1.سەن ئۆلۈم ناخشىسىنى ئېيتساڭ،مەن ھاياتلىق كۈلكىسىنى جاراڭلىتىمەن .
سەن ھايات جىلۋىسىدىن زارلانساڭ،مەن زارلىرىڭدىن ئۆلۈمنىڭ سايىسىنى كۆرىمەن .


2.سەن دەريا بويىدىكى چىملىقتا ئولتۇرۇپ،مۇھەببەت ناخشىسىنى ئېيتساڭ،
مەن دەريادا ئويناقلاپ ئېقىپ ،ناخشاڭغا تەڭكەش بولدۇم،گۈللەر بىزنى تەبرىكلەپ چاۋاك چالدى.


3. مۇھەببەت رىشتىمنى ئىسكىرىپكامنىڭ تارى قىلىپ تۈن بويى قولاق تۈۋىڭدە ناخشا ئېيتتىم.
سەن سەھەردە پورەكلىدىڭ ، دىمىقىمغا پۈركىگەن ھىدتا ئۇخلاپ قالدىم.....


4.ناخشىلىرىم قىپيالىڭاچ بالىدەك يۈگرۈپ گۈلزارلىقىڭغا كىرىپ كەتتى.گۈللىرىڭ خۇشاللىقتىن ئۇسسۇل ئويناپ،
مىنى ياخشى كۆرىدىغانلىقىڭنى  ئاشكارلاپ قويدى .


5.شېئىرلىرىم كىپىنەكلەر تەقدىم قىلغان رەڭدار تونىنى يېپىنچاقلاپ ئالەمنىڭ
بۇلۇڭ - پۇچقاقلىرىدا كېزىپ يۈرىدۇ.


6.بىز بەختنىڭ مەڭزىمىزگە سۆيىشىدىن رازى بولمايمىز.
بەخت بىزدىن بىزار بولغاندا،بىز ئۇنى ئىزدەپ زارلىنىمىز.


7.شامال كۆرۈنمەس قوللىرى بىلەن شاملارنى ئۆچۈرىۋېتىدىغاندەك ،سۆيگۈمۇ كۆرۈنمەس
يىپلىرى بىلەن يۈرەكلەرنى باغلاپ تۇرالايدۇ.


8.سۈكۈت بىر خىل تەبەسسۇم،ئۇ ئۆزىگە نۇرغۇن گۈزەللىكنى يوشۇرغان.


9.چەكسىز دالىدا تۇرۇپ ناخشا ئېيتقانىدىم ، تاغلار ماڭا ئىللىق كۈلۈپ سالام بەردى.
ئۆيۈمدە تۇرۇپ ناخشا ئېيتىۋىدىم،تاملار  غەزەبتىن تاتىرىپ كەتتى.


10.قەلبىم سۆيگۈ ھەققىدە يېزىلغان گۈزەل لىرىكىلار توپلىمى،ئۇنى پەقەت ياشلىق
گۈلىنى ماڭا تەقدىم قىلغان ئۆزۈڭلا ۋاراقلاشقا ھوقۇقلۇقسەن.........


11.كۈزدىكى سارغايغان ئۈجمە يۇپۇرماقلىرى قەلبىمدىكى ئازابلارنى ئېلىپ يەرگە
چۈشۈپ كەتتى .مەن تەڭرىنىڭ بۇ شاپائىتىدىن بەكمۇ ئازابلاندىم .


12.بىز بۈك-باراقسان  شاپتۇلزارلىقتا قوغلىشىپ ئوينىغاندا ، سېنىڭ رۇخسارىڭنى تۇنجى رەت كۆرگەنىدىم.
ئۆلۈم رەھىمسىز تامغىنى پىشانەمگە باسقاندا، سېنىڭ روخسارىڭنى يەنە كۆز ئالدىمغا كۆلتۈردۈم -دە ،
ھاياتىمدىن رازى بولۇپ كۈلۈپ قويدۇم .


13.كۆلنىڭ ئۇ يېقىدا ئولتۇرۇپ مۇڭلۇق ناخشا ئېيتقىنىڭدا سۆيگۈ قارمىقىڭنى ماڭا تاشلىشىڭنى كۈتۈپ
ساڭا ئۇزاق تەلمۈردۈم. ئەپسۇسكى،سەن ئالدىڭدا ئۈزۈپ يۈرگەن دەردمەن  بېلىقنىڭ مېنىڭ جىسمىم
ئىكەنلىكىنى بىلمەيتتىڭ.



     مەنبە- دوستۇمنىڭ خاتىرىسى