىرىڭنىڭ تىنىقلىرىنى بوي سۇندۇرالارمۇ؟ بىلمەيسەن سەن بىلەلمەيسەن ھەم بىلىشكىمۇ قادىر بولالمايسەن .مەن كېتىمەن ،كېتىپ قالىمەن .ئۇيقۇسىز بولۇپ قالغان قىزنىڭ كۆزلىرىدىكى ياش تامچىللىرىغا ھەمراھ بولغان چۈشلىرىڭنىڭ تەشۋىسى سېنى بىئارام قىلمايدۇ.قەستەنلىكتىن يوقالمىغان سۆيگۈ بىخلىرى سېنى مەھكۈملۇق ئالىمىگە ئەمەس بەلكى،گۈزەللىك ئالىمىنىڭ شاھزادىسىگە ئايلاندۇرسۇمۇ؟ئازاپلىق كۈيلەرنىڭ يۈرەكنى زىدە قىلغۇچى قاتتىللىق مۇڭلىرى روھىڭنى قامال قىلىپ ،كۆزلەردىن ياش ئاققۇزغاندا ،ئۈمىتسىز سۆيگۈنىڭ ياسالما كۈلكىسى ھىجران بىلەن تولغۇنىۋاتقاندا كەملەپ كېتىۋاتقان ئازاپ دەقىقىللىرى قار قاپلىغان بىخۇت شەھەرنىڭ تىنىچسىز قوينىغا چۆكۈپ كەتتى. ئۆزگۈرىۋاتقان پەسىلنىڭ ئۆزگەرمەس قانۇنىيىتى ،ئىسكۇرۇپكا كۈيلىرىنىڭ سېھىرلىك مۇڭلىرى ئەۋجىدە كۆزى يۇمۇلغان ئۈمىت ئىگىسىنى ئۆزى بىلگەن سەنەمگە دەسسىتىپ،چۈشكۈنلەشكەن ،بېشى تۆۋەن مەغلۇبىيەتچىگە روھىيەت سۆيگۈسىنىڭ ئازاپلىق ھىكايىسىنى ھىكايە قىلىپ بېرىۋاتقاندا ،دۇنيادىن ئۈمىت ئۈزۈپ ،ئىشەنچسىزلەر توپىغا قوشۇلۇپ كەتكەن ياش يىگىتنىڭ يۈرەك چوڭقۇرلىرىدىكى خىلۋەتلىرىدە سايىداۋاتقان ئىشەنچسىز مۇھەببەت يىگىتنىڭ جىىمغۇرلۇق ئارلاشقان ئىپادىسىزلىكى بىلەن گىرەلىشىپ كەتكەن ئىدى. چارچاشتىن ئاۋازى بوغۇلۇپ كەتكەن كاشىلىسى جىق كومپىيوتېرخانىغا يالغۇز كىرىپ كېلىۋاتقان ئاياق تىۋىشلىرىدىن ھەيران قالمىغان تازلىق ئىشچىسى ئاياللنىڭ پوللارنى سۈرتىۋاتقاندىكى ئالدىرماسلىقى خىيالىمنى بۆلىۋېتەلمەي ئالدىنقى كۈنى يۈزەكى كۆرگەن س د ماكىس سېستىمىسىنىڭ يېڭى تۇيغۇللىرى يۈرىكىمنى ئېغىتىۋەتتى. تاڭ سۈزۈلگىلى نەۋاخ؟تېخىچە ئېرىنچەكلىك قىلىپ،ئۇيقۇسىدىن ئويغۇنالمايۋاتقان قۇياشنىڭ نۇرلىرىغا تەشنا بولىۋاتقان كائىناتنىڭ غەمخانە تۇيغۇللىرى پەرىشانلارنىڭ دەردىگە دەرت قوشۇپ،غاپىللارغا پەرۋاسىزلىق خىيالىنىنىڭ ئاچقۇچىنى قولىغا تۇتقۇزماقتا ئىدى. مەن كېتىمەن.ئېغىر بىلىنىۋاتقان مەدەنىياتلىك پاسكىنا شەھەردىن كېتىمەن.غەمخانە ،پەرۋاسىزلارنى،دەرتمەنلەرنى،ئاشىقلارنى ،ئۈمىتسىز ،نادان،ئاقىللارنى ...تاشلاپ كېتىمەن.مەن كېتىۋتقان دەقىقىلەردە سەن يەنىلا ئاشۇ پەرۋاسىزلىقىڭ بىلەن ھەممىگە قادىرلىقىڭنى نامايەن قىلىپ ،مىليارد خىل ئۇسۇلدا سېنىڭ سەھنەڭدە رول ئېلىۋاتقان ئارتىسلىرىڭنىڭ رەڭگا-رەڭ نومۇرلىرىدىن ھوزۇرلىنىپ بېلىڭنى تۇتقىنىڭچە ،بېشىڭنى تىك تۇتۇپ،گەۋدەڭنى راۋۇرۇس رۇسلاپ ،گاھ قولۇڭنى شىلتىپ ،گاھ ئۇھسىنساڭمۇ يەنىلا يىگانە قالمايسەن.ئەي !پەرۋاسىز شەھەر ،مەن كېتىۋاتقان ئاشۇ دەقىقىلەردە ئەزەلدىن مېنى ئەسكە ئېلىپ باقمىغان ئاشۇ كىشىلەرگە ئوخشاشلا سەنمۇ مېنى بىر دەمدىلا ئۇنتۇپ كېتىسەن.يەنە شۇ دەقىقىلەردە خوتەن بىلەن چەتئەلگە ساياھەت قىلىش سەپىرىگە ھەمراھ قىلماقچى بولغان ئاشىقىمنىڭ مېنىڭ سەھەردىكى ئۇيقۇسىز كۆزلىرىمنىڭ ئەسرارى بولغان سېغىنىش تۇيغۇللىرىنى چىرماپ ،كۆتۈرۈلىۋاتقان بۇلۇتلۇق كۆز يەتكۈسىز ئالەمنىڭ تۈرمەل-تۈرمەل بۇلۇتلىرىمۇ سۈرۈپ كېتەلمەيۋاتقان چىرماش تۇيغۇللىرىمنى ئەسلا يوق قىلىۋېتەلمىدى. تۇرۇپلا، كەتمە! دەيتى قانداقتۇر ئاسىي بىر تۇيغۇللىرىم يەنە ئۆز-ئۆزۈمگە؟ مەن كېتىشتىن ئاۋال سېنىڭ ساختا كۈلكە يوشۇرۇنغان مىسكىن چىرايىڭنى ئەبەدىي كۆڭۈل خانەمدىكى ئىزلىرىنى پاك-پاكىز ئۆچۈرۈپ تاشلاپ كېتىمەن .خەير -خوش ساختا دۇنيا ! خەير- خوش ئازغۇن تۇيغۇللىرىم!!...  ئەسەر ھەققىدە: بۇ ئەسەر خاراكتىر جەھەتتىن نەسىر بولۇپ ،ئاپتورنىڭ رىيال دۇنيا بىلەن چەمبەرچاس باغلانغان تۇرمۇش ،چۈشەنچىسى ئۆزگە شەھەردە قىسقىغىنە ۋاقىت كومپىيوتېر بىلىملىرىنى ئۆگىنىش جەريانىدىكى ئۆگىچە ھېسلىرى ، ئەقىلغە سىغدۇرۇپ بولمايدىغان كۆز ئالدىدىكى رەڭگا-رەڭ تۇرمۇش كارتېنىللىرى ئازاپ بىلەن بەختنىڭ يانمۇ -يان ھەمراھلىقى، دۇنيا ئىشلىرىنىڭ ئۆز رېتىمى بىلەن مېڭىش قانۇنىيىتى قىسقىچە مەزمۇن بىلەن ئىپادىلەنگەن. لىرىكا خاتىرلىرىدىن (تەھرىرلىگۈچى:admin ئەسەر ئورتاقلاشقاندا مەنبەنى ئۇنۇتماڭ.) |
