ئاقيول تورىنىڭ خەۋىرى:
15يىلنىڭ ئالدىدا قىزىدىن ئايرىلىپ قالغان تيەن شۆ مىڭ ئازاب ئىچىدە ئاران-ئاران تۇرمۇش كەچۈرۈۋاتقاندا،ئالتە يىلنىڭ ئالدىدىكى تاسادىپىي ۋەقەدە ئوغلىدىنمۇ ئايرىلىپ قالغان،شۇنىڭ بىلەن ئوغلىدىن ئايرىلىشقا چىدىمىغان بۇ ئەر ئوغلىنىڭ جەسىتىنى توڭلاتقۇغا سېلىپ ئالتە يىل ساقلىغان.ئۇنىڭ مۇخبىرغا ئېيتىپ بېرىشىچە،قىزىدىن ئايرىلىپ قالغان ئازابقا چىدىمىغاندا،ئوغلىدىنمۇ ئايرىلىپ قېلىش،ئۇنىڭغا بەك ئېغىر كەلگەن بولۇپ،شۇڭا مۇشۇ يولنى تاللىغان.ئالتە يىلدىن بۇيان كۈنىگە نەچچە قېتىم توڭلاتقۇنىڭ ئېغىزىنى ئېچىپ ئوغلى بىلەن كۆرۈشىدىغان بولۇپ،باشقا ئۇرۇق-تۇغقانلىرى ۋە قوشنىلىرى ئۇنىڭ كاللىسىدىن كېتىپ قالغانلىقىنى ئېيتىپ،ئۇنى دوختۇرخانىغا ئېلىپ بارماقچىمۇ بولغان ئىدى.
بۇ ئەرنىڭ دېيىشىچە،ئوغلى ھايات بولغان بولسا بۇ يىل 24ياشقا كىرىدىغان بولۇپ،ئائىلىسى چوقۇم ئىنتايىن بەختلىك ئۆتكەن بولار ئىدى.2006-يىلى تاسادىپىي ۋەقەدە ئوغلى ئۆلۈپ قالدى،خۇاڭلىڭ كەنتىدىكى كىشىلەر تيەن فامىلىلىكنىڭ ئوغلىنىڭ ئۆلۈپ قالغانلىق خەۋىرىنى ئاڭلىدىيۇ بىراق دەپنە قىلغانلىقىنى كۆرمىدى.شۇ يىلى 54ياشقا كىرگەن تيەن فامىلىلىك كىشىلەرنى چۆچۈتكۈدەك بىر ئىشنى قىلدى.ئۆلۈپ قالغان ئوغلىنىڭ جەسىتىنى دەپنە قىلماي،ئەكسىچە ئۆيىدىكى توڭلاتقۇغا سېلىپ مۇزلىتىپ قويدى.ئوغلىنىڭ جەسىتى توڭلاتقۇدا ساقلىنىۋاتقانغا مانا بۇ يىل ساق ئالتە يىل بولغان بولۇپ،تيەن بوۋاينىڭ دېيىشىچە،ھەركۈنى ئوغلىنىڭ چىرايىنى كۆرۈپ تۇرىدىكەن،خۇددى ئوغلى ھاياتتەك،ئۇنىڭ بىلەن پاراڭلىشىدىغاندەك تۇيغۇدا بولىدىكەن.بۇ بوۋاينىڭ دېيىشىچە،10يىلنىڭ ئىچىدە ئىككى بالىسىدىن ئايرىلىپ قالغان بولغاچقا ئوغلىنىمۇ يەر تېگىگە كۆمۈۋېتىشنى چىدىمىغان.
تيەن جەمەتىنىڭ مەخپىيىتى
تيەن جەمەتىنىڭ ئوغلىنىڭ جەسىتىنى دەپنە قىلماي ئۆيىدىكى توڭلاتقۇغا سېلىپ قويغانلىقىنى بۇ يېزىدىكى نۇرغۇن كىشىلەر بىلمەيدىغان بولۇپ،تيەن جەمەتىنىڭ مەخپىيىتى قاتارىدا ساقلانغان.ئۇلارنىڭ ئۆيى كونا ئۇسلۇبتا سېلىنغان ئۈچ قەۋەتلىك بىنا ئۆي بولۇپ،يەر ئاستى ئۆيىدە كونا بىر توڭلاتقۇ قويۇلغان بولۇپ،توڭلاتقۇنىڭ ئۈستىگە تۆت پارچە خىش پارچىسى قويۇپ قويۇلغان،ئىچىگە بولسا ئالتە يىل بۇرۇن ئۆلۈپ قالغان ئوغلىنىڭ جەسىتى قويۇلغان ئىدى.تيەن بوۋاينىڭ دېيىشىچە،ھەركۈنى كېلىپ ئوغلىنىڭ قوللىرى ۋە يۈزلىرىنى يۇيۇپ قويىدىغان بولۇپ،ئۇنىڭ نەزىرىدە ئوغلى ھايات ئىكەن.
تيەن شۆ مىڭ ياخشى كۈيئوغۇل ئىدى
تيەن بوۋاي بۇ يېزىغا كەلگەن ۋاقىتتا قىران يىگىت بولۇپ تولىمۇ ئىشچان جاپاغا چىدايدىغان يىگىت ئىدى،شۇڭا بۇ يېزىغا كەلگەندىن كېيىن ياڭ ئائىلىسىنىڭ قىزى بىلەن توي قىلغان.ياڭ ئائىلىسىدە چوڭ-كىچىك سەككىز جان بار بولۇپ،ھەممىسى مۇشۇ تيەن فامىلىلىكنىڭ تاپقان مائاشىغا قاراشلىق ئىدى.بىراق تيەن فامىلىلىك ئەزەلدىن ھېرىپ-چارچىدىم دەپ باقمايدىغان بولۇپ،يېزىدىكى ئىشلارنى قىلىپ بولغاندىن كېيىن،سىرتلارغا چىقىپ ئىشلەمچىلىك قىلىپ پۇل تېپىپ بىر ئائىلە كىشىلىرىنىڭ تۇرمۇشىنى قامدايدىكەن.198-يىللىرى ھېچكىم تېلېۋىزور سېتىۋالالمايدىغان ۋاقىتلاردا ئۇلارنىڭ ئۆيىدە بار تېلېۋىزور ئىكەن.كېيىن ياڭ ئائىلىسىدىكى بوۋاي بىلەن موماي بالىلىرىنى تاشلاپ ئۇ دۇنياغا كەتكەندىن كېيىن ،تيەن فامىلىلىك شېنجىنغا بېرىپ شۇ يەردە ئىشلەمچىلىك قىلغان ھەم ئايالىغا پۇل ئەۋەتىپ،ئۇلارنىڭ ھالىدىن خەۋەرئالغان.ئۇ ۋاقىتلاردا قىزى تۇغۇلغان بولۇپ تۇرمۇشى تولىمۇ بەختلىك ئىدى.بىر نەچچە يىل ئۆتكەندىن كېيىن ئوغلىمۇ تۇغۇلغان بولۇپ،قولىدا چىرايلىق ھۈنىرى بار تيەن فامىلىلىك بۇ يېزىدىكى ئالدىن بېيىغان ئائىلىلەر قاتارىغا كىرگەن،ئوغلى بىلەن قىزىنىڭ ساغلام چوڭ بولۇشى ،تۇرمۇشىنىڭ باياشات ئىچىدە ئۆتۈشى ئۇنى چەكسىز خۇشال قىلاتتى.
بىراق خۇشال مىنۇتلار كۆز تەگكەندەكلا غايىب بولدى.قىزى تۇيۇقسىز بۇ دۇنيادىن كېتىپ قالدى،نەچچە يىل ئۆتكەندىن كېيىن ئوغلىمۇ تۇيۇقسىز كېتىپ قالدى.شۇنىڭ بىلەن بىر ئوبدان بەختلىك ئائىلىسىنىڭ كۆز تەگكەندەكلا زاۋاللىققا يۈزلىنىشى تيەن فامىلىلىكنى تېگى يوق قايغۇ-ئازاپلار قوينىغا تاشلىۋەتتى.قىزىدىن ئايرىلىپ قېلىشقا چىدىمىغان تيەن فامىلىلىك ئوغلىدىنمۇ ئايرىلىپ قالغاندا،ئوغلىنىڭ جەسىتىنى دەپنە قىلماسلىقتەك ئادەمنى چۆچۈتكۈدەك تەكلىپنى ئوتتۇرىغا قويدى.دەسلەپتە،ئۇرۇق-تۇغقانلىرى بىردەك قارشى تۇردى.بىراق تيەن فامىلىلىكنىڭ ئازابتىن تۈگىشىپ كەتكەن ھالىتىگە قاراپ ئۇنىڭ مەيلىگە قويۇپ بەردى.شۇنداق قىلىپ ئوغلىنىڭ جەسىتى ئۆيىدىكى توڭلاتقۇدا ئالتە يىل ساقلاندى.
