غۇلجىدىن يۇمۇر ئېلىپ كەلدىم
بىر كۈنى ھېسامكامنىڭ ئايالى زىمىنىخان ھەدەم بىر قاتار چايغا بېرىپ، تۇيۇقسىز بىر ئىش ئېسىگە كېلىپ چايدىكىلەرگە:
_ مەن ئۆيگە بىر بېرىپ كېلەي،_ دەپتۇ.
_ نېمىشقا؟ نېمە بولدى؟_ دەپ سوراپتۇ باشقىلار.
- مەن بىر بېرىپ كەلمىسەم بولمايدۇ،_دەپتۇ ۋە ئۆيىگە قاراپ مېڭىپتۇ.
زىمىنىخان ھەدەم ئۆيىگە كېلىپ، ئىشىكنى چېكىپتۇ، ھېسامكام ئۇخلاپ قاپتىكەن.
_ مەن زىمىنىخان.
_ نېمە بولدى؟ قايتىپ كەپسەنغۇ بىردەمدىلا.
_ سىز ئۇخلاپ قالغان بولسىڭىز، توكنى ئۆچۈرمىسە، توك پۇلى جىق چىقىپ كېتەمدىكىن، دەپ قايتىپ كەلدىم.
_ ۋاي مەن توكنى نەۋاق ئۆچۈرۈپ بولدۇم، نېمىشقا ئارتۇق يول ماڭىسەن؟ كالاچنى ئۇپرىتىپ،_ دەپتۇ ھېسامكام.
**************************
داۋاملىق ھاراق ئىچىپ مەست يۈرۈيدىغان بىر بالا بىر كۈنى يولدا ھېسامكامغا ئۇچراپ قاپتۇ.
_ ھېسامكا، ماۋۇ ئىشتىنىم يارىشىپتىمۇ؟ يېڭى ئالغان،_ دەپتۇ.
_ بەك يارىشىپتۇ، بولدى، بۇنىڭدىن كېيىن مۇشۇنداق يۈرگىن،_دەپتۇ ھېسامكام.
_ ھېسامكا،بۇ ئىشتاننى نەچچىگە ئالدىم؟ دەپ باققىنە.
_ سېنىڭ ئىشتىنىڭنىڭ نەچچە پۇللىقىنى مەن نەدىن بىلىمەن ؟
_ 120 سومغا ئالدىم.
_ ۋايجان، ئۆزۈڭدىن قىممەت ئىشتان ئېلىۋاپسەن،_ دەپتۇ ھېسامكام.
***********************
ھېسامكام ئايالى زىمىنىخان ھەدەم بىلەن بىلەن ئۈرۈمچىدە بازار ئايلىنىۋېتىپ، ئۆزىگە بىرشىلەپىنى كۆرۈۋاتقاندا، زىمىنىخان ھەدەم بىر پوپايكىنى كۆرۈپ، ھېسامكامنىڭ سول تەرىپىگە كېلىپ:
_ ھېسام، ئاۋۇ پوپايكىنى ئالاي دېگەنىدىم، 50 سوم دەيدۇ،_ دەپتىكەن، ھېسامكام:
_ مېنىڭ سول قۇلىقىم ئېغىر،بولدى، ماڭا چىقىپ كېتىمىز،_دەپتۇ.
يەنە بىر دۇكانغا كىرىپ، باشقا شىلەپىلەرنى كۆرۈۋاتقاندا، زىمىنىخان ھەدەم بىر كۆينەكنى كۆرۈپ، ھېسامكامنىڭ ئوڭ تەرىپىگە كېلىپ:
_ ھېسام، ئاۋۇ كۆينەكنى 500 سوم دەيدۇ، تالاشساق چۈشۈرۈپ بېرىدىغان ئوخشايدۇ،_ دەپتىكەن، ھېسامكام:
_ ۋاي بولدى، سول تەرىپىمگە ئۆتكىنە،_ دەپتۇ.