تۇرسۇنئاي سۇلتان : پىچىر-پىچىر (نەسرلەر)

ئىزىقۇتلۇق · ۋاقتى: 2013-10-1 22:25:26


	لىرىك تۇيغۇلارغا جىمجىت ئولتۇرۇپ قۇلاق سېلىۋاتىمەن، داۋامىغا تەقەززا بولدۇم!

بەرگىيە · ۋاقتى: 2013-10-10 17:08:40


	پىچىر-پىچىر 71 ئوتتەك مەغرۇر لاۋۇلداشلىرىم ئىچىگە سېنى يۇشۇرۇپ قويدۇم ،ھىچكىم تاپالمىسۇن دەپ. كىرپىكلىرىمگە ئۈسسۈگەن سەھەر سەلكىنلىرىدىن ساڭا سالام ئەۋەتتىم، سۆيگۈمنى سۆيمەسلىككە ئىلاجىسىز قالسۇن دەپ. يەنە ئىجازەت بەردىم،بەڭۋاشلىقىڭ تۇتقاندا يۈرىكىمنى تىلغاشلىرىڭ ئۈچۈن... سۇ بولاتتىم چاڭقىساڭ،ئوت بولاتتىم مۇزلىساڭ،تىنىق بولاتتىم بىھۇشلانساڭ.سەن ئۈچۈن ھەممە، ھەممە بولاتتىم . بىراق دىيەلەيمەنمۇ تۇنجى ۋە ئاخىرقى يار بولالىغانلىقىمنى،بۇنىڭ جاۋابىنى سېنىڭ يۈرىكىڭگە قويدۇم. 72 سېنىڭ يۇلتۇزلىرىڭغا تەشنا بولۇۋاتقان قەلبىمنى يۇتۇۋەت،قوياش پېتىپ كېتىۋاتقان ئاسمىنىمنىڭ رەڭگى نۇرلانسۇن! لەيلەپ كېلىۋاتقان قارا بورانلارنىڭ باغرىدا قالماسلىقىم ئۈچۈن بار كۈچۈم بىلەن يۈگرەۋاتاتتىم. يۈگۈرگەنسىرى سەندىن چىقىپ ساڭا پېتىۋاتقان سايەمنىڭ يۇلقۇشلاپ باغرىغا بېسىشلىرىدىن قۇتۈلالمىدىم.ئەي... مەن ئىلىشىۋاتقان ئاشۇ پەيتتە سەن تاماشا كۆرگۈچىمۇ؟ ئەمىسە يېنىمدىن بىر دەقىقىمۇ ئايرىلما! 73 سىمايىم كۆز قارچۇقۇڭغا ئولتۇرۇۋالدى. ئۇنى قوپ دەپ زورلىما، ھالسىرايسەن.قارا، مەن ھاۋايىمنىمۇ تارتىۋالغان سەندىن مەمنۇن بولماقتىمەن. قەلبىڭنىڭ ئەڭ چوڭقۇر قاتلىمىدىكى زەم-زەملىرىڭنى سوراۋاتقان ۋاقتىم دەل سەنسىز ئۆلۈۋاتقان ۋاقىتلىرىم... ئەي... باھارىستاننىڭ ئەلچىسى،يۈرىكىمگە ئۇۋا سالغان قۇشلىرىڭ توختىماي چۇرۇقلاپ مىڭەمنى يىمەكتە.يېشىل ياپراقلىرىڭ چالغان چاۋاكتا ئېزىلگەن روھىمنىڭ تەشنالىقلىرى مۆلدۈرلىمەكتە .قېنى سەن دەپ نىدا قىلىۋاتقان كۈيلىرىمنى يا كۆندۈر يا ئۆلتۈر! نىمىشقا ھەسرەتلىنىسىز دىگۈچلەرگە بېرىدىغان جاۋابىم شۇكى: ئېزىپ قالمىغانلىقىم ئۈچۈن! 74 باھاردىكى ئەتىرگۈللەرنىڭ پۇرىقىدىن كىم مەست بولۇۋاتىدۇ، دىھقانلارنىڭ گۈل سەيلىسى قىلىشقا نەدىمۇ ۋاقتى بولسۇن؟ئۇلار قۇرت-قوڭغۇزلار بىلەن تەڭ ئالدىراش ئېتىزلاردا ئۆمىلەۋاتىدۇ. ئاق ياقىلىقلار بولسا تېخىمۇ ئالدىراش.ئۇلار باھار بىلەن تەڭ ئەۋجىگە چىقىدىغان ئايىغى چىقماس ئادەمگەرچىلىك ۋە خىزمەت تۇرمۇش ،ئويۇن-تاماشىلار ئارىسىدا چېپىپ نىمجان بولغان روھىغا باداڭ قورساقلىرىنى يۈك قىلىشىپ يۈرمەكتە،. جىمىر-جىمىرلىققا تولغان ئالەمدە كىشىلەرنىڭ ئالدىراش ھايات چېكىگە قاراپ كېتىپ بېرىشلىرىغا قوشۇلۇپ كېتىۋاتقان قەدەملىرىمنىڭ ھالى قالمىدى،بىراق، يەنە مېڭىشىم كېرەك تاكى ئاخىرقى مەنزىلگە قەدەر. بۇنى مەن خاتىرەمگە رەڭدار تۇرمۇش دەپ يازىمەن تېخى. 75 شاماللارغا ئىشەنمە كۆڭلۈم،ئۇ ساباھلاردا دېرىزەڭدىن ئۇچۇپ كىرىپ يۈزۈڭنى سۆيگىنى ، تۈن كېچىدە لەرزان لەيلەپ قۇلاقلىرىڭغا پىچىرلىغىنى بىلەن ئوخشاشلا سەندىن ئۆتۈپ باشقىلارنىڭمۇ يۈزىنى سۆيىدۇ،ئوخشاشلا شىۋىرلايدۇ.ئاڭلىغىنە، سەن ئاڭلىغان سۆزلەر باشقىلارنىڭمۇ قۇلاقلىرىدا جاراڭلىدى. ياخشى كۆرمەيمەن دەيسەن، ياخشى كۆرىسەن، نەپرەتلەنمەيمەن دەيسەن، نەپرەتلىنىسەن،خۇددى كۈلۈپ تۇرۇپ مارجان تۆككەنگە ئوخشاش. شېرىنلىكنى بەتتام تېتىدى دىگەنلەرگە ھەيران قالمىغىن، سەنمۇ شېرىن سۆيگۈمدىن ۋاز كېچىپ يىراقلارغا كەتكەن. كۆڭلۈم يېرىم دىدىڭ، ناخشا ئېيتىپ بەردىم،يۈرىكىم ئاغرىدى دىدىڭ. مەلھەم سۈردۈم.سەن يارىلارنى ساقايتىپلا ئۇزاپ بوپسەن،بۈگۈن ناخۇش بولدۇم. ئەي..قېنى سەن؟ 76 دۇنيا مەئىشەتلىرىگە تويۇنۇپ ئالدىراش يۈرگەن كىشىلەر ئارىسىدا مەنمۇ بار ئىدىم. سۇئال ئېتىغا مىنگەن خياللىرىم ئاللىقاچان يارىلانغان، ئەتراپىمدىكىلەرنىڭ ئۈلۈك ھىسلارنى سۆرەپ يۈرۈۋاتقانلىقى شۇنچە ئاسايىشلىق ئىچىدە تۇرۇپمۇ سارغىيىپ كەتكەن ئەپتىدىن بىلىنپ تۇراتتى. شۇ ھالەتتە قەدەممۇ -قەدەم ھاياتلىقنىڭ ئاخىرقى چېكىگە يۈرۈپ كېتىۋاتاتتۇق، ھىچكىم ھىچنىمە دىيىشنى خالىمايدىغان ئالدامچى دۇنياغا شۇنداق باغلانغان ئىدۇقكىن، پەقەت، كۆز ئالدىمىزدىكى مەنپەئەت ئۈچۈن بىر-بىرىمىزنى قىر-چاپ قىلىپ قىيقاس سېلىشاتتۇق. بىز بۇنى ھاياتلىق دەۋالدۇق. شۇ ھاياتلىقتا مۆدۈرۈپ چوقۇرۇپ پۇتلىشىشلارنى تۇرمۇش دوقاللىرى دەۋالدۇق.بىز نەقەدەر بىچارە ھە ، ئۆزىمىزنىڭ ئىشلىرىغا ئۆزىمىز ئىگە بولالمايدىغان؟! 77 قەلب بوستانىمدىكى گۈزەللىكلەرنى تالان-تاراج قىلىۋاتقان بۇ تۇرمۇش بېسىملىرىدىن زارلىنىشىم يوق.بۇ تالان-تاراجلىقنى ئۆزىمىز كەلتۈرۈپ چىقىرىۋاتقانلار قاتارىغا ئاللىبۇرۇن قوشۇلغۇچىمەن.ئائىلىدىن يۈرىكىمگە تۇتاشقان يوللاردا سانسىز مۆدۈرۈپ كەتتىم، چىشىمنى چىشلەپ يىقىلماسلىققا تىرىشتىم.بىلەتتىم، يىقىلساملا ئورنۇمدىن مەڭگۈ قوپالمايدىغانلىقىمنى. تىرىشىپ-تىرمىشىپ ئالدىغا ماڭغۇچىلارغا گۈلدەستە تۇتۇشلىرىم بار.بىلمەيمەن، ماڭا گۇل تۇتۇشقا كىمىم قالار؟ 78 تۈندىكى گۈللەردەك مۇلايىم ھالەتتە ماڭا باققىنىڭدا،قارچۇقلىرىڭدا مەڭگۈلۈك ياشاپ قېلىشنىڭ ئارمىنىدا ئوت بولۇپ ياندىم. سەن ئاشكارىلىما يولۇچى ئىكەنلىكىڭنى! مەن دىمەي كەتمىسەڭ بولمامدۇ دەپ! 79 يۈرىكىم سەن مېنىڭ كۈلۈمسىرەپ تۇرۇپ ساڭا شۇنداق دىدىم.بىلىسەن يۈرەكسىز تەننىڭ مەۋجۇت بولۇپ تۇرالمايدىغانلىقىنى. سەن ئەبىدىي مېنىڭ تېنىمدە سوقۇپ تۇرۇشقا رازى بولدۇڭ. مەن بەخت قۇشىغا ئايلىنىپ تىنماي ۋىچىرلىدىم. 80 بىپايان زەڭگەر دولقۇندەك،يۇلتۇزلۇق ئاخشامنىڭ ناخشىلىرىدەك سۆزلەنگەن ھىكايىلەرنىڭ ئايىغى چىقماس بولدى،يامغۇرنىڭ ئۆكسۈشلىرى تولغان شۇ كېچە يانمۇ-يان ئولتۇرغان ئادەملەر ئارىسىدا تۇيۇقسىز سېنى ئۇچرىتىپ قالدىم. ھەر كۈنى يېڭى قوياش ئارقىلىق بىر-بىرىمىزگە سالام يوللاپ، ئۇنىڭ ئوتتەك قىززىقلىقىنى يۈرىكىمىزگە يۈكلىۋالدۇق.ئايسىز كېچىلەردە ،چاراقلىغان يۇلتۇزلاردا بىللە ناخشا ئېيتتۇق. تەكەببۇر، مەغرۇر سېپىللارنى بۇزۇپ تاشلاپ غەلىبە قىلغان دەملىرىمدە سەنمۇ مەڭگۈ ئوقۇيدىغان كىتابىڭنى تېپىۋالغانلىقىڭنى ئېيتتىڭ.مەن پاچاقلانغان سېپىللاردىن بوسۇپ كىردىم. سەن كىتابىڭنى ئوقۇشقا باشلىدىڭ. جۇپ تىنىقلار مەغرۇرلۇقنى يىدى، گۈزەللىكنى سۆيدى.... ئاي قېشىڭغا چۈشكەن ئاشۇ كۈن ئايسىز ئاسماندا يۇلتۇزلار چاراقلايتتى... بۇ يازمىنى ئاخىرىدا بەرگىيە تەھرىرلىگەن. ۋاقتى 2013-10-10 17:14

ئابدۇرېھىم زۇنۇ · ۋاقتى: 2013-10-10 17:23:37


	«پىچىر-پىچىر»لىرىڭىزنىڭ بىر قىسمىنى «شىنجاڭ گېزىتى»دە كۆردۈم. سىزگە نۇسرەت يار بولسۇن!

qasimjanosman · ۋاقتى: 2013-10-10 17:40:22


	ئابدۇرېھىم زۇنۇ يوللىغان ۋاقتى 2013-10-10 17:23 «پىچىر-پىچىر»لىرىڭىزنىڭ بىر قىسمىنى «شىنجاڭ گېزىت ... دەسلەپكى قىسمىنى «يېڭى قاشتېىشى»نىڭ 3- سانىدا كۆرگەن ئىدىم. داۋاملاشقۇسى.

بەرگىيە · ۋاقتى: 2013-10-20 10:47:09


	81 گۈلنىڭ بەرگىسى،ياپرىقى ،شېخى يىلتىزى ۋە تىكىنى بولىدۇ بۇ ھەقىقەت. گۈلنىڭ كۆز يېشى بولمايدۇ دىيىشتى. كىم دىدى گۈلنىڭ كۆز يېشى بولمايدۇ دەپ. نازۇك بەرگىدىكى شەبنەملەر بۇلبۇل پىغان بىلەن سايراپ چىققان كېچىلەرنىڭ زىننىتىمۇ ئەمىسە؟ سېنىڭ باغرىڭدا ئۇخلاپ قالغان كېچىلەر نەقەدەر گۈزەل ...قىززىق يېرى شۇكى باغرىڭدا ئۇخلاپ، باغرىڭدا قوپۇپ تۇرۇپمۇ سېنى ساراڭلاردەك سېغىنىمەن... ئەي، جېنىمغا زۇلۇم سالغان زالىم، يا بىر قىلىچ بىلەن مېنى ئۆلتۈر يا بۇ جۇدالىقنىڭ بېشىنى ئۈز! 82 كېچىلىرىمنى يارىدار قىلدىڭ، ئەمدى كۈندۈزلىرىمگە سوزۇلۇپ كىرىۋاتىسەن، شۇ قەدەر رەھىمسىزسەنكىن بۇ رەھىمسىزلىكلىرىڭ ئىچىگە ئۈزۈمەن. شېرىن زەھەردەك قىيامنى لەززەت بىلەن تېتىغان دەملىرىمنى ئۈزۈلۈپ قالمىسۇن دەيمەن. قاراڭغۇلۇقتىكى يورۇق ھىسلىرىمنى بۇلاپ كەتكەن قاراقچىغا، بىئاۋاز نىدايىم سىڭگەن كۈندۈزلىرىمنى ئۆزەم ئامانەت قىلدىممىكىن..شۇندىن بېرى كۈندۈزلىرىممۇ سۆيۈملۈك ئەنسىزلىكتە تېپىرلىماقتا. ئەي... تۈنلەرنىڭ قاتىلى، مېنى بىر مىنۇتمۇ ئارامىمدا قويما،بولمىسا چوقۇم ئۆلىمەن،ئۆلۈپ كېتىمەن... 83 سول تەرىپىم ئاغرىيدۇ، پەقەت سول تەرىپىم. -قەيەر؟ -سول تەرىپىم ، پەقەت مۇشتۇمچىىك يەر ئاغرىيدۇ. ئاھ... سول تەرەپتىكى ئاشۇ زىڭىلدىغان ئاغرىقتىن جۆيلۈپ يەنە ئۇيغاندىم. مۇشتۇمچىلىكلا يەر. دىمەك مۇشتۇمچىلىك گۆش يەنە قاناپ كەتكەن ئىكەن. 84 ئازابسىز كۈنلەرنىڭ سورىقى بولمايدۇ دىدى. ئازابلىق كۈنلەرنى ھەسسىلەپ تارتىۋاتقانلار... مەن سۆيگۈ دەرىخىڭگە يۆلىنىپ تۇراتتىم.سارغىيىپ لەيلەپ چۈشۈۋاتقان ياپراقلاردىن كۈز بىشارىتىنى ھىس قىلىپ تىترەپ تۇرۇپ دىدىم: -ياق، سۆيگۈگە كۈز كەلمەيدۇ! سەندىن چىقىپ يەنە ساڭا يىقىلىمەن. ماڭغان قەدەملىرىمنىڭ ھىچ ئاۋۇشى يوق ،بىراق، ئۈستۈمدىكى يۈك بەكلا ئېغىرلاپ كەتتى. جېنىم. يۈكنى كۆتۈرۈشكە قۇربىڭ يېتەمدۇ؟ ساڭا قۇشلىرىمنى ئۇچۇرۇۋەتتىم. ئۇلارغا زىمىستاننى ھىس قىلدۇرماي باھاردا بىللە كېلىڭلار!ساڭا يىقىلغان قەدەملىرىم يەنىلا ئۆز ئورنىدا... 85 قۇرغاق تەشنالىققا چۆكۈپ كەتتىم، چاك چاك يېرىلغان لەۋلىرىمگە شەربەتتىن تامايىم يوق، ئەي،يۈرىكىمنىڭ ئىگىسى،ساڭا ئېيتقانمەن يۈرەكسىز تەن مەۋجۇت بولالمايدۇ دەپ. شۇڭا ساڭا «يۈرىكىم» دەپ ئىسىم قويۇۋالدىم. شۇ چاغدىلا ھەر بىر زىڭىلداشتا سەنمۇ تولغىنىسەن. بارا-بارا زىڭىلداتماس بولىسەندە ئاجرىمايسەن.. قارا، بۇ ئۇسۇلۇمدا سەن چوقۇم كۈلۈمسىرىدىڭ. مۇھەببەتنىڭ رامكىسى ئىچىدە مەن رەسىم سىزدىم ،مۇھەببەتنىڭ شاماللىرى لەرزان ئۇسۇلغا چۈشتى.قەلبىمدە ئىنتايىن نەپىس، گۈزەل بىر كۈي ياڭرىماقتا ئىدى. غىڭشىۋاتقان ناخشامنىڭ قوش ئاۋاز ئىكەنلىكىدىن مەنمۇ كۈلۈمسىرىدىم. 86 سېنىڭ قەلبىڭدە ئېرىپ كېتىمەن. سېنىڭ كىرپىكلىرىڭدە كېچىچە تۈنەپ چىقىمەن. سېنىڭ قەدەملىرىڭدە تىڭشاپ چىقىمەن، سېنىڭ تىۋىشلىرىڭدا دۇپۇلدەيمەن. سەرسان يولۇچى بولۇپ شوراڭدىن ئوغرىلىققا چۈشۈمەن. مېنى كۆرۈپ قالما، كۆرۈپ قالغان ۋاقتىڭدا نىمجان بولىسەن، چۈنكى، مەن يۈرىكىڭنى ئوغرىلاپ قاچىمەن. بۇ باشلىنىش جېنىم! شۇنىڭدىن كېيىن دېڭىز بويىدا ئېيتقان ناخشاڭنى پۈتۈن جاھان ئاڭلايدۇ، سۇكۇتكە چۆمۈدۇ ، سەن توختىمايسەن ئەبىدىي، ئەبىديلىك ئىچىدە كىم-كىملەر،كىم-كىملەر قالىدۇ.. ئاشۇ كۈيدە بىز نۇرغا ئايلىنىپ كېتىمىز .... 87 ئىككىمىز ئۇچراشقان ئاشۇ چاغ قايغۇ مەڭگۈلۈك ئۇچۇپ كېتىپ يېنىكلەپ كەتتۇق.بىراق خۇشاللىققا بەرداشلىق بېرىشنى ئۈگىنىۋىلىشىمىز كېرەكلىكىنى ھىس قىلىشتۇق بىھۇش بولغاندا.. سېنىڭ تىترەڭگۈ ئاۋازىڭدىكى مۇھەببەت مېنى ئەل قىلدى. جېنىم، ئىككىمىز ئۇچراشقان ئاشۇ دەقىقىيدىن خالىي ھىچقانداق نەرسە ماڭا ئەرزىمەيدۇ. سەندىن چىقىپ يەنە ساڭا پېتىشنىڭ لەززىتى سىڭگەن كۈنلىرىمنى ساڭا مارجان قىلىپ ئاسىمەن. سەن بىر دەستە گۈلنى پۇرىقىنى پۇراپ تۇرۇپ ئازابسىز ئازابقا يۈزلىنىشنى ئۈگىنىۋاتىسەن. مەنمۇ ھەم. ساڭا كۈلكىلىرىمدىن بىر قۇچاق ئەۋەتەي دىگەن ئىدىم بىراق باغرىمغا پاتقان سېغىنىش قىلدىن ئىنچىكە ئازاب نەشتىرىنى ساڭا تىققىنىچە ئۆكسۈشكە باشلىدى. كەل باغرىمغا كەل، شۇ يىڭنە تۆشۈكىدىن تالاي ئۆتتۇق، يەنە ئۆتىمىز، بەلكى، بىر ئۆمۈر ئۆتىمىز! 88 تىتما-تالاڭ بولۇۋاتقان ۋاقىتنىڭ قىرغاقلىرىدا ئۇزۇن تۇردۇم سېنى كۈتۈپ. ھاردىم، نەپەسسىز قالدىم.بىراق يەنىلا ئۈمىدىمنى باغرىمغا گۈل قىلىپ ئېچىلدۇرغىنىمچە سېنى كۈتتۈم. كەلمىدىڭ، تۇنجى قېتىم مېنى ئۈمىدسىزلىكنىڭ قۇدۇقلىرىغا تاشلىۋەتتىڭ. نىمە دەي ئەمدى؟ كېتىشنى ئىستەپمۇ كېتەلمەيدىغان ئاشۇ كېچىلىرىمنىڭ يارىدار كۆكسىدىن بۇلدۇقلىغان قانلارنى زىنھار كۆرگۈم يوق ئىدى. بىراق ، سەن بۇ كېچەمنى يەنە قاناتتىڭ . 89 شادلىق غەزىنەمدە يەنە نىمىلەر قالدى، سەندىن بۆلەك؟ يۈرىكىمدە يەنە نىمىلەر قالدى، سېنىڭ تىۋىشلىرىڭدىن بۆلەك؟ كۆڭۈل بوستانىمدا يەنە نىمىلەر قالدى، قالدۇرغان ئىزلىرىڭدىن بۆلەك؟ ئەي.. مېنىڭ يوقلۇق ئىچىدىكى ئاشىقىم، مېنىڭ يەنە نىمە ئارمانلىرىم قالدى ،ساڭا ئايلانماقتىن بۆلەك؟ كۆزلىرىمنى سايەڭدىن ئۈزۈپ، ئىزلىرىڭغا تىكىمەن. يۈرىكىمنى كۆكرىكىمدىن يۇلۇپ ئېلىپ ،قوللىرىڭغا تۇتۇمەن. ئاشۇ چاغ يىقىلىمەن، مېنى ھىچبولۇپ باقمىغان سۆيگۈلەرگە قۇل ئەتتىڭ. لەۋلىرىم يۈرىكىمنىڭ تىۋىشىنى يەتكۈزمەكتە، بۇ ئازابلارنى سۆيۈپ قالدىم ! 90 ئادەم ئۆزى بىر سىر، شۇ سىر دۇنياسىدا بىر-بىرىمىزگە سوقۇلۇپ ياشايمىز.مەن رامكىنىڭ چېتىگەمۇھەببىتىمنىڭ تامغىسىنى مەھكەم ئويۇپ قويدۇم . تامغا بۇزۇلماس قەسەمنىڭ نىشانى ئەلۋەتتە. مەسئۇلىيەت تاغلىرىدا مەزمۇت تۇرۇشۇم ئۈچۈن دۇئا قىلىمەن . يەلكەمدىكى ئېغىر يۈكلەرنىڭ ۋەزنىدىن ئېزىلگەن جىسمىم شۇنداق مەغرۇر. چۈنكى يۈرىكىم ئوتتەك يېنىپ تۇرۇدۇ. ئۇ مەشئەل. مېنى ئازدۇرمايدىغان. ئۇ ۋاپا قەسىمى، مېنى پۈكلەندۈرمەيدىغان. خىرامان كۈلكىلەرنى كۈلۈش ئۈچۈن رىيازەت چېكىمىز بۇ مۇقەررەر. بىراق رازىمەن ، چۈنكى رامكا ئىچىدە تۇرۇپ بەخىتلىكمەن.

بەرگىيە · ۋاقتى: 2013-10-20 16:15:12


	91 تولىمۇ سۇغۇق بولغان ئىپادىلەردىن يەتكۇچە زېرىكتىم.ئۇنىڭ ئىپادىسى روھ ئىپادىسى بىلەن بىللە بولالمىغان ئاشۇ دەملەرنىڭ ئامانىتىنى كىملەرگىدۇر قويالمايمەن ئەلۋەتتە . روھ چوڭقۇرلىقىدىن بالقىغان سۆيگۈنىڭ قىيناقلىرىغا باغرىنى بۆلەپ تۇرۇپ، يەنە ئۇنى جىممىدە سىڭدۈرۈۋاتقان بىچارىلىكلەردىن بەكلا زېرىكتىم .ئۈمىدسىز تۈنلەرنىڭ، ئايسىز كېچىلەرنىڭ، يۇلتۇزسىز پاراڭلارنىڭ قاتىلى بول دەپ تىلەكمۇ تىلىمەيمەن قاپقاراڭغۇ يۇلتۇزلارنى تاماشا قىلىپ ئولتۇرۇپ . خاتىرەمنىڭ بەتلىرىگە لىققىدە گۈل سېلىپ قويدۇم، كۈندە بىر تال قۇرۇپ كەتكەن گۈل بەرگىنى تاشلايمەن. گۈل بەرگى بىلەن تەڭ ھاياتىمنىڭ بەتلىرىمۇ بىر-بىرلەپ يىرتىلىۋاتىدۇ. ئاھ.. ئۆمۈرنىڭ چېكى؟؟؟؟ ھىسسىز دۇنيانىڭ ئۆلگەن تەنلىرىدە جىۋىرلاپ تۇرغان ئاخىرقى كۈينى قۇچىقىمغا مەھكەم سولىۋالدىم . ئەتە قوياش چىقارمۇ؟ قايسى رەڭدە چىقار؟ مەن قاپقارا قوياشنى خىيال قىلىپ چۆچۈپ كەتتىم. ناۋادا بىر كۈن قوياش قاپقارا چىقسا....... 92 سىلەر ئەمدى قاراڭلار، مېنىڭ رەڭگىمگە، رەڭگىم سۇلغۇنمىدى قانسىرىغان قانلاردەك، سىلەر ئەمدى تۇنۇڭلار، تىتما تالاڭ بولغان تەنلىرىمدە قالغان نۇرلاردىن،نۇرسىز ئەتلەردە شولىلار قالغانمىدى؟ سىلەر ئەمدى بىلىڭلار، كۆيۈۋاتقان سۇلارنىڭ دەھشىتىنى، مېنىڭ كۆزۈمدىن تامغان ياشلار شۇنچە تۇزلۇقمىتتى ۋە يا ئوتمىدى؟ سىلەر تۇنۇيالمىغان مېنىڭ ئىچىمدىن چىقىپ كېتىڭلار ، مەن يارىلانغان تۇيغۇلارنى بارماقلىرىم بىلەن يېپىشنى ئۈگىنەي! بەرگىمگە ياققان قارلارنى كۆيۈۋاتقان دېڭىزغا تاشلىۋەتتىم. دېڭىزنىڭ گۈرۈلدەپ كۆيۈشىدىن ئاسمان قىپ-قىزىل قىزاردى . تۈن تاتاردى سېنى يۇشۇرۇپ قويغان گۇناھى ئۈچۈن. 93 رەڭسىز سۆيگۈلەردىن قاچقۇم كەلدى.تۈننىڭ قانلىرى كۈۋەجىگەن شۇ دەمدە، سېنىڭ رەڭسىز سۈرىتىڭنى سىزىپ ئولتۇرۇپ. يامغۇرنىڭ تىۋىشلىرىغا دېرىزەمنى باغلاپ قويدۇم، تىۋىشلىرىڭنى كۈتۈپ ئولتۇرۇپ. قۇشلىرىمنىڭ پەيلىرىگە سارغايغان ئارمانلىرىمنى چىگىپ قويدۇم، سېنى ئوقۇپ چۈشىنىپ ئولتۇرۇپ. ئەي،تۈنلەرنىڭ قاتىلى، سەن ئۈچۈن مىڭ پارە بولدۇم. دەپتەرلىرىمنىڭ ۋاراقلىرى يىرتىلدى، ئاھىم يېزىلغان قۇرلارغا بەرداشلىق بېرەلمەي .ئاشىق ھىدىغا بۆلەنگەن شاماللارنىڭ كۈتۈشى يوللارغا چېچىلدى. شۇ تاپ، كىشىلەر شامالمۇ بۇ ئاشىقمۇ دەپ ئايرىيالماي ئاۋارە... 94 قانچە قېتىم يىقىلدىم، قانچە قېتىم قوپتۇم يوللاردا ، ھەر بىر ھەسرەت سوزۇلۇپ كىرگەن كېچىلىرىمدە يىقىلىپ، ۋىسال باغاشلىغان تاڭلاردا ئورنۇمدىن تۇردۇم. يىراق ئۆتمۈشلەرنىڭ باغرىدا نۇر بولۇپ جۇلالانماستىن، يېقىندىكى ئاسمىنىڭدا ئاي بولۇپ پارلىغان دەملىرىمنى تارتۇق قىل ،بولدى بەس يىتەر!قاراڭغۇ دۇنيانىڭ ئىچىدىن سېنى ئىزدەشلىرىم يوق، بار نۇرۇڭنى ماڭا ئاتا قىلىۋەتكەن دەملىرىڭگە بەخشەندە بولغان ئارمانلىرىمدا نىمە گۇناھ ؟ مەيلى دە، مەن قىيام بولغان سۆيگۈلەردە ، يەنە ئېرىپ يوقاپ كېتەي! مەيلى دە، جىمجىت كۈتۈشلەردىن قالغان قارا تاشلارغا، باغرىمنى ياقاي! مەيلى دە، سەنسىز ئۆتكەن كۈنلىرىمگە، سەنسىزلىكنىڭ دەردىنى، قارا مارجان قىلىپ ئاساي! مەيلى دە، سېنى يۈتتۈرگەن قارچۇقلىرىمنى ئويۇپ تاشلىۋىتەي،ۋاپاسىزلىقنىڭ جاجىسىنى تارتسۇن! مەيلى دە، مەن باغرىڭغا يىقىلىپ باغرىڭدا ئۆلۈپ كېتەي، ئاخىرقى ھاياتىم سەندە تاماملانسۇن! 95 ئىشىك يېنىك چېكىلدى، يۈگرۈپ بېرىپ ئاچتىم ھىچكىم يوق، دېرىزەم يېنىك چېكىلدى، يۈگرۈپ بېرىپ ئاچتىم ھىچكىم يوق، تاك،تاك تاك... توختىماستىن چېكىلىۋاتقان تىۋىشلاردا تولا ئېچىلغان ئىشىك-دېرىزىلەر دومسايدى، ھىچكىم يوق. توختار ئەمەس تاك- تاك ئاۋازلار، تىترەپ كەتتىم، ئىشىك چېكىلىش توختىغان دەمدە تىۋىشسىزلا كىرىپ كەلدىڭ يۈرىكىمگە .ھە... ئەسلىدە يۈرىكىمنىڭ ئىشىكى.... مەن ساڭا ئاقتىم، سەن ماڭا! 96 سايىدەك يېيىلغان كىشىلەر توپى ئىچىدىن سېنى تۇنۇۋالدىم . شۇندىن بېرى ھىجران گۈللىرىم بەس-بەستە ئېچىلىشقا باشلىدى. غايىپ ئوقنىڭ دەھشىتىدە ھالسىزلاندىم. روھ باياۋانلىرىدا، قاغجىراق تۇيغۇلارنى يۇدۇپ يۈرگەن تۈنلىرىمدە، مىھىرلىك ئالقانلىرىڭنىڭ مېنى پەپىلەپ تۇرغانلىقىنى ھىس قىلساممۇ سۈرەن سالاتتىم .سەن يوق دەملىرىمگە لەنەتلەر بولسۇن!ئۇنداق كۈنلەرنىڭ تەنلىرى يارا، يۈرىكى يوق، قۇشلار تىللىرىنى چوقىلاپ قاچقان.ئۇ كېچىلەرنىڭ زەڭگەر كۆزلىرىدىن قان تامچىغان.ساھىلدىكى ئاخىرقى ئىزلارغا مۇڭ لىققىدە تاشقان. سېنى يىغلاپ- يىغلاپ تېلىققان موزىكىلىرىمنىڭ ئۈزۈلگەن تارلىرى كۈتۈۋالىدۇ. مەيىن ،ئىسسىق تۇيغۇڭدەك مۇھەببتىڭدە ياندىم، ياندىم ...يىراقتىن كۆيۈۋاتقان سۇلارنى كۆرگەنلەر باشلىرىنى چايقاشتى.ئىھ،مۇھەببەتكە پۈتۈلگەن قىز، دىيىشتى . 97 ياق ،چىدىمايمەن! گەر قارچۇقۇڭدا، چاقناپ قالسا بىرەر شولا... رەشىك تۇيغۇلىرىمدىن بۇ گۈلنى ياساپ، مەيدە يانچۇقۇڭغا سېلىپ قويدۇم. 98 يۈرىكىمنى پۇچىلىما! سېنىڭ تۇنجى سۆيگۈڭنىڭ ئىگىسى بولۇش مېنى بەكلا بەخىتلىك قىلىدۇ.بىراق بۇ سەۋەب سېنى ھەر مىنۇت-سىكۇنت ئازاب زەنجىرلىرىدە باغلاپ، ھىجران دەشىتلىرىدە سۆرەپ يۈرۈۋاتقانلىقىمنى زىنھار بىلمەپتىمەن.ئەي ئاشىق، ئۇدارىڭنى بۇنچە كۈچەپ چالغانلىرىڭدا، ئاۋازسىز مۇھەببىتىڭنى تۈن كېچىلەردە دېرىزەم تۈۋىدە ماڭا تۆككەنلىرىڭدە، مەن چۈش قوينىدا بەخىت كۈلكەمنى كۈلگىنىمچە ئۇخلاپتىمەن. نۇمۇس قىلدىم ،خۇددى سېغىنىشىمنىڭ ۋەزنىنى مېنى سېغىندۇرغان كىشى بىلىپ، ئۆزىنىڭ مېنىڭ يېنىمدا يوقلىقىغا نۇمۇس قىلغىنىغا ئوخشاشلا. بۇ نە قىسمەت، نە تەغدىر ھە؟! ھاياتلىق پويىزىنىڭ تۇرمۇش ۋاگۇنلىرىدا، بىر-بىرىمىزگە غەمكىن باققىنىمىزچە يۈرۈپ كەتتۇق، توختىيالماي..... 99 تۇمانلىق سەھەرنىڭ لېۋىدە قالغان نۇرغۇن پىچىرلاشلاردىن يۈرىكىم سۇ بولدى. گۈللەرنىڭ كۆز ياشلىرى بەرگىدە قاتقان ئاشۇ سەھەر، يۈرىكىمنىڭ بۇيرۇقىغا بويسۇنماستىن، ئاخىرقى سېپىللارنى بۇزغىنىمچە، يۈگرەپ ئىچىڭگە كىردىم.ئىچىڭدىكى لىقلانغان ئازاب ئورمانلىرىنىڭ يىلتىزلىرىدا ئولتۇرۇپ مۇڭلاندىم. تۈننڭ ئارمانلىرى تىترەپ تۇرۇپ باغرىمغا قول سۇنۇشاتتى. مەن چېچىلىپ كەتكەن خىياللىرىمنى سۇبھى ئاسمىنىغا يۇلتۇز قىلىپ تارقىتىۋىتىش ئۈچۈن تىرىشماقتا ئىدىم. بىراق سەن ئۇزىغان قەدەملەردە بۇلار يەنىلا مەندە قاپتۇ. پەرياد ئۇردۇم، سەن نەدە؟ 100 ھاياتىم غەم بىلەن شادلىق ئالداۋاتقان يوللارغا مەپتۇن بولغىنىچە ئىلگىرلىمەكتە.ھارغىن كۆڭلۈم رۇجەكلىرىدە چاقناپ تۇرغان سىمالارغا مەيلىم يوق. چۈنكى بىتاپمەن. چاڭ-توزانلىق گىرىمسەن سۆيگۈ يولىدا ئاداشقان بىتاپمەن.بىتاپ بولساممۇ ھەر كۈنى سەگەكلىك بىلەن دېرىزەمنىڭ تۈۋىدە سېنى ساقلاۋاتىمەن . جېنىم كەل، ئاخىرقى نەپەسلىرىمگىچە بولسىمۇ ئۈلگۈرۈپ كەل، دىيىشمىگەنىدۇق ئاخىرقى قېتىم بولسىمۇ سەن مېنىڭ، مەن سېنىڭ دەپ. شۇ ۋەدىلەرنى ئەمەلگە ئاشۇرۇشۇڭ ئۈچۈن ئاخىرقى تىنىقلىرىمنى ساڭا ساقلاۋاتىمەن، ئاخىرقى تىنىقلىرىمنى.... بۇ يازمىنى ئاخىرىدا بەرگىيە تەھرىرلىگەن. ۋاقتى 2013-10-22 17:47

كۆۋرۇك · ۋاقتى: 2013-10-20 17:00:14


	بەرگىيە تولۇپ تاشقان ھېسياتىڭىز بىلەن يېزىپ چىققان نەسىرلەرنى ئوقوپ ئۈلگۈرەلمىدىم.لىكىن سىز يېزىپ ئۈلگۈرۈپسىز، ئاخىرقى تىنىقلىرىمنى ساڭا ساقلاۋاتىمەن، ئاخىرقى تىنىقلىرىمنى دەپ ئادەمنى قورقۇتماڭ جۇمۇ تېچلىقتۇ؟ تىتما-تالاڭ بولۇۋاتقان ۋاقىتنىڭ.\..... توختاپ قالماي يېزىپ تۇرغايسىز 100 گە كەلگەندە

بەرگىيە · ۋاقتى: 2013-10-20 22:31:01


	كۆۋرۇك يوللىغان ۋاقتى 2013-10-20 17:00 بەرگىيە تولۇپ تاشقان ھېسياتىڭىز بىلەن يېزىپ چىققان نە ... ئوقۇپ ئۈلگۈرۈڭ بىكار كۆمۈلۈپ قالىسىز ئاللا خالىسا بار داۋاملىق يېزىلىدۇ ..

(ئۈمىد) · ۋاقتى: 2013-10-20 22:52:44


	شېئىرى تىلىڭىز نەسىردىمۇ جۇلالاپتۇ،... قۇت بولسۇن، بەرگىيە،.. بەرىكەتلىك بولۇڭ..

بەرگىيە · ۋاقتى: 2013-10-22 13:25:54


	101 گۈزەل چۈشلىرىمنى بۇزۇۋەتتىڭ. شۇ قەدەر گۈزەل چۈشلىرىمنىڭ بوينىغا رەھىمسىزلىك بىلەن ئۇرۇلغان قىلىچ بۇ كېچەمگە قاپقار قانلىرىنى چاچراتقىنىچە قاراقلىرىمدا قېتىپ قالدى. ئۇزاپ كەتكەن قەدەملەرنىڭ ئارقىسىدىن سۆرۈلۈپ مېڭىشلىرىم يوق ، بولدى بەس، يېتەر! بىراق يۈرىكىمىڭ نالىسى ھىچ بېسىقمايۋاتاتتى. دېرىزەم تۈۋىدىكى غەمكىنلىك قاپلىغان سۇكۇناتنىڭ تىغى جېنىمنى قاقشىتىپ تۇرۇپ يەنە سېلىندى. ئەمدى مۆدۈرۈشلىرىمدە سېنى كۈتمەيمەن، چايقىلىشلىرىمدا ساڭا ئېسىلمايمەن،بىلىمەن يىراقلاشماس بولغان ھىسلار دولقۇنىدا سەن ھالسىز مەنمۇ ھالسىز.بىراق سەن سۇئالىمنى جاۋابسىز قالدۇرغان بۇ كۈن ، كېچىلەرنىڭ كۆزىدىن چىققان ياش، يۈرىكىمنى مىڭ پارە قىلىپ دېڭىزغا چېچىۋەتتى. نىمىشقا،بۇنچە رەھىمسىزسەن؟ نىمىشقا بۇنچە بىۋاپاسەن؟ نىمىشقا... يەنە نىمىشقا.. خاتىرەمنىڭ سەن ئۈچۈن يېزىلغان بەتلىرىنى يىرتىۋەتكىنىم بىلەن قەلبىمنىڭ ۋاراقلىرىنى يىرتالمايدىغانلىقىمنى ئۆكسۈپ تۇرۇپ ھىس قىلدىم . قارا، سەن ئۇيقىدا مەن يەنىلا كېچىدە.... 102 قانداق ئۇنتۇپ قالىمەن مېنى سۆيگەنلىرىڭنى، قانداق ئۇنتۇپ قالىمەن مېنى سېغىنىپ، ھەر كېچىدە مىڭ قېتىم ئۆلگەنلىرىڭنى ، قانداق ئۇنتۇپ قالىمەن، بىر-بىرىمىزگە ئايلانغاننى تاماشا قىلىشىپ،تۈن كېچىلەرنى، تاتلىق پىچىرلاشلاردا ،تاڭغا ئامانەت قىلغانلىرىمىزنى، يۈرىكىمدە ھىچ بولۇپ باقمىغان قىياندەك تۇيغۇلارغا ئەسىرمەن، سېنى كۆرگەندىن بېرى، سېنى يۈرىكىمگە قاتمۇ-قات يۇشۇردۇم يامان كۆزلەردىن، سېنى كۆرگەندىن بېرى، سېنىڭ كېچە-كۈندۈزلىرىڭنى ھاياتىمنىڭ ھەر بىر تىنىقلىرىغا قەدەر بىرلەشتۈرۈۋەتتىم ،سېنى كۆرگەندىن بېرى، سەندىن قاچماقچى بولغانلىرىم يادىڭدىمۇ، قېچىپ-قېچىپ يەنە سېنىڭ قۇچىقىڭغا يىقىلغان، سەندىن ئۇزاپ كەتكەن ئاشۇ كۈنۈم يادىڭدىمۇ، سەن تىۋىشسىز ئاھىڭدا دولقۇنلارنى يېرىپ دېڭىزلارغا كاۋاب قىلغان ، يادىڭدىمۇ سەن تۇنجى ۋە ئاخىرقى .. دەپ ئوقۇغان كىتاب يېپىلماس بولغان، مېنىڭ يادىمدا، تاش ئېتىلىپ دولقۇنلانغان كېچىلەر، غېرىپ ئىزلاردا تۇرۇپ قالغان. يادىمدا، يېشىل رەڭلىك تىلەكلەردىن كېيىن بىخلانغان ئارمان . يادىمدا، بۇ مۇھەببەتنى ئۈلۈمگىلا باش ئىگىدۇ دىگىنىڭ ۋە سۆزلەردىن يۈرىكىم، نىگاھلاردىن كۆزلىرىم تالغان، يەنە يادىمدا، قاناتلانغان ئورمانغا ئۇچۇپ كىرگەنلىرىمىز، يادىمد،ا ساھىلدا تاش تەرگەنلىرىمىز، يادىمدا، قوزغۇنلارنى قوغلاپ كۈلگەنلىرىمىز... نەقەدەر شېرىن ،نەقەدەر گۈزەل كۈيلەر، ئۈن-تىنسىز سەندىن يىراقتا تۇرۇپ ،ساڭا يېقىنلىشىۋاتىمەن. 103 تاتلىق ۋە ساددا كۈلۈمسىرەشلەرگە تولغان ئارمانلىرىمدىن رەڭلىك يىپ ئەشتىم. روھىم چوڭقۇر خىياللار ئارىسىدىن ئاستا مېڭىپ چىقىپ، بۇ يىپنى ئۇچىسىغا ئارتىۋىدى گۈل بەدەنلىك نازىزىنغا ئايلاندى خۇددى ئون سەككىز ياشلىق مەلىكە بولۇپ ، ئاھ، شۇ چاغ سېنىڭ ياپراقلىرى سايە يايغان ئارچا تۈۋىدە مۆكۈنۈپ تۇرۇپ بۇ نازىنىنغا كۆز تاشلىغىنىڭنى ۋە سۆيۈپ قالغىنىڭنى يەتكۈزدى پەرۋانە شاماللار نازلىق ئۇيۇلۇپ. تىپچەكلەشلەرگە تولغان رېتىملاردىن لەرزىگە كەلگەن كۆكرەك قەپىزىمدىكى مىڭلىغان تۇياق ئاۋازلىرى ساڭىمۇ ئاڭلاندى. ئىككىمىز بېشىمىزنى تەڭلا كۆتۈرۈپ قارىدۇق، قىزاردۇق،يېيىلدۇق. بىزنىڭ يېيىلىشلىرىمىز يامغۇردىن كېيىن، ھەسەن-ھۈسەن بولۇپ چاقنىدى، جىمى ئالەمنى زوقلاندۇرۇپ 104 قەلبىمدىكى سەرگەردانلىقتا ئېزىقىپ قېلىشتىن قورقمايمەن. چۈنكى سەرگەردانلىقىمدىكى ھەر بىر بۇلۇڭ-پۇچقاقتىمۇ سەن. سېنىڭ قەلبىڭگە سوزۇلۇپ كىرىۋىتىپ، يات نەزەرلەرنىڭ چاقناپ قېلىشىدىن ئۆلگۈدەك قورقۇمەن. چۈنكى، چۈنكى بىلىسەن، مېنىڭ قىلدىن ئىنچىكە يوللارنىڭ زىخلىرىغا يەم بولغۇم يوق! 105 كۈز بۇلۇتلىرىدەك سۈزۈكلۈكلەردىن مەستخۇش بولغان ئالەمنىڭ رايىغا بېقىپ قاچانغىچە ئۆتىمەن بۇنداق؟ ئۇنتۇلۇپ كەتكەن قەدەملىرىمنىڭ، ئىشىكسىز ئۆيلەردە پىرقىراشلىرىغا ئەمدى تاقىتىم قالمىدى،ئەركىن قۇش كەبى ئورمانلاردا قانات قېقىشنى ئىستەيمەن. تەگسىز مۇڭ قاپلىغان كۆزلىرىمنىڭ ئىلتىجايىدىن مەكتوپلار سالدىم. كىم بىلىدۇ، مەكتوپۇمنىڭ جاۋابى كىملەرنىڭ يۈرىكىدە قالدى مىجىقلىق؟ 106 ئېيتقىن جېنىم ماڭا ئېيتقانلىرىڭ راستمۇ؟ سەندە غايىپ بولغان ئەستىلىكلەر ھىچ تارتىشىقسىز ئۇزىغانمىدى؟ ئوقۇشنى باشلىغىنىڭ راستىنلا قولۇڭدىن چۈشۈرەلمەيدىغان كىتابمىدى؟ يۈرەك رېتىمىڭ يېنىك دەسسەشلىرىمدە تىترەپ يېڭى شېئىرلار توقۇغانمىدى؟ راستمۇ،بۇلارنىڭ ھەممىسى راستمۇ؟ مەن... كېلىشىم بار كېتىشىم يوق جانانىڭ؟ سەھەر سەلكىنلىرى قونغان تاڭلاردىن ئەۋەتكەن شەبنەملەردە چاڭقىغانلىرىڭ؟ دولقۇنلارنىڭ بىردە لەرزان بىردە شىددەتلىكلىكى ، ئىزدەشلىرىڭ ؟ كېچە ئاسمىنىدىكى ئاي، جانىڭغا ئويۇلغان مەن كەبى مۆھۈرلىرىڭ؟ راستمۇ ،بۇلارنىڭ ھەممىسى راستمۇ؟ ئۆمۈر بېتىڭگە ئاي بولۇپ قونۇپ ،مەڭگۈلۈككە سوزۇلغان مۇھەببەتنىڭ بىر يۈزىنى تەڭلا سۆيۈشلىرىمىز؟ كۆيۈۋاتقان دېڭىزلارغا يېيىلىشلىرىمىز؟ ساداسىز سازنى تەڭلا چېلىشلىرىمىز؟ يۈرەكنىڭ بەتلىرى لىققىدە تولغان ئاشۇ پىنھانغا چۆكۈشلىرىمىز؟ ئاھ... بۇلارنىڭ ھەممىسى راستمۇ؟ 107 شادلىق كەلكۈنلىرىگە يەم بولدۇم مەيلى دىدىم، يىڭنە ئۇچىدا يۈرىكىنى تەشتىم مەيلى دىدىم، گۇناھسىز تۇيغۇلاردا مەيگە تولدۇم، مەيلى دىدىم. مەيلى، چەكسىزلىككە قاراپ سوزۇلۇۋاتقان ئاخىرقى تاڭنىڭ ئېتىشلىرىغا تاغدەك ئىرادەم، كۈمۈش چوققىلاردەك جاسارىتىم بار. 108 قۇش بولۇپ قونۇشلىرىڭ بار باغۋەنسىز باغلاردا مۇڭسىراپ ئولتۇرسام .ئەنە شۇنىڭدىن بېرى گۈللەرگە مەپتۇن بولدۇم، ھاردىم تالدىم دىمەي گۈل ئۆستۈرەتتىم، سۇ قۇياتتىم، تۈۋىنى يۇمشىتاتتىم ،ئوغۇت تۆكەتتىم. ئەجرىمنىڭ مەھسۇلى گۈللىرىم بىر-بىرىدىن رەڭدار ۋە پورەك ئېچىلىشىپ خۇش پۇرىقىدىن كىشىلەرنى ھوشسىزلاندۇرۇشقا باشلىدى. ساختا ئۇنىڭ گۈلى دىيىشتى، جانسىز ئۇنىڭ نۇرى دىيىشتى، پۇراقسىز ئۇنىڭ ھىدى دىيىشتى. بىراق گۈلنى تۇنۇيدىغان ھەقىقىي گۈلچىلەر بەس-بەستە تالىشىشقا باشلىدى.بىراق ئوتتەك مىھرىم،مۇھەببىتىم بىلەن ئېچىلدۇرغان بۇ گۇلنىڭ مېنىڭ باغرىمدىن ئايرىلسا نەپەسسىز قالىدىغانلىقىنى، مېنىڭ بوستانىمدىلا بەرق ئۇرۇپ ئېچىلالايدىغانلىقىنى ئىككىمىزلا بىلەتتۇق. 109 بۇ ئۇيقىسىز تۈننى ساڭا قويغىنىم ئۈچۈن ئەپۇ سورايمەن ئامرىقىم، ئامالسىزلىقنىڭ زەنجىرلىرىگە باغلىنىپ بۈگۈن كېچە دېڭىز بويىغا چىقالمىدىم. سېنىڭ ھارغىن قەدەملىرىڭ، ئۈمىدسىز كۆزلىرىڭ مېنى تالجىقتۇرماقتا. مەن قاراڭغۇلۇق ئىچىدە ئولتۇرۇپ سېنىڭ ھەر بىر ئېغىر تىنىشلىرىڭنى ئاڭلىماقتىمەن، تىۋىشلىرىڭغا يىقىلماقتىمەن. مېنى ئەپۇ قىلغىن!چوڭقۇر تىنىقلار ئىچىگە سېنى تاشلاپ قويغان سۆيگۈمنى ئەپۇ قىلغىن، مېنى سۆيگەنلىكىڭ ئۈچۈن يالغۇز قالدۇرغان دەملىرىمنى ئەپۇ قىلغىن، زوراۋان سۆيگۈمنىڭ ئىسكەنجىسىدىن بوشىنالمىغان بۇ كېچە ھەممىنى ئەپۇ قىلغىن ئامرىقىم! سەن ئۇلۇغ كىچىك تىنىشتا، مەن تۈن زۇلمىتىدە ، روھ ئىسكەنجىسىدە... 110 كېچىچە تىڭشاپ چىقتىم دېرىزەم تۈۋىدىكى سازىڭنى،لېكىن چىقالمىدىم. تۈن بويى ئۇخلاپ چىقتىم ئۇيقىلىرىڭنى پارقىراپ ئولتۇرۇپ، لېكىن دىيەلمىدىم. سەھەر سۇبھىلەردىن مەكتوپ سالدىم،بىراق يەتكۈزەلمىدىم . قىزىرىپ چىققان قوياشتەك ئوت بولۇپ ياندىم،بىراق كۆيدۈرەلمىدىم. ئىمكانسىزلىقنىڭ يىپلىرىدا ئۆزەمنى بىر-بىردىن ئېشىشقا باشلىدىم سېنىڭ يېپىنچا قىلىپ ئارتىشىڭ ئۈچۈن،بىلمەيمەن كەچكىچە بۇ يېپىنچامنى قولۇڭغا يەتكۈزەلەمدىم ؟ بۇ يازمىنى ئاخىرىدا بەرگىيە تەھرىرلىگەن. ۋاقتى 2013-10-22 13:28

بەرگىيە · ۋاقتى: 2013-10-26 19:37:17


	111 نىمە بولۇۋاتىمەن،ئەي... دىگەنىدىڭ كۆزلىرىمگە غەمكىن تىكىلىپ تۇرۇپ. ئوت بولۇپ كۆيۈۋاتقان تۇيغۇلىرىمدا مۇھەببىتىمنى قورۇشقا باشلىدىم. كاۋاب ھىدىدىن مەست بولغان كېپىنەكلەر گۈللۈكلەردىن بىزار بولدى . مەن جۇدۇن-چاپقۇنلۇقتىكى ۋايساشلارغا تولغان خاتىرەمنىڭ بەتلىرىنى يىرتىپ ئېلىپ ئاققۇ ياساپ سۇغا قويۇۋەتتىم .بار، خالىغان مەنزىلىڭگە بار،ۋايساشسىز دۇنيارىڭنى تاپ! مەن نىمە بولۇۋاتىمەن،ئەي... دىدىم تاغلاردىن قايتقان ئەكىس سادايىڭنى يۈرىكىمگە سولاپ ئولتۇرۇپ. 112 خىيابان يوللىرىمدا ۋاقىتنىڭ ئىزلىرى ئالدىراش چېپىشماقتا .پەرىشانلىقتا مەي بولغان تۇيغۇلىرىمنى ئۇنىڭ قوللىرىغا تۇتقۇزغۇم يوق، ۋاقىتنىڭ ئالدىراڭغۇ تاپانلىرىدا پېتىقدىنىلىشىغا تېخىمۇ رۇخسىتىم يوق،بىراق، توزۇندى مىنۇت-سېكۇنىتلار ئازاب دەريالىرىنىڭ قەدەھلىرىنى لىقلىتىۋاتقان بۇ پەيتتە كىممۇ مەيلى بويىچە ئىش كۆرەلىسۇن. ئۆرلەۋاتقان غەم دولقۇنلىرىغا چۆمۈلۈپ چىققان ھاياتلىقىمنىڭ يىلتىزىدا ئولتۇرغانلارغا قاراپ باش چايقىدىم. تۇرۇڭلار، تاڭ ئاللىبۇرۇن ئاتتى.ئۇلار ئۇيغاقتەك نەپەسسىز ھالىتىدە مەيۈس كۈلۈمسىرەشتى. شۇ تاپ چىن تۇرمۇش ساداسىغا زار بولغان يۈرەكلەرگە توۋلاشلىرىم بار،تۇرۇڭلار، ئۈلۈم يىللىرىنى ئۆتكۈزۈۋىتەيلى، ھاياتلىق لەھزىلىرىدە كۈلەيلى! 113 ھىجران ھىسلىرىغا يەنە بۆلەندىم.تومۇرلىرىمدىكى مۆكۈشمەك ئوينايدىغان زارىقىشنىڭ شوخلۇقى جېنىمغا پاتتى .بۈگۈن كېچىدىكى چۈش سەيلىسىدىكى تەنھالىقىمنىڭ ھەسرىتى باغرىمنى تىلغاپ، ماڭا ئەسەبىي سېغىنىشنىڭ لىقلانغان قەدەھلىرىنى سۇناتتى.بىر خىل ھارغىن ئۇيقۇ سىماسىغا مەپتۇن بولغان كۆزلىرىمنىڭ قارچۇقىغا مەھكەم جايلاشقان، سېنى كۆرەلمەسلىكنىڭ دەردىنى قاچان ئېيتىپ بولىمەن؟ بۇ بارسا كەلمەس يولدەك، تۈگىمەس شېرىنلىككە بۆلەنگەن ھىكايىلىرىمنى ئاڭلاپ ھارمىغىن!مەن سېنىڭ سەپىرىڭدىكى بارلىق قايغۇ- ھەسرەت،مۇھەببەتكە ھامىلدار بولغۇچىمەن. 114 ھارغىن دۇنيانىڭ ئاۋايلاپ مېڭىشلىرىدىن غۇدىرىدۇق.بىز يۈك بولغۇچىلارمىدۇق،يۈك توشۇغۇچىلارمىدۇق؟ 115 خەيىرلىك دەملەردىكى باھار زوقىنى كۈزنىڭ سارغايغان ياپراقلىرىغا چىگىپ قويدۇم .ئۇياتچان چىھرىمدىكى شادلىق شەلپەرلىرىنىڭ رەڭلىرى قونغان ئاشۇ ئۇچرىشىشنىڭ تەمىنى يۈرىكىمنىڭ لەۋلىرى تېتىماقتا ئىدى. ھىس قىلدىڭمۇ؟ يۈزلىرىمدىكى شېرىنگىنە سۇلغۇنلۇق سېنى كۆرگەندىن بېرى باھار ئاپتىپىغا ئالماشتى .مەيىن تىنىقلىرىمغا قونغان تىنىقلىرىڭنىڭ لەززىتىدە ئۇخلاپ قالغان دۇنيانىڭ جىسمى تىترىمىگەنمىتتى؟نازاكەتسىز تۇرمۇشنىڭ ئالقانلىرىدا مىجىلغان يۈرىكىمگە قۇيۇلغان قىززىق قاندەك جۇشقۇنلۇقنى سېنى كۆرگەندىن بېرى تېپىۋالدىم. شۇندىن بېرى شادىمان قۇشلاردەك نۇرلانغان ئورمانلىقلىرىڭ ئارىسىدا ئۇچۇپ ھارمىدىم. 116 تونۇشۇش قانداق باشلاندى بۇ مۇھىم ئەمەس ئىدى. تېلىققان سۇكۇتلەر پەرياد ئۇرغان ئاشۇ ئاخشىمى ئىككىمىز تۇنۇشۇپ قالدۇق .ھاياتىم سېنىڭ شاماللىرىڭدا يېيىلدى.شۇ ئاخشىمى ئۇيقۇ قاچقان كۆزلىرىم كىرپىكلىرىم ئارىسىغا سېنى تىكىپ قويۇپتۇ . شۇندىن بېرى ھەر سەھەر كۆزلىرىمنى ئېچىپلا كۆز قارچۇقۇمغا سوزۇلۇپ كىرىۋاتقان قاراۋۇللۇقۇڭنى كۆرىدىغان بولدۇم. 117 ئەسەبىي تەشنالىقنىڭ باغرىغا بۆلەنگەن روھ قۇشلىرىمدىن ساڭا خەۋەر ئەۋەتىمەن. ئۇچقۇر لايغەزەل يوللارنىڭ توپىلىرىغا ئورالغان پەرۋانەمنىڭ قاناتلىرىنى سۆي!ھىجران يانتۇلۇقىدىن توكۇرلاپ چۈشۈۋاتقان ھاياجاننىڭ بويۇنلىرىغا قارا، كۆز ياشلىرىم سىڭگەن مارجانلار يالىلدىماقتا . ئەي ،كەچكى قوياشنىڭ نۇرلىرىغا چۆمۈلگۈچى ئاشىقىم ، سېنى كۈتىۋاتىمەن.بىغەم بولمىغىن!مەندە بۈگۈن ئورمان كەبى يېشىللىق مەۋىج ئۇرغان دولقۇنلارلا بار. دولقۇنلىرىم سېنى كاراب قىلغۇسى،كەل،ماڭا چۆك!كۈمۈشرەك ساھىللارغا بارچىنى قويۇپ قويغىن،ئەلەملىرىڭنى، تەشۋىشلىرىڭنى، ئىزتىراپلىرىڭنى !كەل،ئاقۇش بۇلۇتلاردىكى ھىسلىرىمنى ساڭا ئاتا قىلدىم.مۇرەككەپ دۇنيادىكى بارلىق غەملىرىڭنى مەندە يۇيۇۋەت، ساڭا شەپەق نۇرىغا ئورالغان قىزغىن قىزىللىقتىن گۈل تەييارلىدىم.ھاياتىڭ بۇندا رەڭلەنگۈسى! 118 كۈز كېچىلىرىنىڭ ئىزغىرىن شاماللىرىدىن تىترىمەس بولدۇم،مەن قوش نەپەس ئالغاندىن بېرى.. ئاۋغۇسىتتىن سىنتەبىرگە، ئۆكتەبىردىن نويابىرغا سوزۇلغان يوللاردا يۈگرەپ كېتىۋاتىمەن ۋاقىتنى ئىتتىرىپ. ئىغاڭشىغان ۋاقىتنىڭ بۇنچە ھورۇن ئىكەنلىكىنى تۇنجى قېتىم ھىس قىلىپ، بەزىدە ئەلەم بىلەن ئۈمچەيدىم.ئۈمچىيىشلىرىمنىڭ لەۋلىرىگە بارماقلىرىڭنى قويدۇڭ. جېنىم، غەيرەتلىك بول! دەپ پىچىرلىدىڭ. نويابىرنىڭ يىراقتىن كۆرۈنۈۋاتقان ھەيۋەت گەۋدىسىگە قاراپ كۆزلىرىم تالدى، يۈرىكىم تالجىقتى. ئۈمىد لىقلانغان شەربەتلەرنى شۇنچە سۈمۈرۈپ ئىچىپمۇ، تومۇز كەبى ئۇسسۇزلۇقتا چاك-چاك بولماقتىمەن. بەلكىم بىر ئۆمۈر بۇ قۇرغاق ئۇسسۇزلۇققا قېنىپ ئۆتەرمەن. مەن رازىمەنلىك بىلەن تىنىقلىرىمغا گۈل چەككەن تىۋىشلىرىڭنى تىڭشىغىنىمچە ھاسىراپ-ھۈمۈدەپ كېتىپ بارماقتىمەن. 119 كېچىلەرگە باغلانغان ھىسلار تىرىك ھىسلار، كېچىلەرگە باغلانغان خىياللار مۇھەببەتلىك خىياللار، كېچە زۇلمەت ئەمەس، قاراڭغۇلۇق يېيىلىپ تۇرسىمۇ ئۇنىڭدا قالىدۇ شۇنچە كۆپ ئاشىقنىڭ ھىدى ،قەدىمى، سۆيگۈسى. كېچە، ئۇ مۇلايىم ئانىدەك پاسىبان بولۇدۇ چىن يۈرەكتىن سۆيۈشكەنلەرگە، مەن كېچىگە باغلانغان خىياللىرىمنىڭ گىرۋىكىدە ئولتۇرۇپ دولقۇنلىرىمغا سېنى ئورايمەن . ھوجرىمىزنى رەڭدار گۈللەر بىلەن ياسايمەن،سېنىڭ سۇبھى بىلەن سوزۇلۇپ كىرىپ ئارام ئېلىشىڭ ئۈچۈن . جېنىم، تاڭ ئاتتى ئورنۇڭدىن تۇر، گۈل ھىدى گۈپۈلدەپ تۇرغان ھوجرىمىزدا، بەرگى سېلىنغان قىززىق چايغا، مۇھەببەتلىك سۆيۈشلىرىمنى چىلاپ ناشتا قىلغىن! 120 ھىچكىم ھىچبىلمەس مەندىكى بۇ سىرلارنى، بۈگۈن كۆڭلۈم بەكلا خۇشال بولدى. ھىس قىلدىم .بەزىدە تاغدەك ئالتۇنلار دۆۋىسى ئىچىدىمۇ مىسقالچە شاتلىققا زار بولۇپ ياشايدىكەنسىز. بەزىدە ھىچنىمە يوق تۆت تام ئىچىدە تۇرۇپمۇ ئىنتايىن تويۇنۇپ ياشايدىكەنسىز. مانا بۇ تۇرمۇش ئىكەن. كۆڭۈلنىڭ بايلىقى مۇھەببەت ،ئائىلىنىڭ بايلىقى مەسئۇلىيەت ئىكەن دەپ يېزىپ قويدۇم خاتىرەمگە . بۇ يازمىنى ئاخىرىدا بەرگىيە تەھرىرلىگەن. ۋاقتى 2013-10-26 19:38

زەينۇللا · ۋاقتى: 2013-10-26 20:32:52


	جېنىم، تاڭ ئاتتى ئورنۇڭدىن تۇر، گۈل ھىدى گۈپۈلدەپ تۇرغان ھوجرىمىزدا، بەرگى سېلىنغان قىززىق چايغا، مۇھەببەتلىك سۆيۈشلىرىمنى چىلاپ ناشتا قىلغىن! ____________________________________________________ ئايلىناي، ئايلىناي بەرگىيە خانىم. ئوبرازلىق ئىپادىلەشلەرگە نېمانداق باي سىز. ئىنشائاللا، پىچىرلاشلىرىڭىزدىن تولىمۇ خۇرسەن بولدۇق.

قاراتۇغ · ۋاقتى: 2013-11-6 14:02:25


	مېنىڭ شېئىر يېزىپ قويغۇم كەلدى. دەۋرىگەن مېنۇتلار كەلگەندە ئۇچۇپ، دىلىمدىن سىرغىدى ساڭا بارلىقىم. كەلگەندە ئېچىلىپ نۇرلۇق جامالىڭ، يېڭىدىن باشلاندى مېنىڭ ھاياتىم. كىرمەكتە تۇيغۇمىز شەھەرگە بىللە، نىشانىم قېتىلدى ئالقانلىرىڭغا. ئۆتمەكتە مۇھەببەت دەرىزىلەردىن، قارچۇقۇڭ نۇرلاندى ياپقانلىرىڭدا. بېغىشلاش نەقەدەر چوڭقۇر مۇھەببەت، چۆكەيلى قۇياشنىڭ قىزغىن لېۋىگە. ئېچىلدى يىراقتا تۇرغان بىر دېڭىز، چايكىلار ئۈن قاتتى سۆيگۈ كۈيىگە. ئۇزاققا تارتىلغان قىزغىن ھاياجان، ئىككىمىز ئۆرلىگەن كۆكتە يايرىدى. نۇرلاردىن سۇ ئىچكەن چەكسىز باياۋان، ئىككىمىز ئۇسسىغان يەردە ئايرىلدى. --------

لالە · ۋاقتى: 2013-11-12 02:07:22


	ھەرقېتىم مۇشۇ پىچىرلاشلارنى ئوقىسام ئۆزەمنى ئۇنتۇپ گۈلنىڭ بەرگىگە ئايلىنىپ قالغاندەك سىزىمەن .مىھرىبان قۇياشىمنىڭ بىر سوئالى ئىسىمگە كېچىدۇ .‹‹گۈل چىرايلىقمۇ ؟بەرگىمۇ ؟›› مەن مۇشۇ پىچىرلاشلارنى ئوقىغان تىنىقلىرىمدا لالەنىڭ بەرگىگە يېنىش -يېنىشلاپ سۆيۈپ قويىمەن .

بەرگىيە · ۋاقتى: 2013-11-15 18:16:58


	لالە يوللىغان ۋاقتى 2013-11-12 02:07 ھەرقېتىم مۇشۇ پىچىرلاشلارنى ئوقىسام ئۆزەمنى ئۇنتۇپ گۈ ... لالەم ، بەرگىلەردە شەبنەم تامچىسى بارمىكەن؟ ئۇنى ئاۋايلاپ ئالدە يۈرىكىڭنىڭ قەدىمقى دەۋرىدە چوقان سال!