تۇرسۇنئاي سۇلتان : پىچىر-پىچىر (نەسرلەر)

بەرگىيە · ۋاقتى: 2013-3-2 23:14:41


	پىچىر-پىچىر نەسىرلەر تۇرسۇنئاي سۇلتان بەزى-بەزىدە مۇشۇنداق پىچىرلاپ سالىمەن ئۆز-ئۆزۈمگە،تاما-تاما كۆل بولار دەپ پىچىرلىغانلىرىم يىغىلىپ قاپتۇ. يوللاپ قويسام باشقىلارنىڭ پىكىر ۋە پىچىرلاشلىرى بىلەن قوشۇلۇپ يېڭى دولقۇن ياساپ قالسا ئەجەپ ئەمەس 1 بوۋاقنىڭ كۆزلىرىدىكى بىغۇبارلىق نۇمۇسچان ئىككى غۇنچىنىڭ كېلىپ ئۇنىڭ كۆزلىرىنى ئۈپۈشىدىن كەلگەن،بىز بوۋاق كۆزىدىكى بىغۇبار نۇر بولالارمىزمۇ ياكى بوۋاق كۆزىگە نۇر بەرگەن غۇنچە بولالارمىزمۇ؟ مەن دېڭىزنى كۆرمىگەن بىراق دېڭىزنىڭ ھەيۋەتلىك دولقۇنلىرىنىڭ خەندانلىرىنى ئاڭلىغان يۈرىكىمدە، قۇمساڭغۇ ساھىللارنى كۆرمىگەن،بىراق كۈمۈش رەڭ تەبەسسۇملارغا ئوخشايدىغانلىقىنى بىلىمەن. ئاھ بالىلار بىپايان دۇنياغا تەۋە بولغىنىدا ،شاماللار يولسىز ئاسمانلاردا ئۇچقىنىدا،كېمىلەر سۇ ئۈستىدە ئوينىغىنىدا ھاياتلىقنىڭ بەك رەڭدار،ئۆزگىچە گۈزەل ئىكەنلىكىنى ھىس قىلىپ قىيالمايمەن يەنە بىر ياش چوڭ بولۇپ كېتىشلىرىمگە... كېلىڭلار،بىپايان دۇنيانىڭ مەلىكە-شاھزادىلىرى، ھاياتىمىزنى مەنىلىك ئۆتكۈزۈش ئۈچۈن تىرىشايلى،شۇندىلا ئۆكۈنمەيمىز ئىھتىمال سانسىز يېڭى يىللار بىزنى قۇچاقلىيالمىسىمۇ... 2 مۇھەببەت-سەن بىر نۇرسەن،سەن شاۋقۇنلۇق دېڭىزنىڭ تەكتىدىكى ھىسسىياتلىق قايناملار تەرىپىدىن سۈزۈپ ئېلىنىپ ئايرىۋىلىنغان بىر قەترە نۇرسەن. سۆيگۈ تارىمدىن ياڭرىغان ئاشۇ سېغىنىش ھىسلىرىمنى شۇ تاپتا يىگانە گۇگۇم قاراڭغۇسىدا تۇرغان قەلبىمدىن ئۆزگە سەن ھىس قىلالامتىڭ؟ قىيالماسلىقلىرىم ساڭا بولغان مۇھەببىتىم ئەمەسمىتتى؟ سېنى ئەبەدىي يوقىتىپ قويغىنىمدا ئاندىن ساڭا ئېرىشىپ قالدىم سەۋدالىق ھىسلىرىمنىڭ تۇيغۇلاردا سېنى چىڭ قۇچاقلاشلىرى ئىچىدىن سېنى سۇغۇرۇپ ئالالماي قىينالدىم.بىراق تۇيغۇ ئىچىدىكى سەن مېنىڭ ئىدىڭ ئەبىدىي شۇ يەردە ياشايىتتىڭ شۇ قەدەر خىرامان شۇ قەدەر سەگەك. مۇزدەك تەكەببۇرلۇقلار ئارىسىغا مېنى ئەمەس مۇھەببىتىمنى كۆمۈوپ قويساڭچۇ بۇنچە تىترىمەس ئىدىم سېنى كۆرگەندە.. قايتىش دەريالىرىغا چۆمۈلگەن ناتىۋان نىمجان بېلىقنىڭ ئاھى بارچە ناخشىلاردىن كۈچلۈك ئېيتىلىۋاتاتتى.بىراق سەن ئاڭلىمايلا ئۇخلاپ قالدىڭ ئەزىزىم. مېنىڭ مۇلايىملىق بىلەن ئايلىنىۋاتقان قەسرىمدە قالغان ئىزلار شۇنچىلىك قەبىھ ئىكەنكى ئۇ ئۈستىگە بىر قەۋەت نېپىز قىرۇ چۈشۈشنى ئەسلا خالىمايدۇ ھەم چۈشكۈزمەيدۇ. گۈل بەرگىدىكى شەبنەمنى سۆيۈپ قويۇڭلار دىمەيمەن ئەسلا،ئاشىقمەن شۇ قەدەر سەۋدا،قاراڭ چىراق نۇرىدا شۇنچىلىك نازۇك ئۇ شەبنەم،گۈلنىڭ تىترەڭگۈ ياپراقلىرىدا يالتىراۋاتىدۇ. 3 كىم مېنى چاقىرىۋاتقان سۈزۈك شىلدىرلاشلاردا ، كىم مېنى چاقىرىۋاتقان كۆيۈۋاتقان گۈلخانلاردا. كىم مېنى چاقىرىۋاتقان پايانسىز ئۇپۇقتىكى شەپەقلەردە، ئەي جېنىمنىڭ ئۈستىدە قىلىچ ئويناتقۇچى،كىملىكىڭنى ئاشكارە قىل كۆزلىرىم يۇمۇلماستا! تەلەپكار بىلەكلىرىم بىلەن جىسمىڭنى تۇتۇپ قالالىشىم مۇمكىن بىراق روھىڭنىچۇ؟كۆزلىرىڭدىكى .ئۆچمەس ئوتلارنى يېلىنجاتما ئاشىق، سېنى قويۇپ بەردىم، يولۇڭغا راۋان بول،نىقابىڭنى يىرتىپ تاشلىۋەتكىنىمدىن ئەپسۇسلانما،روھىڭدىكى سۆيگۈڭنى رومال قىلىپ ئارتىۋىلىشىڭ ئۈچۈن ساڭا يېلىنىمەن. ئېيتىۋاتقىنىمنىڭ قانداق ناخشا ئىكەنلىكىنى بىلمەيمەن،بەلكى سەنمۇ بىلمەيسەن. بىراق بىلىدۇ سېنىڭ لەۋلىرىڭدىكى يۇشۇرۇن كۈلكە،ساڭا كۈلكەمنى بېرىۋىتىپ ئۆمۈر بويى كۈلەلمەسلىكنىڭ لەززىتىنى سۈرۈۋاتىمەن شۇ تاپ. سەھەر،بەرگىدىكى شەبنەم مۇز بولۇپ قاتىدىغان ۋاقىتتا مەن ئۇيقىدىن ئۇيغانغىنىمچە سۈرەن سالدىم، ئەي قاراقچى،بىئاۋاز كۈيلىرىمنى قايتۇرۇپ بەر! 4 قارلار مۇنداق دەپ ناخشا ئېيتىۋاتىدۇ،بىز ئاپئاق،بىز پاك،بىزنى دەسسىمە ئەي ناپاك،ياخشىلار قۇرۇق ياشاپلا ئۆتمە ،بولغىن يامانلارغا نۇر-ماياك. ئاڭلاپ بېقىڭچۇ،ئۇلارنىڭ ناخشىسى يېقىملىقمىكەن؟ مەڭگۈلۈك سۆيۈش كىچىك بولمىغىنىدا ئىدى ھەقىقىي مۇھەببەت ئىگىسىنىڭ يۈرىكىنى يېرىپ تاشلىۋەتكەن بولاتتى.كۈز كۈنىدىكى ناخشىسى يوق سارغايغان ياپراقلارنىڭ بېتىدىن بۇ قۇرلارنى ئوقۇۋالدىم. ناۋادا باغرىم بىپايان چەكسىز قۇملۇقتەك قاغجىراپ تۇرسا ئېيتە ئامرىقىم سەن يېشىل چۆپ بولۇپ ئۈنەلەمتىڭ؟ھىس قىلغىن يۈرىكىمدىكى ساڭا ئوزۇق قانلارنىڭ ئاستا-ئاستا مىھىرسىزلىكنىڭ باياۋىنىدا قۇرۇپ كېتىۋاتقانلىقىنى،قورقۇۋاتىمەن،ناۋادا باغرىم قاغجىراق قۇملۇق بولۇپ قالسا،ئاھ.... ئىنتىلىشنىڭ خىيالىي مەنزىرىسى ئىچىدە تۇمانلارغا ئورالغان سەن يېنىككىدە جىلمىيىپ تۇراتتىڭ، ئەي جېنىمنىڭ جاپاسى زالىم،دۇنيانىڭ ئۆتكۈنچى ئادەمدەك ھامان بىر كۈنى يېنىككىدە قەدەملەردە كېتىپ قالىدىغانلىقىنى ئۇنتۇپ قالمىغىن! ھەممىسى مېنىڭ كىملىكىمنى سورىشىۋاتىدۇ ،مەن ئاستا جاۋاب بەردىم «مەن پەقەت بىر گۈل» گۈل-ئىكەنلىكىمنى بىلىش مېنى مەغرۇرلاندۇردى .بىراق خۇشپۇراق چېچىش-چاچالماسلىقىمنى بىلمەسلىك مېنىڭ بېشىمنى ئاستا ئەگدۈردى. 5 يۈرىكىمنىڭ ھايالىق بېغىنىڭ ئەزىز مىھمىنى سېنى قاچان يۈتتۈرۈپ قويغانلىقىم ئېسىمدە يوق ئەمما سېنىڭ قاچان كۆڭۈل ئوردامغا سۇلتان بولۇپ كىرگىنىڭ ھازىرقىدەكلا ئېسىمدە تۇرۇپتۇ.ئالدىڭغا كۈلۈپ چىققىنى چېچىنى ئىككى بۇغۇۋىلىپ يەر ئاستىدىن ساڭا ئوغۇرلۇقچە قاراپ كۆز نۇر ئوقۇڭغا بەرداشلىق بېرەلمەي ئارقىغا بۇرۇلۇپ قاچقان سەبىي قىز ئىدى،ئىلتىجالىق تەلمۈرۈشلىرىڭنى يۈرىكىگە مەھكەم سولىۋالغان شۇ قىز سەبىلىكىدىن ئايرىلىپ باغرىڭ تامان يول ئالغاندا سېنى يۈتتۈرۈپ قويدى.بىراق قاچان يۈتتۈردى بىلمەيدۇ،ئۇنىڭ ئەسلىمىسىدە پەقەت ئاشۇ تۇنجى ئۇچراشقاندىكى لەزىز تۇيغۇلار قېتىپ قالغان ئىدى. 6 تىترەڭگۈ سىۋەتلەرگە لىققىدە سېلىۋالغان گۈللەرنىڭ ئازابى يوقمىدۇ دەيمەن.يىللارنىڭ توزانىغا ئاسقان گۈلچەمبىرىكىمنى ئىزدەپلا يۈرۈۋاتىمەن.ئەي جېنىمنىڭ جانانى سەن شۇنى بولسىمۇ تاپساڭچۇ! ئۇيقىسىز جىمجىتلىقىمغا سېنى مەھكەم سولىۋالغىنىمنىڭ نىمە پايدىسى ئەي قاراقچى، قېنى قىلىچىڭ،مېنى چاپ ياكى بۇ ئۇيقىسىز تۈنلەرنى بېشىدىن جۇدا قىل ئۇنىڭدىن چاچرىغان قىزىللىق ئىچىدە كۆزلىرىمگە يۇشۇرۇنغان مۇھەببەتنى تەنتەنە قىلىپ چاقنىتاي! ياز بۇلۇتلىرى سېخىلىق بىلەن ئۆزىدە تۇرۇپ قالغان تامچىلىرىنى بەرگىلىرىمگە شەبنەم قىلىپ قوندۇرغان ئاشۇ پەيت سەن مېنىڭ گۈزەللىكىمگە ھەسەت قىلىپ مېنى تاشلاپ كەتكەن ئىكەنسەن. قەلبىم تەنھا قىيىق، ساھىلدىكى ئوينىغان ئۇسۇلىنى بىر كۆرسەڭ ئىدى قول قوياتتىڭ دېڭىزنىڭ نىمىشقا شۇنچە تىنىچ،دەريانىڭ نىمىشقا شۇنچە ھۇۋلاپ شاۋقۇن كۆتۈرىدىغانلىقىغا. مېنى ئارامىمدا قوي،ئارامىمدا قوي دەيمەنيۇ بىر مىنۇتمۇ خىيالىمدىن كۆتۈرۈلىشىڭگە رۇخسەت قىلالمايمەن 7 ئۆزۈمنىڭ كۆلەڭگىلىرى يوللىرىمنى توسۇپتۇ سېنىڭ ئەمەس،نۇرسىز قايغۇلىرىمنىڭ رەڭگىدە شېئىر يېزىۋاتقان ۋاقتىمدا قىپ-قىزىل سىياھلارنى شۈمەۋاتقان ئازابلىرىمنىڭ گۇۋاھچىسى بولۇپ قالىسەن چوقۇم،بىراق شۇ چوقۇملارنىڭ قوينىدا تۇرۇپ جان بېرىۋاتقىنىمدا كەلمە زىنھار، ساڭا تاتارغان چىرايىمنىڭ ئاخىرقى تەلمۈرۈشلىرىنى يادنامە قىلغۇم يوق! چۈش ئۆڭكۈرلىرىدىكى ئاشۇ خۇشاللىقلار ئۈچۈن بىر ئۆمۈر ئۇيغانماسلىقنى ئارمان قىلاتتىم،بىراق،مۇھەببەت گۈللىرىمدىكى شەبنەملەر مېنى تىنماي سۆيۈپ ئاخىرى مېنى ئۇيغاتتى،دىمەك مېنى بۇ ئالەمدە زار،ئۈزۈلمەس شاتلىقلارغا خار قىلدى.ئاھ،ئۇلۇغ رەببىم مېنى ئەقىدىگە يار قىلدى،دىمەك مەن بەخىتلىكمەن.سۆيۈشنى بىلىشنىڭ ئۆزىمۇ بەخىت شۇنداق ئەمەسمۇ؟ 8 مۇھەببەتكە نائىل بولالمىغان ئىنتىزارلىقنى ئازاب دىمە سۆيۈملۈكۈم،ئۇ ئىنتىزارلىق بەك شېرىنغۇ... توپا ئۆرلىگەن چىغىر يوللارنى مىسكىن دىمە ئامرىقىم،ئۇنىڭ يۈرىكىدە تىنماي مېڭىۋاتقان جۇپ قەدەم ئىزى بار،شۇنداق يولدا تىنماي شۇ ئاۋازنى ئاڭلاش بەك تاتلىققۇ... تەشنالىقنىڭ رەسىملىرى ئۇپۇقتا ئېسىلىپ تۇرۇپتۇ، قوياشنىڭ ئاخىرقى نۇرىدا ئۇ قىپ-قىزىل تاۋلىنىپ كۆزلەرنى قاماشتۇردى قارىغىنا،ئۇ بەك گۈزەلغۇ... خىيالچان كۆزلىرىمدە ئۇزاپ كەتكەن ئاشۇ سىمانى مەڭگۈلۈك قارچۇقلىرىمغا سولىۋالغان مەن زىمىننىڭ يۈرىكىدە تۇرۇپ ئارماننىڭ باغرىدا ئېرىپ سېغىنىشنىڭ رومالىغا ئورۇنۇپ ئولتۇرۇپ شۇلارنى خىيال قىلغىنىمدا ئۆزۈمنى بەخىتلىك ھىس قىلغان ئىدىم. 9 تۈنۈگۈن ئۆتۈپ كەتتى، تۈنۈگۈن يىغلاپ قالدى،بۈگۈننى يىغلاتمايلى،ئۇلۇغ رەببىم ئاتا قىلغان كۈنلەرنى يىغلىتىشقا نىمە ھەققىمىز بار؟ باھار كەلدى،ئۇيغان قەلبىم خۇددى غەپلەت ئۇيقۇسى ئېچىلىۋاتقان چېچەكلەر كەبى،جىمجىتلىققا يەم بولما ھاياتىم،ھەتتا ئۆز ئاۋازىنىمۇ ئاڭلىيالمايدىغان زۇلمەتلەر قوينىدا قېلىش بەك خەتەرلىك،مېڭىۋاتقان يوللىرىمنى يورۇتۇۋاتقان ئازابلارغا رەھمەت ئېيتقىن يۈرىكىم،كۆزلىرىمگە تارتقان تورلارنىڭ ئىسكەنجىسىدىن سېنىڭ سادايىڭنىڭ ھىممىتىدە بوشىنالىدىم. 10 ھاياتىمنى نىمىشقا بەربات بولدى دىگۈدەكمەن،كۆك قايغۇ بۇلۇتلىرى بىلەن ئورالغان، چاقماق بۇلۇتلارنىڭ پەردىلىرىدىن بوسۇپ ئۆتۈپ زىمىنغا ئالايغان بولسىمۇ بىراق مەن ئاشۇ يەردە تۇرۇۋەردىم. چۈنكى يۈرىكىمدە، قەلبىمدە چەكسىز ئەقىدە ۋە مۇھەببەت پۈتۈكلىرى ياسىغان سېپىلدىن ھالقىپ ئۆتۈپ كەتكۈدەك جاسارەتنىڭ بارلىقىنى ئاللىبۇرۇن تۇيغان ئىدىم. بۇ يازمىنى ئاخىرىدا ئەلقىزى تەھرىرلىگەن. ۋاقتى 2014-2-6 02:26

ئارتۇچ · ۋاقتى: 2013-3-3 01:04:29


	ئىلھاملىرىڭىز تېخىمۇ قانات قاققاي .

ئەلرام · ۋاقتى: 2013-3-3 12:00:39


	«پىچىرلىشىڭىز» ناھايىتى مەنىلىك ھەم يېقىملىق چىقپتۇ،ياقتۇردۇم.

مۇنىرە ئالىم · ۋاقتى: 2013-3-5 16:33:05


	بەرگىيە، مۇڭلۇق تىۋىشلارنى بۇ يەردە تىڭشاپ سىزنى سېغىنىپ قالدىم. سىزنىڭ ھەربىر مۇڭلىرىڭىزنىڭ مېھمىنى بولغىنىم ئۈچۈن خوشالمەن.

ئەرتېكىن · ۋاقتى: 2013-3-5 17:51:17


	بەرگىيەنى ئەلكۈيى تورىدا كۆرگەندەك قىلىۋىدىم...

بەرگىيە · ۋاقتى: 2013-3-7 10:37:12


	ئە.خ.ئەرتېكىن يوللىغان ۋاقتى 2013-3-5 17:51 بەرگىيەنى ئەلكۈيى تورىدا كۆرگەندەك قىلىۋىدىم... تۇنجى بولۇپ تور دۇنياسىغا ئەلكۈيى تورى ئارقىلىق قەدەم باسقان ئىدىم.

بەرگىيە · ۋاقتى: 2013-3-7 10:37:41


	مۇنىرە ئالىم يوللىغان ۋاقتى 2013-3-5 16:33 بەرگىيە، مۇڭلۇق تىۋىشلارنى بۇ يەردە تىڭشاپ سىزنى سېغى ... رەھمەت دوستۇم، تەڭ پىچىرلىشايلى!

بەرگىيە · ۋاقتى: 2013-3-7 11:05:46


	پىچىر-پىچىر 11 شۇ تاپتا باھارنى ھىس قىلغان قەلبىمنىڭ تىپچەكلەشلىرىگە ۋاقىت ئاچچىق كۈلۈۋاتاتتى ،مەندە مۇھەببەتلىك سېزىم،ئۇنىڭدا غالىپلارچە تەنتەنە،بۇ پەرىققە مەغلۇبىيىتىم بىلەن تەن بەرمەسلىككە قەسەم قىلالارمەنمۇ؟ ئەسلىمىلىرىمنى بارچە گۈزەللىكلەرنىڭ جىمغۇرلىقىغا قالدۇرۇشنى ئارمان قىلدىم بىراق ئۇنداق قىلالماي ھەر بىر قەدەملەردە ئەسلەپ ماڭدىم.مانا بۇ مېنىڭ مەغلۇبىيىتىم ئىدى. ئۇياتچان سۆيگۈ سوۋغىسىنى يىللار بوينۇمغا پەم بىلەن ئېسىپ قويدى.بوينۇمدا يالتىراۋاتقان خىرۇستال كەبى سوۋغات ئۈچۈن قانچىلىك بەدەل تۆلىگەنلىكىمنى پەقەت رەببىم ۋە مەنلا بىلەتتۇق. سىز خۇشاللىقنىڭ تىترەشلىرىنى كۆرگەنمۇ؟ئۇنىڭ تىترىشى شۇنچىلىك جەزبىدار،شۇنچىلىك گۈزەل بىراق بەك قىسقا... 12 ئۇياتچان يالقۇنلار باغرىغا باش قويغان قوياش ئاللىبۇرۇن خوش دەپ قولىنى پۇلاڭلاتقان بولسىمۇ بىراق مەن تۇرۇۋەردىم ئاشۇ جايدا، مۇھەببەتتىن سەمرىگەن ئاي دۈپ-دۈگىلەك چەمبىرەك نۇرلىرىنى چېچىپ بولۇپ ئارامى ئۈچۈن سۇبھىنى ئەۋەتكىلى نە ۋاق،بىراق مەن تۇرۇۋەردىم ئاشۇ جايدا، قوياشنىڭ كۆكسىگە تىغ ئۇرغان بۇلۇتلار باغرىدىن تارام-تاراملار چۈشتى،ئۈستى-بېشىم چىلىققىدە بولدى كۆز ياشقا،بىراق مەن تۇرۇۋەردىم ئاشۇ جايدا، قۇمساڭغۇ ساھىللارنىڭ ئايىغىدىن ئۆمىلەپ كەلگەن بورانلاردا قانچە-قانچىلار ئۇچۇپ كەتتى قامغاق كەبى،بىراق مەن تۇرۇۋەردىم ئاشۇ جايدا، لەپ-لەپ پاختەكلەرگە ئايلاندى جاھان ئاپئاق قار قوينىدا،شىۋىرغان ھۇۋلىدى، زۇلمەت بوزلىدى ،زىمىستان ئۈزۈلمەس كۈيلىرىنى چالدى توختىماي،بىراق مەن تۇرۇۋەردىم ئاشۇ جايدا. كۆكتىن كەلدى سادا:-سەن كىمسەن بۇنچە جاھىل،كۈتكىنىڭ نىمە؟ جاۋاب بەرمىدىم. چۈنكى مەن سېنى ساقلاۋاتاتتىم. 13 داۋاملىق مۇھەببىتىم ۋە ئارزۇلىرىم ئارىسىغا يۇشۇرۇنغان بىرسىنى بايقىغان ۋاقتىمدا قەلبىم ئېيتقۇسىز خۇشاللىققا چۆمۈدۇ.سەن مۇشۇنداق خۇشاللىقنىڭ لەززىتىنى تېتىپ باققانمۇ؟ لەۋلىرىمدىكى تەبەسسۇمنى تارتىۋىلىپ ئۇنى يۇچۇن بىراۋغا سەدىقە قىلىۋىتىشتىن قىلچە ئۇيالمىدىڭ،بىراق لەۋلىرىمدىن ئايرىلغان تەبەسسۇم يات بىراۋنىڭ لەۋلىرىدە زەھەرگە ئايلىنىدىغانلىقىنى مەڭگۈ ھىس قىلالمايتتىڭ. مېنىڭ سۆزلىرىمنى خۇددى ئۆزۈڭنى چۈشەنگەندەك چۈشىنەلىسەڭتى شۇندىلا قەلبىمنىڭ تەكتىدىكى جاۋاھىراتلارنىڭ نىمىشقا بۇنچە پارقىراق ئىكەنلىكىنى بىلگەن بولاتتىڭ. دۇنيا ھاياتىمغا ئېقىپ كىرىۋاتقان ۋاقىتتا مەن ئاللىبۇرۇن كۆكتىكى يۇلتۇزلارغا نۇرلىرىمنى بېرىۋىتىپ ئۆچۈپ بولىمەن ئىھ سەن شۇ چاغدا قەيەردىسەن؟ 14 چۈش ئۆڭكۈرلىرىدىكى ئاشۇ خۇشاللىقلار ئۈچۈن بىر ئۆمۈر ئۇيغانماسلىقنى ئارمان قىلاتتىم،بىراق،مۇھەببەت گۈللىرىمدىكى شەبنەملەر مېنى تىنماي سۆيۈپ ئاخىرى مېنى ئۇيغاتتى،دىمەك مېنى بۇ ئالەمدە زار،ئۈزۈلمەس شاتلىقلارغا خار قىلدى.ئاھ،ئۇلۇغ رەببىم مېنى ئەقىدىگە يار قىلدى،دىمەك مەن بەخىتلىكمەن.سۆيۈشنى بىلىشنىڭ ئۆزىمۇ بەخىت شۇنداق ئەمەسمۇ؟ 15 سۇ ئۈستىدە ھاردۇق ئېلىۋاتقان شاماللارنى سۆيۈۋاتقان بۇژغۇنلارغا ھەسەت قىلىپ ھاردىم،قۇشلار ناخشىلىرىنى تاماملىغان گۇگۇمنىڭ قوينىغا بۆلىنىپ،كۆرگىلى بولمايدىغان سېنى كۈتۈشنىڭ لەززىتىنى ھىچكىمگە ئېيتمىدىم،چۈنكى ئۇلار لەزىز تۇيغۇلىرىمنى ئوغرىلاپ ئاپىرىپ ئايسىز كېچىدىنمۇ قارا بولغان تۇپراققا كۆمۈپ تاشلايدۇ.كەل،كەل،بىزنى ھىچكىم كۆرمىدى رەببىمدىن بۆلەك.كەل ،كەل،جالاقلاپ تىترەۋاتقان يۈرىكىمگە تىۋىشلىرىڭنى قوي،كۈندۈزى ئارام ئالالمىغان ئارزۇلار كېچە قوينىدا بۇ پىنھانلىقتا مەۋھۇم ئالسۇن ئارامىنى يۈرەكلەرنىڭ بېغىشىغا مەھكەم يىپىشىپ تۇرۇپ، كەل،كەل، يىتىمسىرىگەن ئاخشاملىرىمغا كەل! 16 سەھەرنىڭ تۈزلەڭگۈ ئوچۇقچىلىقىدىكى گۈزەللىكلەرنى يالغۇز تاماشە قىلىشتىن ھاردىم.كېچىدىن بېرى يېرىم مۈكچەيگەن ئايغا ئېسىلىپ ئۇچقان چۈشلىرىمنىڭ قوينىدىكى غەمسىز كۈلكىلىرىم قېنىكىنە؟ئاشۇ چاقماق دەقىقىلەرنىڭ مەڭگۈلۈك قېتىپ قېلىشىنى نەقەدەر ئارمان قىلاتتىم ھە،چۈنكى ئۇنىڭ قوينىدا مەن يېتەلمىگەن بارچە سۆيۈملۈك خۇشاللىقلار تەلتۆكۈس ئىدى. بىراق تەلتۆكۈس بولغان ھايات سېنى ئاسانلا زېرىكتۈرۈپ قويىدۇ بۇنى بىلىمەن. نىمىدىگەن قانائەتسىز يارالدۇق ھە..شۇ قانائەتسىز ۋۇجۇدۇمىزنىڭ ھامان بىر كۈنى توپىغا يەم بولىدىغانلىقىنى ھەر بىر مىنۇت ئەستە تۇتالىغان بولساقتى،ئازاب دەرىخىنىڭ ئاستىدا ئارمان بوپىسىنى كۆتۈرۈپ مۇڭسىراپ ۋاقىت ئۆتكەزمىگەن بولاتتۇق. 17 روھىمنىڭ شامىلىغا ئېسىلىپ تۇرۇپ قەلب ئېتىزىمغا تەرگەن گۈللەرنىڭ جۇلاسىنى تاماشە قىلىدىغان ۋاقىتلىرىمدا يەنىلا سېنىڭ يوقلىقىڭ بەك بىلىندى .يېڭى تاڭنىڭ سۈزۈك ھاياجىنىغا چىلانغان دەملەردە ئاستا قەدەملىرىڭ بىلەن كەلسەڭچۇ دەيمەن.بۇ گەپنى كۈندە بىر قېتىم ئېيتىۋاتىمەن. 18 تۇغۇلغان كۈنۈڭنى ئۆتكۈزۈۋاتىسەن، ھالبۇكى شۇ قەدەر خۇشالسەن، بىراق مەن قايغۇ بىلەن ساڭا قاراپ تۇرۇۋاتىمەن .چۈنكى سەن ئاستا ئۈلۈم مەنزىلىگە يېقىنلىشىۋاتاتتىڭ. 19 مەڭگۈلۈك ئىز قالدۇرالمايسەن دىيىشتى ھەممە،ئۇلارنىڭ پەلسەپىسى شۇتىكى ئۆلۈپ كېتىسەن ئىزىڭ ئۆچىدۇ.بىراق مەڭگۈلۈك بولغان نەرسىلەرنى بۇ دۇنيادا ھاياتلىقى قالمىسىمۇ كىشىلەرنىڭ ئەبىدىل-ئەبەد داستان قىلىپ سۆزلىشىدىغانلىقىنى نىمىشقا چۈشەنمەيدىغاندۇ؟مەن مەڭگۈلۈك بولۇش ئۈچۈن نىمىشقا تىرىشمىغۇدەكمەن؟! 20 ئاسماننىڭ نىمىشقا خىيالى بولمىسۇن،رەڭدار بۇلۇتلارنى تالان-تاراج قىلىشقا ھەققىمىز يوق جېنىم ،بۇلۇتلار كۆك ئاسماننىڭ لەيلەپ تۇرغان گۈزەل خىياللىرى ئەمەسمۇ.. ۋاقىتنىڭ ھەر بىر قېتىم مېنى سۆيۈشى ماڭا بەكلا يېڭى، سۆيۈملۈك تۇيىلىدۇ. ھەي، شۇنىڭ ئۈچۈن بىز بۇ ھاياتقا ،بۇ دۇنياغا قىيالمىغان ھالدا تىرىشىپ-تىرمىشىدىكەنمىز،قىيالماي كېتىپ قالىدىكەنمىز. بۇ يازمىنى ئاخىرىدا بەرگىيە تەھرىرلىگەن. ۋاقتى 2013-3-7 12:31

قەلبىنۇر ئېلياس · ۋاقتى: 2013-3-7 15:44:26


	ھەمىمىزگە چىن مەنىدىكى باھار نىسىپ بولسۇن ! پىچىرلاشلار تەكتىدىكى مەنالارغا ئاپىرىن!

بەرگىيە · ۋاقتى: 2013-3-7 16:23:34


	قەلبىنۇر ئېلياس يوللىغان ۋاقتى 2013-3-7 15:44 ھەمىمىزگە چىن مەنىدىكى باھار نىسىپ بولسۇن ! پىچىرلاشلا ... سىزنىڭ نەسىرلىرىڭىزنىڭ قۇربانى بولىمەن مەن ھەدە ! كۆڭلۈمدىكى ئىزگۈ تۇيغۇلارنى پۈتۈپ باقىمەن مۇشۇنداق پىچىرلاپ تۇرۇپ.

ي.ت.توغراق · ۋاقتى: 2013-3-7 16:32:48


	تېمىلىرىڭىز ھەقىقەتەن بەك ياخشى چىقىۋاتىدۇ، دىلغا ھوزۇر بېغىشلىغىدەك پىچىرلاۋاتىسىز

بايرام · ۋاقتى: 2013-3-7 20:48:58


	پىچىرلاشلار ياخشى چىقىپتۇ،رەڭدار ھەم لىرىك تۇيغۇلارغا تۇيۇنغان. قارىسام پىچىرلاش تۇگىمگەن ئۇخشايدۇ . داۋامىنى كۆرۈپ باقايلى.

بەرگىيە · ۋاقتى: 2013-8-2 18:17:14


	پىچىر-پىچىر 21 ھايات ئۆزى بىر كىتاب ئۇنىڭدا ئاچچىق-تاتلىق ۋەقەلىكلەر يېزىلغان ھايات ئۆزى بىر ئاق دەپتەر كىشى ئۆزى يىغىلىرىنى كۈلكىلىرىنى خاتىرىلەپ پۈتۈپ قويىدىغان. ھايات بىزنى يا كۈلدۈرەلمىسە يا يىغلىتالمىسا بىز ئۇنىڭدىن بىزار بولغان بولاتتۇق،گاھ يىغلىتىپ گاھ كۈلدۈرگەنلىكى ئۈچۈنلا ئەڭ ئاخىرقى تىنىقلىرىمىزدىمۇ"يەنە بىر دەم،بىر نەچچە مىنۇت ياشىسامچۇ "دەپ ئارمان قىلىمىز. 22 كىملەرنىڭدۇر يۈرىكىڭنى تىلغىماقچى بولۇپ ساڭا شېرىنلىك قوشۇلغان زەھەرنى ئۇزىتىشىدۇ.تىلەيدىغىنىم ھوشيار بول، ھوشيار بولالمىساڭ ئاخىرقى دەملىرىڭدە كۆزلىرىڭدىن يېلىنىش ۋە ئۆكۈنۈش ياشلىرىنى تۆكۈپ ئەمەس بەلكى تىز پۈكمەسلىك ۋە مەغرۇرلۇق نۇرلىرىنى چاقنىتىپ كۆز يۇم!ئىشەن زەھەر غەيرىتىڭ ئالدىدا ئەيمىنىپ ئۇلارنىڭ يۈرىكىگە قاراپ ئاقىدۇ. 23 يىپەكتەك چاچلارنى سىلاۋاتقان جۇپ قوللارنىڭ تىترەشلىرىگە بۆلەنگەن يۈرەكتىن يەنە نىمىنى تاما قىلىۋاتىسەن قىزچاق،ئاشۇ قوللاردىكى مىھىر ئاشۇ قوللاردىكى مۇھەببەت سېنى بىر ئۆمۈر يۆلەشكە يېتەتتىغۇ؟! كۆزلىرىم بىلەن سېنى ئۇزىتىپ قويۇپ يۈرىكىمنىڭ پەريادىدىن چۇل-چۇل بولغان قەترىلەرنىڭ ئاھىنى قۇش پېيىغا باغلاپ ئارقاڭدىن ئۇچۇرۇۋەتتىم.سەن ئاق كەپتەر ناخشىسىنى بەك ئۇزاق توۋلىدىڭ،بەلكى توزىغان پەيلەرنىڭ زارى يۈرىكىڭنى ئەزگەندۇ؟؟؟ 24 كەل،كەل كەتمەس بولۇپ كەل،ئاھ بىراق كېلەلمەيسەن،بىلىمەن بىلىپ تۇرۇپ كۈندە بىر قېتىم كەل دەپ شىۋىرلاشقا ئادەتلەنگەن لەۋلىرىمنى توسۇشقا ئىلاجىم يوقتۇر. قۇشلار چوقۇلاپ كەتكەن يۈرىكىمنىڭ كىچىككىنە تامچىسىدا قانچە بىئىلاج ئاشىقلارنىڭ تېنىگە دەرمان، قان-قۇۋۋەت ھاسىل بولغىنىدىن مۇھەببىتىمنى كۆرۈۋال ،كۆرەلمەيسەن بەلكى، چۈنكى سېنىڭ سەرسانلىقتا كۆزلىرىڭ كور بولغانلىقىنى خۇددى مەنمۇ بىلەلمىگەنگە ئوخشاشلا... 25 باھارنىڭ شىۋىرلاشلىرىنى ئۇزىتىۋاتىمەن يازنىڭ مۇھەببەتلىك قۇچاقلىرىغا بۆلىنىپ ئولتۇرۇپ،بىر كۈنى يازنىڭ قۇچاقلىرىدن يۇلقۇنىمەن كۈزنىڭ نىمەتلىرىگە ئېغىزىمنى لىق تولدۇرۇپ تۇرۇپ،ئىھ ،بەلكى ئۇزىتىمەن ئوخشاشلا كۈز ياپراقلىرىنى ئاچچىق-ئاچچىق چىرقىرىتىپ، دەسسەپ-دەسسەپ مېڭىپ، ئاپئاق قارلارغا كۆزلىرىمنى يۇمۇپ تۇرۇپ تىلەكلەرنى تىلەپ. مانا بۇ ئۆزى تۇرمۇش،تۇرمۇش بىرىدىن ۋاز كېچىش بىرىگە ئېرىشىش،بىرىدىن ھۇزۇرلىنىش،بىرىنى ئازابلاش بەدىلىگە قۇرۇلغان. 26 نىمىلەرنى دىيىشنى بىلمەيمەن ئەمما چوقۇم دىيىشىم كېرەك بولغان بىر ھەقىقەت سېنى كۈتۈپ تۇرماقتا.گەرچە بۇ كۈتۈش خۇشاللىق بولمىسىمۇ... نىمىلەرنى قىلىشنى بىلمەيمەن،بىراق قىلىشىم كېرەك بولغان بىر ئەمىلىيەتنى ساڭا كۆرسىتىشىم كېرەك بۇ ئەمىلىيەت ئارزۇيۇڭدەك گۈزەل بولمىسىمۇ.. خاتىرەمنى مانا مۇشۇنداق باشلىغان ئىدىم.بىراق يېزىلىپ بولماستىنلا چېكىت قويۇلدى.چۈنكى سەندىن ئاۋال ئۆزۈم بەرداشلىق بېرەلمىگەن ئىدىم. 27 سەھەرنىڭ گۈزەللىكىنى كىم ھىس قىلالىدى؟كېچىچە گۈل ئىشقىدا قان سايراپ چىققان بۇلبۇلمۇ؟ياكى گۈل باغرىدىن سىرغىپ چىقىپ بەرگىدە توختاپ قالغان شەبنەممۇ؟ياق، چۈنكى ھەر ئىككىلىسى ئازابى بەدىلىگە باشقىلارغا گۈزەللىك يارىتىۋاتقانلار ئىدى. باشقىلار ھوزۇرلىنىدىغان گۈزەللىكلەر ئۈچۈن قۇربانلىق بەرگۈچىلەر ھامان شۇ گۈزەللىكلەرنىڭ تەمىنى تېتىشتىن مۇستەسنادۇر. 28 باغرىمغا قويۇلغان گۈلدەستىلەر ئۈچۈن ئەمدىلا رەھمەت ئېيتاي دىگىنىمدە گۈلنىڭ تىكىنى يۈرىكىمگە سانجىلىپ قالدى.ئەجىبا تىكەنلىك گۈلنى قويۇشتىكى مەقسىتىڭ يۈرىكىمنى تىنىقسىز قالدۇرۇش بولغىيمىتتى؟ 29 تەبىئەت ئۆز ھوقۇقىنى پەرۋاسىزلىق بىلەن يۈرگۈزۈدىغان پەسىللەر قوينىدىكى ياز پەسلىنىڭ بىلىندۈرمەيلا ئۆتۈپ كېتىۋاتقانلىقىدىن ئاغرىنچىم يوق .بىراق شۇنچە گۈزەل يازلارنى دەسسەپ-چەيلەۋاتقان مۇھىتقا ئاغرىنىپ تۇرۇپ ئۆزۈمنى قوغداۋاتاتتىم ... چىق..تېز چىق..قاپقاراڭغۇ چۈشلەر قوينىدىن قايتىپ چىق ئەركىم! 30 ھارغىن دۇنيانىڭ ئاۋايلاپ ماڭغان قەدەملىرى بىزنى شۇ قەدەر مەھلىيا قىلىدۇكىن بىلىپ-بىلمەي شېرىن ئالدىنىشلارغا قەدەم قويىمىز.شېرىن ئۇيقۇغا ئورالغان مەنىۋى تەشنالىقنىڭ باغرىدا ئۇزاق چۆرگىلىدىم .يا ئۆزۈمنى يارىتالماي يا ئۆزگىنى يارىتالماي ئۆتۈپ كېتىشتەك مەغلۇبىيەت مېنى بارا-بارا ھالسىزلاندۇرۇۋاتاتتى.مېنى بۇ قەدەر ئېزىۋاتقىنى يۈرىكىمدە مۆكۈشمەك ئويناۋاتقان سوراقلار ئىدى. سوراقلارغا سۇكۇت بىلەن جاۋاب بېرىشنىڭ قىيناقلىرىدا تىتما-تالاڭ بولاتتىم.ۋۇجۇدلۇقنىڭ تەگسىز غەملىرىدە ئېزىلغان روھىمنىڭ پەريادىغا كۈلكىلىرىمنى سىڭدۈرۈپ قويۇۋاتاتتىم...ھالبۇكى بۇ كۈلكىلەر پۈتۈن ئالەمگە شەبنەم بولۇپ تارىلىۋاتاتتى. ئاۋايلاپقىنا ئاخىرقى شەبنەمنى بەرگىمگە قويدۇم. بىلەتتىم بۇ كۈن نۇرىدا قۇرىماس،شەپەقتە توزىماس ئاخىرقى شەبنەم ئىدى. بۇ يازمىنى ئاخىرىدا بەرگىيە تەھرىرلىگەن. ۋاقتى 2013-8-2 18:18

شۈكۈر · ۋاقتى: 2013-8-3 11:23:30


	دوختۇرنىڭ پىچىرلاشلىرى دوختۇرچە چوقۇم ...

بەرگىيە · ۋاقتى: 2013-8-13 23:11:57


	31 دىمەكچى بولغانلىرىمنى دىيەلىدىممۇ؟ئېيتماقچى بولغان ناخشىلىرىمنى ئېيتالىدىممۇ؟ۋاقىتنىڭ بىسى ئاللىبۇرۇن ئۇپراپ تۈگەپتۇ.ھالبۇكى،مەن ھىچنىمە قىلماي يەنىلا شۇنداق ئالدىراش يۈرۈپتىمەن. شامالنىڭ ئۇلۇغ كىچىك تىنىشلىرىدا گۈللەر بەرگىسىز ئېچىلالماي قاپتۇ.ھالبۇكى،مەن غەپلەت ئۇيقۇسىدا چۈش كۆرۈپ بىر دەستە سۈنئىي گۈلنى كۆتۈرگىنىمچەۋاقىت توزانلىرىدا يۈگۈرۈپ يۈرەتتىم. 32 چىرايلىققىنا ھىلال ئاي دۇنياسىنىڭ نۇرلىرىغا چۆمۈلۈپ تۇرۇپ بالىلىقىمنى ئەسلەۋاتىمەن .بالىلىقىمدىكى ئانامنىڭ سۆيگۈ غەزىنىسىنى بۇلاڭ-تالاڭ قىلىپ ئۆتكەن ئاشۇ ۋاقىتلار نىمىدىگەن گۈزەل ۋاقىتلار ھە؟ بالىلىق ۋاقتىم ئانامنىڭ قەلبىنى ئارامگاھ قىلىپ ئەللەيلەنگەن دەملىرىم نەقەدەر بەخىتلىكمەن ھە؟ "بالىلىىم كەلسەڭچۇ يېنىپ"دىگەن ناخشىنى كۈچەپ توۋلىغۇم كەلدى.بىراق،ئاۋازىمنىڭ ناخشا توۋلاشقىمۇ يەتمىگۈدەك دەرىجىدە زەئىپلىشىپ كەتكەنلىكىنى ھىس قىلىپ لاسسىدە بولدۇم. 33 قولۇمدا سەن سوۋغا قىلغان چىمچىلاق قولچىلىك كىچىككىنە بىر شىشە.سەن بۇ شىشىنى "مەن بىلەن ئۆتكۈزگەن بۇ ئۆمرۈڭدە تۆككەن يېشىڭ بۇ شىشىنى تولدۇرالمايدۇ "دەپ سوۋغا قىلغان ئىدىڭ. ئەپسۇس ،سەن بىلەن ئۆتكەن شۇنچە يىلدىن بېرى كۈلگەن كۈلكىلىرىم ئاستى يۈزىنىمۇ ياپالمىغان بىچارە شىشە ياش كەلكۈنلىرىدە لەيلەپ قالغان ئىدى.... بەھەيۋەت سۆزلەر ئورنىغا ئەمىلىيەت،بىئاۋاز ئازابلار ئورنىغا خەندان تىلەيمەن! 34 ئىسقىرىتقان شاماللارغا ئەگىشىپ كېتىپ قالغان ئەركىمنى سېغىنىپ ياش تۆكتۈم.زەنجىرىدىن ئۈزۈلىدىغان كۈنلەرنى بەك ئۇزاق كۈتتۈم.ئالتۇن تاڭ نۇرلىرىغا يېيىلىپ،يىللار پەردىسىنىڭ گۇگۇمىغا سىڭىۋاتقان ۋۇجۇدۇمدىكى ئاخىرقى ئىچىرقاشمۇ تۈگىدى. دالىلاردا تۇمانلارنى يەلپۈپ تۇرغان ئۆتمۈش چىراقلىرى تامامەن ئۆچكەن بۈگۈنكى كۈندە ئۆزۈمنىڭ ئاچكۆزلۈكتىن ھالسىراپ كەتكەنلىكىمنى سەزدىم. ئۇيغان..ئۇيغان! ئەسەبىيلەرچە چىرقىراشلىرىمنىڭ نەم توپىدا ئىغاڭلاۋاتقان سازاڭنىڭ قۇلىقىغىمۇ كىرمىگۈدەك دەرىجىدە زەئىپ ئىكەنلىكىنى ھىس قىلغىنىمدا ،نام-نىشانسىز ھاياتىم ئۈچۈن ئەلۋىدا دىيىشكىمۇ يۈزۈم چىدىمىدى. 35 سىم-سىم يامغۇر ھېرىپ قالغان ئاشۇ كۈنى بىز تۇنۇشۇپ قالدۇق.كۆزلىرىمىزدىن چاچرىغان ئوتتا جاھان كۆيدى ئىلتىجا بىلەن.. ھارغان يامغۇرنى جانلاندۇرالمىغان شامال ئوتنى كۈچەيتتى.شۇ كۈندىكىدەك ئوت ئاپىتىنى ھىچكىم،ھىچقاچان ھىچيەردە كۆرمىگىنىگە ئىقرار ئىدى.ئۇ بىر دەقىقە ئىدى كۆزلەر ئۇچراشقان.ھالبۇكى،شۇنچە يىللاردىن بېرى قايتالمىغان بولساممۇ بىراق ئاشۇ دەقىقىنى ۋاقىتنىڭ ئالماس قۇتىسىدا ئەتىۋارالاپ ساقلاپ يۈرىكىمگە تاڭغىنىمچە ياشاپ كېلىۋاتىمەن.ماڭا تۇنۇش،ياندىكىگەناتۇنۇش ،ئالماس قۇتىدىكى بۇ تەۋەررۈكنىڭ ئىسمى"تۇنجى مۇھەببەت" 36 زاۋالدىكى كەچكى شەپەقنى سۆيۈپ قوي،ئۇنىڭغا يېلىنجاپ تۇرغان يۈرەك قېنىم رەڭ بەرگەن... پىچىرلاشلاردا باشلانغان تىلەكلىرىم ئارىسىدا سېنىڭ كۈلكەڭ جاراڭلايتتى ، مېنىڭ كۆز يېشىم... ئوۋچىنىڭ قاپقىنىغا سولانغان سۆزلەر سېنى كۈلدۈرۈۋاتامدۇ؟ زۇۋانسىز يوللار ساڭا پايانداز بولۇۋاتامدۇ؟قارا جۇپ تېرەك يالىڭاچلىنىپ قاپتۇ،تېخى كۈز كەلمىگەنغۇ... سۈزۈك بۇلاقىنىڭ كۆزلىرىگە لاي تىنىپ قاپتۇ،نە سەۋەب؟ چىرايلىق بەستىڭگەياماشقان ئازابلىرىم تۇرقۇڭدىن ئەيمىنىپ بىقۇۋۇل مەندە قالدى ئىھتىمال. ھەر جايدا كۈچسىزلىكنىڭ ئىسكەنجىسىگە مېنى سولاۋاتقان ئاشۇ مۇھەببەتنى خاتىرەمگەيېزىۋاتاتتىم.خاتىرە بېتىمدە پۈتۈن جىسمىمىدىن توكۇرلاپ چۈشۈۋاتقان ئازاب بالىلىرى شادىمان ئۇسۇل ئوينىماقتا ئىدى. 37 سېنى ئۇزىتىپ قويدۇم، سەن ۋە باشقىلار تەسەۋۇرقىلغاندەك دات-پەرياد بىلەن ئەمەس، بەلكى مۇزدەك سۇكۇت ۋە مويسىپىت كۈلۈمسىرىشىم بىلەن.. بىراق ھىچكىم بىلمەيتتى، سەن كۈيلىرىمدىن غايىپ بولدۇڭ،ئەمما سەن ئەسلى ئۇلارغا بىرىكىپ كەتكەن ئىدىڭ، سەن سەھەرنىڭ نۇرلۇق تەبەسسۇمىدا ئۇزىغان ئىدىڭ،ئەمما ھوجرامدىكى قاراڭغۇ تۈنگە بىرلىشىپ كەتكەن ئىدىڭ، گۈللەرنىڭ بەرگى بىلەن تەڭ توزۇپ كەتتىڭ،بىراق ھىچكىم ياپراقتىكى شەبنەمنىڭ سەن ئىكەنلىكىڭنى بىلمەيتتى، ئۇزۇن يازنىڭ قويۇق سايىلىرىدا ، تىنجىقتىن قاچقانلار قاتار ئو لتۇراتتى.دۇنيارىمدىن يۈتكەن سەن ھاياتىمنىڭ يىلتىزىدا بىخىرامان ئولتۇراتتىڭ. 38 مەڭگۈلۈك چىنلىقنىڭ نىمە ئىكەنلىكىنى بەلكىم ھىچكىم بىلمەيدۇ. ساختا نەرسىلەر ئورالغان ھاياتنى، باغرىمىزنى يېرىپ تۇرۇپ سۆيگەنلىرىمىزدە ،ئەڭ قىممەتلىك نەرسىلەردىن ۋاز كىچىشكە رازى بولىمىز. كىممۇ خاسىيەتلىك چۈشلەر قوينىدا مەڭگۈلۈك ئۇخلىيالىغان؟ كۆزۈمنىڭ سېغىنىش تو لغان قارچۇقلىرىدا قېتىپ قالغان ئاشۇ كۆرۈنۈشنىڭ چىن ئىكەنلىكىنى مەن ۋە رەببىم بىلەتتۇق.بىراق چىنلىق پەلەك چاقى تەرىپىدىن يانجىلىۋاتقان بۇ ئالەمدە مەن ئۇنى مەڭگۈلۈك قارچۇقۇمدا قالدۇرۇشنى راۋا كۆردۈم. 39 كىشى ھەمىشە ياخشى كۆرۈپ قالغىنى ئۈچۈن ئەمەس، بەلكى ياخشى كۆرگىنىنىڭ ياخشى كۆرۈشكە ئەرزىمەيدىغان كىشى ئىكەنلىكىدىن ئازابلىنىدۇ. كۆڭلۈمگە قىلغان خىتابىم شۇكى: سۆي،سۆيۈلۈشنى بىل! سۆيۈپلا ئۆتۈش ئازاب، سۆيۈلۈپ سۆيۈشنى بىلمەسلىك جىنايەت. سېنىڭ ئازاب تارتىشىڭغىمۇ،جىنايەت ئۆتكۈزىشىڭگىمۇ رۇخسەت قىلالمايمەن! كېلىڭلار ئازاب،جىنايەت خاتىرىلەنگەن دەپتەرلەرنى كۆيدۈرەيلى! 40 نەپسانىيەتچىلىكنىڭ قۇلىغا ئايلانغان توپ ئىچىدە ، ئۇرۇلۇپ-سوقۇلۇپ يۈرگەن ناتىۋاننىڭ پولات تامغىلىق كىنىشكىلىرى ئىگىسى ئۈچۈن بىباھا بولغىنى بىلەن تاۋاقتىكى ئاش بولالمايدىغانلىقىنى ھىس قىلغىنىدا قاتتىق ھەسرەتلىنىشتى.بىر تامچە يامغۇرغا زار بولغاندا ،قوياش كۈلۈپ چىقىپ جاھانغا ئوت كەتكىنىدەك ، بۇ تەتۈر قىسمەت خام سېمىز يۈزلەردە،باداڭ قورساقلاردا،قىزارغان كۆزلەردە ئەلەڭلەپ زاۋاللىقنى چىللاۋاتاتتى.

تۇرسۇنئاي سۇلتان : پىچىر-پىچىر (نەسرلەر)

باھالاش