غۇلجا  شەھەر  <<سىتالىن>> ئوتتۇرا مەكتىپى  1949- يىلى  10-  ئايدا  قۇرۇلغان، غۇلجا  شەھەر سىتالىن  كوچا 51- نومۇرلۇق قورۇغا  جايلاشقان. 1949- يىلى 10- ئايدىن 1958- يىلىغىچە  سابىق  سوۋېت  ئىتتىپاقىنىڭ  ئىلىدا  تۇرۇشلۇق  كونسۇلخانىسىنىڭ باشقۇرۇشىدا  بولغان، بۇ  مەزگىلدە  بارلىق  دەرسلىكلەر  سوۋېت  ئىتتىپاقىدىن  كىرگۈزۈلگەن ،  دەرسلەر  پۈتۈنلەي  روسچە  ئۆتۈلگەن، بارلىق  ئوقۇ - ئوقۇتۇش خىزمەتلىرى  سابىق سوۋېت  ئىتتىپاقى مائارىپىنىڭ  قېلىپى  بويىچە  ئېلىپ  بېرىلغان. 1962- يىلى مەكتەپنى يەرلىك  ھۆكۈمەت  ئۆتكۈزۈۋالغاندىن  كېيىن ، باشقا  مەكتەپلەر  ئاساسىدا  قايتا  تەشكىللەش  ئارقىلىق  ھازىرقى  غۇلجا  شەھەر  7- ئوتتۇرا  مەكتەپ  قۇرۇپ  چىقىلغان.  نۆۋەتتە  بۇ  مەكتەپ  ئىلى  ئوبلاستى  تەۋەسىدىكى  ئۇيغۇر  تىلىدا  ئوقۇتۇش  ئېلىپ  بارىدىغان   تولۇق  مەكتەپ  ھېساپلىنىدۇ.  غۇلجا  شەھەر 7- ئوتتۇرا  مەكتەپنىڭ  ئۇيغۇر  مائارىپ  ئىشلىرىدا  باشلامچىلىق  رول ئوينىيالىشىنىڭ مۇھىم  بىر  سەۋەبى  مېنىڭچە 7 - ئوتتۇرا  مەكتەپنىڭ  دەسلەپكى قۇرغۇچىلىرى  ئىلى  يېقىنقى  زامان  مائارىپىنىڭ  جەۋھەرلىرىدىن كەلگەنلىكى  بىلەن  مۇناسىۋەتلىك  بولغان،  مىللى  ئىنقىلاپ  ۋە  ئۇنىڭدىن  ئىلگىرى غۇلجىدا  قۇرۇلغان  ئىلى  ئوغۇللار  گىمنازىيىسى (ھازىرقى غۇلجا 8- ئوتتۇرا مەكتەپ)، ئىلى  قىزلار  گىمنازىيىسى  ( ئەسلىدىكى غۇلجا 6- ئوتتۇرا ھازىرقى ئورنىدا  توك  تەمىنلەش شىركىتى بار ) ئىلى  ھۈنەر - كەسپ  مەكتىپى  ( ئەسلىدىكى غۇلجا  3- ئوتتۇرا  مەكتەپ ، ھازىرقى ئورنىدا  غۇلجا  تېخنىكا  تەربىيەلەش مەركىزى بار )  قاتارلىق  مەرىپەت  ئوچاقلىرىدا  مەرىپەت  يالقۇنلىرى  يالقۇنلىغان،  ئۇلارنىڭ  نۇرى  ئىلىنى  مەركەز  قىلغان  ھالدا  پۈتكۈل  شىنجاڭنى نۇرلاندۇرغان  ئىدى. يۇقۇرىقى  مەكتەپلەر  مەدەنىيەت  زور  ئىنقىلابىنىڭ  ئالدى - كەينىدىكى  بىر  قانچە  قېتىملىق ئۆزگەرتىشلەر  جەريانىدا  خېلى كۆپ ساندىكى  ئوقۇتقۇچىلىرى غۇلجا شەھەر 7- ئوتتۇرا  مەكتەپنى  تەسىس قىلىشتىكى ئاساسى  كۈچكە ئايلانغان.  غۇلجا  شەھەر 7- ئوتتۇرا  مەكتەپنىڭ  ئوقۇغۇچىلىرى  پۇتۈن  ئاپتۇنۇم  رايونىمىزغا،  دۇنيانىڭ  ھەرقايسى جايلىرىغا تارالغان، ئۇلار  ئۆز  ئانا مەكتىپىدىن  پەخىرلىنىدۇ،  جۇملىدىن مەنمۇ  شۇ . بۇ  يىل  9- ئايدا  ئانا  مەكتىپىمىزنىڭ 60  يىللىق  مەرىكىسى  ئۆتكۈزىلىدۇ،  شۇ  مۇناسىۋەت  بىلەن مەكتىپىمگە  تېخىمۇ  شانلىق  نەتىجىلەرنىڭ  نېسپ  بولۇشىنى  تىلەيمەن!
7- ئوتتۇرا مەكتەپكە  ئائىت  بىر  قىسىم  تارىخىي سۈرەتلەر  ۋە  چۈشەندۈرۈشلەر .

1949- يىلدىن ئىلگىرى سىتالىن ئوتتۇرا مەكتىپى روس مەكتەپ دەپ ئاتالغان، تۆۋەندىكىسى دەل شۇ روس مەكتىپىدىكى ئوقۇتقۇچى - ئوقۇغۇچىلارنىڭ 1948- يىلى چۈشكەن سۈرىتى .
 

1963- يىلدىكى غۇلجا شەھەر 7- ئوتتۇرا مەكتەپ، كەينىدە كۆرۈنۈپ تۇرغىنى 1949- يىلدىكى روس پاسۇندا سېلىنغان ئىككى قەۋەتلىك ئوقۇتۇش بىناسى، بىنا ئالدىدىكى ھەيكەل سىتالىننىڭ ھەيكىلى، بۇ مەكتەپنى تا ھازىرغىچە بەزىلەر سىتالىن مەكتەپ ئاتايدۇ. بۇ بىنا بىلەن ھەيكەل 1995- يىللىرى ئەتراپىدا مەكتەپ قۇرۇلۇشىنى ئۆزگەرتىش جەريانىدا چېقىۋېتىلدى.