تۇرسۇنئاي سۇلتان : پىچىر-پىچىر (نەسرلەر)

مۇنەۋۋەر ئابدۇق · ۋاقتى: 2013-8-13 23:57:52


	پېچىرلاشلار لەزىتىدە كېرپىكلىرىمدە سەھەردىن باشلاپ دولقۇنلاۋاتقان لېرىكا تاراملاشقا باشلىدى... مەن ھەر قېتىم ئانام بىلەن خوشلاشقاندا يىغلىمايمەن دەيتىم ،ھەم ئانامغېىمۇ ياش تۆكمەي خوشلىشايلى جېىنىم ئانا دەيتىم، مەن ئانا بولغان چېغىمدا قېزىم بۈگۈنكى سەھەر بۇ سۆزنى تەكرارلىدى...مەن يېغلىمىدىم ئەمما -، يۈرۈكۈم چېدۇغۇسىز دەرىجىدە ياش تۆكۈۋاتاتتى...

پەرىدە توختاخۇن · ۋاقتى: 2013-8-14 00:16:29


	پىچىرلاشلىرىڭىزنى سۆيۈنۈش ئىلكىدە ئوقۇپ چىقتىم .بەك ياخشى چىقىپتۇ. بۇندىن كېيىنكى ئىجادىيەتلىرىڭىزگە ئۇتۇقلار يار بولسۇن..

دىلداش · ۋاقتى: 2013-8-14 00:18:26


	ئېلھاملىرىڭىزغا بەركەت تىلەيمەن.

qasimjanosman · ۋاقتى: 2013-8-19 17:26:41


	مەن دېڭىزنى كۆرمىگەن بىراق دېڭىزنىڭ ھەيۋەتلىك دولقۇنلىرىنىڭ خەندانلىرىنى ئاڭلىغان يۈرىكىمدە، قۇمساڭغۇ ساھىللارنى كۆرمىگەن،بىراق كۈمۈش رەڭ تەبەسسۇملارغا ئوخشايدىغانلىقىنى بىلىمەن. -داۋاملاشتۇرمامسىز؟

سەدەپ · ۋاقتى: 2013-8-19 20:02:39


	تاتلىق پىچىرلاشلىرىڭ ئەللىيىگە مەپتۇن بولدۇم،ئانامنىڭ ئەللىيى مېنى ئۇيقۇ ئالىمىگە غەرىق قىلسا سېنىڭ ئەللىيىڭ مېنى مەجنۇنلۇق ئىلكىدە سەرسانە قىلماقتا ئىدى.........................پىچىرلا جېنىم پىچىرلاشلىرىڭ ئىچىدە تۈن بۈشىكىدە تەۋرىنىپ يۇلتۇزلار قوينىغا غەرىق بولاي،شۇندىلا مېنىڭ ئارزۇ ئارمانلىرىم كۆكتىن چاراقلىغان نۇر تالاسى ئىچىدىن يۈرۈكىڭ قاتلىمىغا بۆسۈپ كىرىپ چۈشلىرىڭدە ئايان بولغۇسى.........

م.توختى سەببەت · ۋاقتى: 2013-8-19 22:21:43


	بۇ پىچىرلاشلارنى ئەجەپ بۇرۇنراق ئاڭلىماپتىكەنمەن.... ھەقىقەتەن ياخشى پىچىرلاشلار بوپتۇ...

بەرگىيە · ۋاقتى: 2013-8-30 01:14:12


	پىچىر- پىچىر 41 دولقۇنلىغان مىھنەت ئېقىملىرى ئارىسىدا ئۆزۈمگە تەئەللۇق بولغان كىچىككىنە ئارامىي دۇنيا بولسىچۇ ھە! شۇلارنى ئويلاۋىتىپ قۇربانلىق قىلىنغان نۇرغۇن ۋاقىتلار ۋە نۇرغۇن نەرسىلەر كۆز ئالدىمغا كەلدى. يۈرىكىنى ئەقىدە سۈيىدە سۇغۇرالىغان كىشىلەرلا بۇ خىل قۇربانلىقنىڭ ئارقىسىدىكى مەھرۇمدىن كەلگەن خۇشاللىقنى ھىس قىلالىشى مۇمكىن .بىراق ئەلۋەتتە شۇنىڭغا لايىق جاۋابقا ئېرىشكىنىڭىزدە .. لايىق جاۋابقا ئېرىشمىسىڭىزچۇ؟..... كۈلۈپ تۇرۇپ توزۇغان گۈل بەرگىلىرىنى خاتىرەمگە قىستۇرۇشقا باشلىدىم. .42 كىشىنىڭ پۇخاسى چىقمايدىغان ئەسلىمىلەرنىڭ بەتلىرىنى بىر-بىرلەپ يىرتىۋاتقان ۋاقىتتا كىشى ئۆزىنىڭ قانچىلىك چىداملىق ئىكەنلىكىنى تۇنۇپ يېتىپ ياراتقان ئىگىسىگە ھەمدۇسانا ئوقۇيدىكەن. بۈگۈنكى مەۋجۇداتلارنى يورۇتۇۋاتقان يىراق ئۆتمۈشلەرنى باغرىمدىن يۇلۇپ ئېلىپ چۆرۈۋەتتىم. چۆرۈۋەتكەن يەردىن قىپقىزىل گۈللەر ئۈنۈپ چىقىپتۇ، كىشىلەر ئۇنى بەس-بەستە پۇراپ مەدھىيىلەشمەكتە، ئېلىپ چېكىلىرىگە قىسماقتا ئىدى. مەن يىراقتا ئۇلارغا جىممىدە قاراپ تۇراتتىم. قەلىمىم مۇنۇلارنى يازدى: يالغۇز،يالغۇز قالغانلىرىمدا، نىمە سىر بار يازغانلىرىمدا. لەيلەپ يۈرەر غەمكىن بىر نىگاھ، يىراقلاردا ئويلىرىمدا تىنىقلىرىمدا. تەنھا ئەمەس ئىدىم ھىچقاچان، بىراق بۈگۈن مەن بەك پەرىشان، چېچىۋەتتىم دېڭىزلىرىڭغا، كۆز يېشىمنى ئەي ياۋۇز پىغان. كۈتتۈم ئۇزاق كەلمەسلىرىڭنى، كەلمەيسەن راست كېلىشىڭ يالغان . 43 بۇ دۇنيادىكى بارچە ھاياتلىققا دىلكەش ھاياتىمدا نىمىلەرنى يوقىتىپ نىمىلەرنى تاپتىم؟بۇ سۇئالغا ئورىلىپ كېلىدىغان مۇھەببەت ۋە غەم-غۇسسىلارنىڭ پايانى يوقتەك بىلىنەتتى .چەكلىك ھاياتتا چەكسىزلىككە ئىگە بولىدىغان نۇرغۇن تۇيغۇلارنىڭ ئىگىسى بولۇپ ياشايدىكەنمىز ،ئاللاھىمدىن ماڭا قۇدرەت تىلىدىم،رىيازەت چېكىشلەرگە چىدام بەرگىن!ئائىلەمنىڭ يۈكسەكلىكىگە خاس جاسارەت بەرگىن!نازۇك نەپىس قەلبىمگە تېتىغۇدەك ئاراملىق بەرگىن!ساڭا دۇئا قىلىشقا،ھەققىڭگە سېغىنىشقا ،ئىرادەڭگە بويسۇنغان ھالدا رازىلىقىڭ ئۈچۈن بېشىمغا كەلگەنلەرنى ۋايسىماي تارتىشقا يەتكۈدەك،بەرگەن شاتلىقلىرىڭغا ھەمدۇسانە ئوقۇغۇدەك كۈچ بەرگىن! 44 جىمجىتلىق پەردىلىرى يىرتىلغىنى نەۋاق،گۈللەرنىڭ روھىدا ئۇيقۇغا كەتكەن ناۋالار تاڭ سەھەردە شەبنەم بولۇپ بەرگىلەرگە قوندى.بۇ يىلقى يازدا سالقىن شامال ئاتا قىلغان مۇھەببەتلىك كۈنلەرئېتىلىپ چىققان بۇلاق سۇلىرىدەك ناخشا توۋلاپ ئوينىسا بەك ھوزۇر ھە... ھوزۇرنى بېرىش،ھىس قىلىشتىنمۇ ھوزۇر ئىكەنلىكىنى ئىللىغان قەلبىم بارا-بارا تۇنۇپ يەتمەكتە.شېرىن تەئەججۇپلەرگە ئورالغان گۈللەرنى شوراۋاتقان ھەسەل ھەرىلىرىنىڭ ھەسىلىنى يىگەن ۋاقتىمىزدا ھەسەل بەرگەن گۈلنى ئەمەس ھەرىدىن مەمنۇن بولىمىز.ئوخشاشلا ئادىمىيلىك ئۈچۈن بېسىلغان ھەر بىر قەدەملەرنىڭ ھەققى ھەقدارلارنىڭ بوينىدا قېلىشى مۇمكىن. بۇلارغا رازى بول قەلبىم،شۇندىلا مەڭگۈلۈك كۈلكىنىڭ تەمىنى شۈمىگەنچە لەۋلىرىڭنى تەبەسسۇمدا نۇرلاندۇرالايسەن! 45 ھاياتىدا گۈرۈلدەپ كۆيگىنىچە بۇ مېنىڭ ھاياتىم،بۇ مېنىڭ ئۈلۈمۈم دەپ ناخشا توۋلىيالايدىغانلاردىن قانچىسى باردۇ؟ چېكىتنى تاپالماي تىنىش بەلگىلەرگە تولغان خاتىرەم مەيۈس جىلمايماقتا. 46 بىز گۈللەرنىڭ نىمىشقا قۇرۇپ كېتىۋاتقانلىقىنى، سۇلارنىڭ نىمىشقا قۇرۇپ كەتكەنلىكىنى، چىراقلارنىڭ نىمىشقا ئۆچۈپ قالغانلىقىنى بىلەلمەي سەرسان بولغان ۋاقىتتا بۇ ئۆزگىرىشلەرگە ئۆزىمىزنىڭ سەۋەپچى ئىكەنلىكىمىزنى ئويلىمايمىز . گۈللەرنى قۇرۇتۇۋەتكەن دەل ئۆزىمىز .شېخىدا چىرايلىققىنا ئېچىلغان گۈللەرنى ياخشى كۆرگەن كىشىلىرىمىز ئۈچۈن ئۈزۈپ رەھىمسىزلەرچە گۈل ھاياتىنى قۇربان قىلىپ تۇرۇپ باشقىلارنى خۇشال قىلىمىز. ماھىيەتتە بۇ مۇھەببەت ئەمەس بىر جىنايەت ئىدى. ئويلاپ قالدىم گۈلنى ھارارەتلىك مۇھەببىتىم بىلەن قۇچاقلىسام ئوخشاشلا قۇرۇپ كېتەر بولغىيتتى ھە؟! 47 جىمجىت سېنى ساقلاۋاتقانلىقىمنى ھىچكىم بىلمەيتتى. شېرىن ئېزىقىشقا تولغان قەلبىم تىنماي غەلۋە قىلىۋاتاتتى ، ئايىغىمنىڭ تېلىپ كەتكەنلىكى پەرۋايىمغا كەلمەيتتى.مەن سېنى ساقلاۋاتاتتىم .ئۇلۇغۋار تىلەكلەرگە تويۇنغان ئەسەبىي تەشنالىق ئىچىدە .... جىمجىت سېنى ساقلاۋاتقانلىقىمنى ھىچكىم بىلمەيتتى ،قولۇمدا ھىچنىمە يوق،روھىمىنى ئىستىلا قىلىۋالغان بۇ سۆيگۈگە قارشى چىققۇدەك قۇدرەت ھەم مەندە يوق، بېشىم ئۈستىدىن ئۈمىتسىزلەنگەن بۇلۇتلار ئاسماندىن يۈگرەپ ئۆتۈپ كەتتى،ئۇلارنىڭ ياغدۇرماقچى بولغان يامغۇرى مېنىڭ تەشنالىق قىزىقىمدا پارغا ئايلىنىپ يەنە ئۇلارنى قوغلاپ كېتىپ قالغان ئىدى. قارا..مەن تېخىچە سېنى ساقلاۋاتاتتىم. جىمجىت سېنى ساقلاۋاتقانلىقىمنى ھىچكىم بىلمەيتتى. لەۋلىرىمدىكى تەبەسسۇمنىڭ سىھرىدىن سەن ماڭىدىغان بۇ يولدىكى گۈللەر تامام ئېچىلىپ كەتكەن ئىدى. ئۇلار ماڭا تەلمۈرۈپ سۆيگۈ شارابىمدىن زەررە تامچە تىلەيتتى. مەن كۈلۈمسىرىگىنىمچە بارلىق نازلىرىمنى قۇچىقىمغا سولاپ تۇرۇپ سېنىڭ بۇ يولدىن ئۆتۈشۈڭنى ساقلاۋاتاتتىم. مەن جىمجىت سېنى بەك ئۇزاق ساقلىغان ئىدىم.ناخشامنىڭ ئاھاڭىنى ئۆزگەرتىۋىتىش قولۇمدىن كەلمەيتتى.ۋاقىت مۇشۇ يوسۇندا توزۇپ كېتىۋاتاتتى، لەرزان يىپەك كۆينەكلىك قىزنىڭ قەددى پۈكۈلدى ،سىما كىچىكلەۋاتاتتى، بىراق قۇچىقىدىكى سۆيگۈ بوپىسى بارا-بارا چوڭىيىپ بېرىۋاتاتتى. مەن ئەنە شۇ جايدا ئېغىر بوپىنى كۆتۈرۈپ جىممىدە سېنى ساقلاۋاتاتتىم. 48 خىياللىرىمنى شەپقەتسىزلىك بىلەن قوغلاۋاتقانلارغا لەنەت بولسۇن! چۈنكى مەن خىيالىمدا بەك بەختىيار، بەك گۈزەل بىر دۇنيا يارىتىۋاتاتتىم . دۇنيارىمدا ئوينايدىغانلار بۇ دۇنيانىڭ ئىگىلىرى ئىدى. ئۇلار خۇشاللىققا،مۇھەببەتكە،مىھرىبانلىققا،تىنىچلىققا مۇھتاج ئىدى. ياق، ساڭا ئۈنلۈك ۋارقىرىدىم، ھەممە نىمىنى بۇزۇپ -چاچقىن ئىجازەت ،خىياللىرىمغا بۇزغۇنچلىق قىلما! 49 قوياشقا تەلمۈرگەن جىسمىم تىترەۋاتاتتى. قوياش بۇلۇتنىڭ كۆكسىنى يارالماي ئىلىشىۋاتقان ۋاقىتتا مەن ھالسىراپ كېتىۋاتقانلىقىمنى سېزەتتىم.بەرداشلىق بەر،بەرداشلىق بەر دەپ ئىچىمدىن ئاجىزغىنە چىقىۋاتقان نىدادا تەبىئەت سۇكۇتقا چۆمگەن، بۇلاقلار شىرىلدىماستىن جىممىدە ئېقىۋاتاتتى، قۇمساڭغۇ ساھىللاردىكى ئاخىرقى ساياھەتچىلەرمۇ ئۆيلىرىگە قايتىپ كەتتى .جىمجىت دېڭىزغا يۆلەنگەن مەپتۇنكار بىر خىيال ئۆز ھالىنى تىڭشىغىنىچە رىئاللىققا يۈزلىنىپ تۇراتتى.ئاشۇ سۇكۇناتنىڭ باغرىغا بۆلەنگەن مۇھەببەت پۈتۈن دۇنيانى يۇتۇۋىتىدىغانلىقىنى جاكارلاۋاتتى .ئارقامدا قالغان دۇنيانىڭ پىچىرلاشلىرى توختىغان ئاشۇ دەمدە قوياش غەلىبە قىلدى .ئۇ بۇلۇتلار باغرىنى يېرىپ چىقىپ زىمىنغا كۈلۈپ باقتى. دېڭىز مەۋھۇم چىمەنلەر بىلەن قاپلانغان ئىللىقلىقتا ئاپتاپقا قاقلاندى. يۈرەكنىڭ چاڭلىرى يۇيۇلۇپ كەتكەن بۇ كۆرۈنۈش بەك گۈزەل ئىكەن. مەن ئاستاغىنە شېئىر ئوقۇپ ئۇنى دېڭىزغا چېچىۋىتىپ ئۇنىڭ دولقۇنلىشىنى قانغۇچە تاماشا قىلدىم. 50 بۇ مۇھەببەت بولمىسا نىمىشقا شۇنچە خۇشال،شۇنچە قايناق تۇيغۇلاردا سىلكىنىمەن ؟ بۇ مۇھەببەت بولمىسا نىمىشقا تۈن كېچىلەردە يۇلتۇزلار ئېيتىپ بەرگەن شۇنچە ئازابلارنى كۆتۈرۈپ يۈرەلەيمەن؟ بۇ مۇھەببەت بولمىسا قانداقمۇ سەنسىزلىكنىڭ دەردىنى ناخشىغا ئايلاندۇرالايمەن؟ پىچىرلاشلىرىمنى سەنسىز ئاخشاملاردا ئۆزۈمگە ئۆزۈم يۆلىنىپ تۇرۇپ سۇبھىنى كۈتكەن جۇپلەشمىگەن كىرپىكلىرىمگە تىزىپ قويدۇم. تاڭ قوياشى قىزارغاندا ئۇلار توكۇرلاپ چۈشۈپ سەھەر گۈللىرىنىڭ بەرگىگە شەبنەم بولۇپ قونۇدۇ. يوچۇن ساھىلدىكى تىنىقلارنىڭ گۈلنى پۇرىغاندا شەبنەمنى دۇمىلىتىۋىتىشىگە رۇخسەت قىلما! بۇ يازمىنى ئاخىرىدا بەرگىيە تەھرىرلىگەن. ۋاقتى 2013-9-2 16:34

marigul · ۋاقتى: 2013-8-30 10:12:01


	يۈرەكنىڭ قات - قېتىدىن ئوخچۇپ چىقۋاتقان يېقىملىق پىچىرلاشلار ئۈزۈلمىسۇن !

بەرگىيە · ۋاقتى: 2013-8-30 11:36:42


	qasimjanosman يوللىغان ۋاقتى 2013-8-19 17:26 مەن دېڭىزنى كۆرمىگەن بىراق دېڭىزنىڭ ھەيۋەتلىك دولق ... داۋاملاشتۇرسام دېڭىزغا چۆكۈپ كېتىمەن ..

بەرگىيە · ۋاقتى: 2013-9-2 16:32:41


	پىچىر-پىچىر 51 قوياشنىڭ ئاخىرقى نۇرلىرى كەچكى تۈن قوينىغا سىڭىپ كەتتى.دېڭىز ساھىلىنىمۇ قويۇق گۇگۇم قوينىغا ئالدى. ئەمما سېنىڭ ناخشاڭ توختىمىدى،سېنىڭ پايانسىز دېڭىزدا كۈۋەجەۋاتقان ناخشاڭ نەقەدەر يېقىملىق ھە؟ ساھىلىدىكى قۇملار، دېڭىز قۇشلىرى ناخشاڭنىڭ سىھرىدىن كۈلۈمسىرەيتتى. دولقۇنلار ئەركىن ئازادە ئۆركەشلەيتتى..بىز ناخشا ساداسى ئىچىدە بىر-بىرىمىز بىلەن ئۇچراشتۇق، ئۈنسىز قول تۇتۇشۇپ سەيلى قىلىشقا باشلىدۇق. شۇ چاغدا ھىس قىلدىم، سېنىڭ ناخشاڭ ھاياتىمنىڭ بۇرۇنقى بەتلىرىگە ئاللىبۇرۇن ئىزىنى قالدۇرۇپتىكەن،بۇنىڭدىن كېيىنكى بەتلىرى ھاياجاندىن رەڭ ئالغانىكەن. 52 سۇكۇتكە تولغان مۇھەببەتنى چىڭ قۇچاقلىغان ئورمانلىق كەچكۈزدە بىر پارچە ئالتۇندەك يالتىراپ تۇراتتى.چىغىر يوللار، جۇپ-جۇپ تېرەكلەر، شىلدىر سۇلۇق بۇلاقلار ئىھتىرام بىلەن بېشىنى ئەگكەن ئىدى.بۇ گۈزەل كۆرۈنۈشتىن رەسسامنىڭ قەلبى داۋالغۇدى.بىراق،ئۇنىڭ سىزىپ چىققىنى بىر پارچە ئېتىزلىق بولدى. ساپ-سېرىق دانلىرىنى يالىلداتقان بۇغدايلار تەبەسسۇم بىلەن قوياشقا باغرىنى ئاچقان ئىدى. تارام تەرلەرگە تويۇنغان دىھقان رەسسام بىلەن قۇچاقلىشىۋاتاتتى. 53 سىم-سىم يامغۇرلارغا چىلانغان ھىسلار ھور كۆتۈرۈلگەن يوللاردا لەيلەيتتى. مەن ماڭا سوقۇلۇۋاتقان سايىلار ئارىسىدا قاچاندىن بېرى ماڭا بۇنچە يېقىن كېلىۋالغان سايەڭگە ھەيرانلىق بىلەن قارايتتىم. تىترەڭگۈ خۇشاللىقنىڭ يۈرىكىم ئۈستىگە ئالقانلىرىنى قويغانلىقىنى ، ھاياتىمنىڭ رەڭدار ھاياجانغا چىلاشقانلىقىنى ھىس قىلغىنىمچە ئۈندىمەستىن تۇراتتىم.قارا ئۇيقۇدىن بىر گۈزەل چۈش ئېتىلىپ، باغرىمنى لىققىدە گۈللەرگە تولدۇرغاندەك تۇيغۇلار سەگەك روھىمنىڭ شادلىقلىرىغا قوشۇلۇپ ئۇسۇل ئويناۋاتاتتى. ئاھ، مەن سېنىڭ تەبەسسۇملىرىڭنى ئۆزۈمنىڭ زىنىقىغا قوندۇرغىنىمچە چۈش دۇنياسىغا غەرىق بولۇپ كەتتىم. 54 سېنىڭ خۇشاللىقلىرىڭ مېنىڭ يۈرىكىمدە، سېنىڭ ئارمانلىرىڭ مېنىڭ قەدەملىرىمدە،سېنىڭ ھەۋەسلىرىڭ مېنىڭ رىئاللىقىمدا. سۆيگۈ سازىمنىڭ تارىنى چېكىپ .ھاياتىمنىڭ بېغىدا تىنماي ئۇسۇل ئويناۋاتقان كىم؟ سۈرەن سالدىم قەھرىم بىلەن،يېقىملىق ئازابلارنىڭ باغرىمنى تىلغاشلىرىغا چىداپ بولالماي... ئاخىرقى ناخشامغا سىڭىپ كەتكەن سېنىڭ ئۈنۈڭدىن ئەكىس سادا كەلدى. كەل،مەن بۇ يەردە! 55 سۆيگۈمنى بىلىپ قال دۇنيا! ئاداشقان قۇشلاردەك تۇتۇلۇپ قالغان ھىسلىرىمنى ئەپۇ ئەت! مەن يېنىڭغا كەلگەن دەملەردە تۈن يۇلتۇزلىرىدىن نۇر تۆكۈلۈپ جىسمىمغا ئايلىنىدۇ،ساڭا بېرىدىغانلىرىم سېنىڭ مەڭگۈلۈك تەشنالىقىڭنى قاندۇرغۇچى مۇلايىم مۇھەببىتىم بولىدۇ. لەۋلىرىم دەسلەپكى غۇنچىلاردىن ئالغان بىغۇبارلىقى بىلەن ساڭا تەلمۈرۈدۇ. شادلىق كەلكۈنلىرىگە سېنى غەرىق قىلىۋىتىش ئۈچۈن زوراۋان سۆيگۈم سېنى قۇچاقلايدۇ. كۈنلەرنىڭ بىرىدە گۈزەل بىر داستاننىڭ قۇرلىرىدا ئوينىغان گۈللەر ساڭا گۈلدەستە بولۇپ دېرىزەڭدىن، ئىشىكىڭدىن كىرىپ ئۆيۈڭنى لىققىدە گۈل ھىدىغا تولدۇرۇۋىتىدۇ.بۇ بەخىتنى ئۆزۈڭدىن يىراقلاشتۇرمىغىن! بىر ئۇلۇغ نازىشىنى ئېيتماقچى ئىدىم،بىراق تىترەپ تۇرۇپ "سۆيگۈمنى بىلىپ قال دۇنيا" نى ئېيتتىم قايتا- قايتىلاپ. 56 باھار ھەر يىلى قايتىپ كېلىدۇ،قوياش خوش دەپ ھەر كۈنى تاشلار كەينىگە ئۆتۈپ كېتىدۇيۇ، بىراق ھىلال ئاينىڭ تۈندە كائىناتنى نۇرلىرى بىلەن قۇچاقلىشىغا بىر كېچىلا چىدىيالايدۇ.سەھەر رەشىكلىك ئازابىدا قىزىرىپ تۇرۇپ ئۇپۇقتىن باش كۆتۈرۈدۇ.كەچكۈز سۇغۇقىدا تىترىگەن گۈللەر خەيىر دىيىشىپ بەرگىلىرىنى توزۇتۇپ تۇپراقنى باغاشلايدۇيۇ، قايتىپ كەلگەن باھارنىڭ بويۇنلىرىغا ئېسىلىپ ،ئۇياتچانلىق بىلەن نازۇك قەترىلەرنى بىخلىرىغا قوندۇرۇپ، تۇلۇققىنە قات-قېتى بىلەن تەبىئەتكە بېقىشچۈن تىرىشىدۇ. ساڭا خەير دىدىم.ئىھتىمال،يىلدا قايتىپ كېلىدىغان باھاردەك،كۈندەشلىكى قىززىق ئاپتىپىدا يالتىرايدىغان قوياشتەك،ئۇياتچان گۈل بەرگىلىرىدەك يەنە قايتىپ كېلىدۇ دەپ ئويلىغان مەغرۇر تەبەسسۇمىڭدا ئۈندىمىدىڭ.چىن گەپلىرىمنى قارا مارجانغا ئايلاندۇرۇپ ،تۈن كېچىلىرىڭگە ئامانەت قويدۇم. شەپقەتسىز رىئاللىقنىڭ سۇغۇق باغرىدا يالىڭاچ قالماسلىقىڭنى تىلەپ دۇئا قىلغىنىمچە سەندىن ئايرىلدىم. سېنىڭ ئاشۇ مەغرۇر تەبەسسۇمىڭ خەير نىڭ ئازابىنى ھىس قىلغۇچە بەلكىم مەڭگۈلۈك يىراقلاپ كەتتىم. 57 ھاياتنى قۇرۇق نەرسە دىگۈچىلەردىن سورىغۇم بار: ئەمىسە نىمىشقا ئۈلۈمگە يېقىنلاشقان قەدەملەردىن ئارقاڭغا مەدەت سورايسەن؟يېنىشلاپ ،يېنىشلاپ قاراپ ئۆتمۈش كۆلەڭگۈسىگە ياش تۆكۈسەن؟ ئارامبەخىش ساپ نەرسىلەرنىڭ قوينىدا رەڭگىمنىڭ قارا ئىكەنلىكىدىن نۇمۇس قىلغىنىمچە، يۈزلىرىمنى ئىتىكىمدە ياپتىم.بىراق كېچە قاراڭغۇلۇقىدا ئاي يوق ئاسماندا نۇر چېچىۋاتقانلىقىنى ھىس قىلغىنىمدا يۇلتۇزلار مېنى ئورىۋىلىپ ئۇسۇلغا چۈشكەن ئىدى. ھاياتىم ۋاقىت گىرۋەكلىرىگە ئېسىلىپ ئىنتايىن مەنىسىز كۈلۈمسىرەۋاتاتتى.بىر بۇلۇڭدا ئولتۇرۇپ دۇنيانى كۈزىتىۋاتقان كۆزلىرىمنىڭ ننمىشقا ئۆزۈمگىلا مەركەزلىشىپ قېلىشلرىدىن بىزارمەن،ئەكسىنچە باشقىلار ئۆزىنى ئەمەس، بەلكى ئۆزگىلەرنى كۈزىتىپ ھارمايتتى،قارىمۇ قارشىلىققا تولغان ئىستىرىلكا ئىچىدە بىر-بىرمىزگە سوقۇلماي پەم بىلەن يانداۋاتاتتۇق. ھاياتنىڭ سۆيگۈ شارابىنى سۇنۇپ سېنىمۇ،مېنىمۇ،باشقىلارنىمۇ ئاللىبۇرۇن مەست قىلىۋەتكەنلىكىنى،مەستلىكتە ھەر خىل ئاھاڭلارغا توۋلاۋاتقانلىقىمىزنى ئاخىرقى تىنىقلىرىمىزدىلا ھىس قىلىۋاتاتتۇق،بارچىمىز بۇ پاجىئەدىن قۇتۇلالمىغۇچىلار ئىدۇق. 58 قوياش جۇلدۇر كېپەنلىك بۇلۇتلار ئارىسدىن چىقىپ كەلدى-دە، مەيۈس كۈلدى.بىر تۈپ دەرەخكە يۆلىنىپ تۇراتتىم.ياپ-يېشىل يوپۇرماقلىق دەرەخ يالىڭاچلىنىپ قالغىلى نېكەم؟ پەرۋايىم يوق،تۇرۇۋەردىم.ئۈستىگە كىيىم ئارتىۋالغىنى بىلەن ئىچى دەرەختىنمۇ يالىڭاچ بولۇپ قالغان ئادەملەرگە تەبەسسۇمىمنى بەرگۈم يوق.يۇمشاق تەبەسسۇمۇم ئىگىسىنى تاپالماستىن لەرزان لۆمشۈپ مەڭزىلىرىمنى چىشلەيتتى. ئاخىرى ئۆتتۈڭ نامەلۇم يول بىلەن... ئىختىيارسىز مەڭزىمنى سىلاپ تۇرۇپ يۈرىكىمدىن سورىدىم: ئاشۇ نامەلۇم يولنى تاپالامسەن يۈرىكىم؟ قەدەملىرىمنىڭ قۇمساڭغۇ ساھىللارنى بويلاپ دېڭىز شاۋقۇنلىرىدا ئۇسۇلغا چۈشكەنلىكىنى مەستخۇشلۇق بىلەن ھىس قىلدىم.تەبسسۇملار توكۇرلاشقىنىچە دېڭىز دولقۇنلىرىنى سۆيمەكتە.دىمەك مەن ئاخىرى ئىچى يالىڭاچ ئەمەس كىشىنى تاپقان ئىدىم. 59 قەلبىمگە گىرە سېلىۋاتقان ئەسلىمىلىرىم ئارىسدىكى كونا كەپىدە قالغان ئاشۇ قەدەمنى ئۇنتۇپ كەتمەكچى ئىدىم. يېقىملىق ئازابنىڭ بوينىغا ئېسىلغان ئۆتمۈش تۇمانلىرى ھامان كۆز ئالدىمدىكى ئوچۇقچىلىقنى ياپاتتى.بىغۇبار جىمجىت كۆزلىرىمنىڭ تېگىدە يۇشۇرۇنۇۋالغان سېنى ياش كەلكۈنى غەرىق قىلىۋەتكىلى نىكەم...؟! بىراق، بۈگۈنكى كۈندە كىرپىكلىرىمگە ئېسىلىپ تۇرغانلىقىڭنى قېقىلغان كىرپىكلەر توزانلىرىدىن بىلىپ قالدىم. 60 تەپەككۈرنىڭ قانات قېقىشىدا مېنىڭ ھاياتىم تولىمۇ گۈزەل يېزىلىۋاتاتتى. ئەپسۇس،،قەيەردىندۇر كەلگەن شامال شامنى ئۆچۈرۈپ قويدى .قانىتى بۇغۇچلانغان تەپەككۈرۈم قاراڭغۇ ئۆيدە ئۆزىنى ئۇ تام-بۇ تامغا ئۇرۇپ ،ئاخىرى ھالسىزلاندى. شۇندىن بېرى ھاياتىمدا ناخشا ئاۋازى ئاڭلاپ باقمىدىم.

ئوغلانى · ۋاقتى: 2013-9-10 09:01:15


	مەنمۇ ئاددي بولسىمۇ كىچىككىنە پىچىرلاپ قوياي ...... مەن جىمجىت .......... سەن بىخارامان ياشاۋاتىسەن ، يۈرۈكۈمنىڭ ئوردىللىرىدا ،كۆپكۆك ئاسمانغا ئاق رەڭدە ھۆسىن قوشۇپ ئاسماننى تېخىمۇ مىھىرلىق كۆرسەتكەن ئاپئاق بۇلۇتلارنىڭ ئۈستىدە ، ئۇ يەر جىمجىت ، لىكىن پەقەت سەنلا بار ، مەن چىقالمايمەن ، پەقەت سىنىڭ كۆزلىرىڭدىكى ئاشۇ بۇلاقلارنىڭ سۈيىدىن يۈرۈكۈم سۇ ئىچكەندىن كىيىنلا يۈرۈكۈم ماڭا رۇخسەت قىلىدۇ . مەن بۇلاقلىرىڭنىڭ قانداقتۇر دەريا سۈيىدەك توختىماي ئېقىپ تۇرشىنى خالىمايمەن ، شۇڭا سىنىڭ قېشىڭغا بارغىنىمدا يۈرۈكۈمنى ئەڭ پاك ،يەنى سېنىڭ بەرگەن شۇ گۈزەل تۇيغۇڭنىڭ بۇلاقلىرىغا چۆكۈرۈپ -چۆكۈرۈپ يۇيۇپ ئاندىن بارىمەن . مەن بارىمەن ،لىكىن مىنىڭ قورقىدىغىنىم بولسا مېنىڭ سۆيگۈ قەسىدىللىرىمدىكى قەسىرلەرنىڭ ئىچىدىكى نۇمۇسچان يۈرۈكۈڭ ئاللىبۇرۇن مىنىڭ ئۈنسىز چىقارغان تىۋىشلىېىمنى ، مۇھەببەت دەريالىرىمنىڭ ساڭا ئاتاپ ئۇرغان خەندانلىرىنى تىڭشىماس بولۇپ قېلىشى . قوياش بىزگە ھامان ئەڭ ئىللىق نۇرىدىن سوۋغا قىلىپ ،ئىككىمىزنىڭ مۇھەببەت خاتىرىمىزنىڭ قەلەملىرىنى رەڭگارەڭ رەڭلەرگە تولدۇرۇپ ، بىزگە دۇنيادىكى ئەڭ بەخىتلىك رەسسام بولۇشىمىزغا مەدەتلىرىنى سېخىلىق بىلەن بەرسىكەن دەيمەن . ئەپسۇس....... يىللار مېنىڭ ھاياتلىق جاڭگاللىرىمنى قۇرۇتتى ، ھاياتلىق بۇلاقلىرىمنى سۇسىز ھالەتتە ئۇنىڭغا ھېچبىر ھاياتى كۈچ ئاتا قىلمىدى ، نەتىجىدە ئۇ كۈتكەن بىر تال كىپىنەكمۇ ئۇنىڭ يېنىدىكى ئاشۇ شاخلىرىنى ساڭگىلىتىپ ئۇزۇندىن بېرى سىرداش بولغان ئاشۇ سۆگەت دەرىخىگە قونۇپ ئۇچۇپ كەتتى ، ھەتتا كەينىگىمۇ قارىماستىن ، قونمىدى ئەمەس ، بىر نەچچە چىرايلىق كىپىنەكلەر قونۇپ بولۇپ شۇ بۇلاقتىن ئېلىنغان قاپاقلاردىكى سۇنى ئىچەلمەي ئۆزىنىڭ زىمىننىڭ چېتىنى كۆرەلمەسلىكىدىن ،ئاسمانغا چىقالماسلىقىدىن ئەنسىرەپ ئۇچۇپ كەتتى ، ئۇ ئەمدى كەلمەيدۇ ، لىكىن ھېچقايسى كىپىنەك ئۇنىڭغا تەييارلاپ قويۇلغان زەمزەم كەبى گۈزەل بىر مىۋە ،مىۋىلا ئەمەس بىر دۇنيادىكى ئەڭ گۈزەل باغنىڭ ئۇنىڭ ئۈچۈن ساقلاپ قويۇلغانلىقىنى نەدىن بىلسۇن ؟ مەن ئاشۇ ئاۋازنى ،يەنى يۈرەك تارىللىرىم ئۆزىنىڭ ئىچىدىن ئوخچۇتۇپ چىقىۋاتقان بۇلاقلىرىمنىڭ شىلداشلىرىدەك يېقىملىق ئاۋازنى كۆڭلۈمدە بىتخوۋىننىڭ مۇزىكىسىنى ئاڭلىغاندەك مۇڭلىنىپ ئاڭلايمەن ،لىكىن بۇنى ھېچقانداق بىر بۇلبۇلغا ئاڭلاتقۇم يوق ،چۈنكى بۇ ئاۋاز نى باشقا بۇلبۇللارغا خالىغانچە ئاڭلاتسام يۈرىكىمنىڭ تومۇرلىرىنى يېرىپ چىققان بۇ ئاۋاز يۈرۈكۈمنىڭ دېڭىزلىرىنى تاشۇرۇپ قاينام ھاسىل قىلىپ مىنىڭ بېشىمنى تاشلارغۇ ئۇرۇپ مىنى نىمىجان بىر توشقانغا ئايلاندۇرىۋېتىشى مومكىن ، بۇ چاغدىچۇ ؟ شۇ بۇلبۇلنىڭ يۈرۈكۈمنى ئۆزىنىڭ ھايالىق ۋە مىھىرلىك قەلبى بىلەن داۋالىيالماسلىقىدىن شۇنداقلا بىر خەنجەر بىلەن جېنىدىن جۇدا قىلىشىدىن قورقىمەن .شۇڭا نەچچىلىگەن بۇلبۇللارغا مەن پەقەت سۈكۈتتە . مەن بىر موزىكانت ، سەۋدايى،توختىماي موزىكا چالىدىغان موزىكانت بولغان تەقدىردىمۇ شۇنداق قىلىمەن . مەڭگۈ .............. لىكىن مەن مەڭگۈ ئۈمىدلىك ياشايمەن، ئاسماندىكى بىر بۇلبۇلنىڭ كىلىپ مېنىڭ باغلىرىمنى ،تاغلىرىمنى شۇنداقلا سەھرالىرىمنى سايرىشى بىلەن تىتىرتىپ مېنىڭ ۋۇجۇدۇمنى گۈلخانلاردا ئۆرتىشىنى ئۈمىد قىلىپ ياشايمەن . شۇڭا مەن جىمجىت ........... بۇ يازمىنى ئاخىرىدا ئوغلانى تەھرىرلىگەن. ۋاقتى 2013-9-10 09:17

بەرگىيە · ۋاقتى: 2013-9-10 17:47:51


	ئوغلانى يوللىغان ۋاقتى 2013-9-10 09:01 مەنمۇ ئاددي بولسىمۇ كىچىككىنە پىچىرلاپ قويا ... يانداشما پىچىرلاشلار ئېسىل چىقىپتۇ، ئېلھاملار قانات قاقسۇن!

بەرگىيە · ۋاقتى: 2013-9-28 10:36:20


	پىچىر -پىچىر 61 سىياھتەك قاراڭغۇلۇق ئىچىدە تېنىگىنىمچە سېنى ئىزدىدىم.لەۋلىرىمگە ياماشقان كۈلۈمسىرەش يۈرىكىمگە يېنىك زەخمەك ئۇردى. چۈنكى، سەن كۆڭۈل بوستانىمدىكى شاھلىق تەختىڭدە، قوللىرىڭنى كەڭ يايغىنىڭچە ،ئوماق تەبەسسۇمىڭنى چىھرىڭدە جىلۋىلەندۈرۈپ ئۇخلاپ يېتىپسەن. سۇبھى نۇرلىرىنىڭ يۈزلىرىمگە ئۇرۇلىشىدىن چۆچۈپ ئۇيغىنىپ سېنى ئىزدىدىم.كىرپىك توساقلىرىدىن ئۆتكەن نازۇك قەترىلەر مەڭزىمنى بويلاپ جىلمايغان زىناقلىرىمنى سۆيدى.قولۇمنى ئۇزىتىپ مەڭزىڭنى سىلاپ سورىدىم "ئۇخلىمىدىڭمۇ؟" چۈنكى ،كۆزۈمنى ئېچىپلا بېشىم ئۈستىدە مۇلايىملىق بىلەن كۈلۈمسىرەپ تۇرغانلىقىڭنى كۆرگەن ئىدىم. چىڭقى چۈشتىكى زارىققان قەدەم تىۋىشلىرىدىن ئەلەڭلەپ سېنى ئىزدىدىم.سۆيۈملۈك كۈلكىدە تەڭ كۈلۈشۈپ كەتتۇق.چۈنكى سەن مەن ئولتۇرىدىغان ئورۇندا ئاللىبۇرۇن ئولتۇرۇپ بوپتىكەنسەن ئەمەسمۇ، مەن سېنىڭ قۇچىقىڭدىلا ئولتۇرۇپ قاپتىمەن ... كۈنلەر شۇ تەرىقىدە ئۆتۈۋاتاتتى.چۆچۈيتتىم، ئەندىكەتتىم،قېنى سەن دەيتتىم،ھالبۇكى ھەر ۋاقىت يۈرىكىمنىڭ قېتىدا ئولتۇرغان مەغرۇر،سۆيۈملۈك تۇرقۇڭ "مەن يۈرىكىڭدە جېنىم"دىيىشنى ئۇنتۇپ قالمايتتى. 62 دولقۇنلارغا چۆككەن مەغرۇر تۇرقۇڭنى قۇمساڭغۇ ساھىلغا سىزىپ قويدۇم. كەچكى شەپەق ئۇنى قىزارتاتتى. قوياش تاغلار كەينىگە ئۆتۈپ كەتكەندە، شەپەقنىڭ ئاخىرقى نۇرلىرىغا چىلانغان سىمارىڭ قېشىدا ئولتۇرۇپ بىردىنلا مۇڭلىنىپ قالدىم.بۈگۈن كېچە چىراقلار ئۆچىدۇ،ئۆيلەر مۇساپىرخانە بولىدۇ.ئاڭلا! شىددەتلىك بوران دەرۋازاڭنى قاقىدۇ،كىم دىمە؟ بوران ئېلىپ ماڭغان ئاۋازىڭدىن بىر قۇش ئۇچۇپ چىقىپ دېڭىزغا چۆكۈپ كېتىدۇ.ئۇ قۇشنىڭ نە يارىسىدىن ئاققان قاننى، نە كۆزىدىن تامغان ياشنى پەقەت دولقۇنلاردىن بۆلەك ھىچكىم بىلمەيدۇ، بىلمەيدۇ.... مەن تاڭ ئاتقاندا ساھىلدىكى ھېلىقى قۇشنىڭ ئۈلۈكىنى كۆرۈشنى خالىمايمەن، چۈنكى ئۇ مۇشتۇمچىلىك بىر قۇش.بىلدىڭمۇ؟ سېنىڭ يۈرىكىڭ قانچىلىك،مېنىڭ يۈرىكىم مۇشتۇمچىلىك ... 63 ھوزۇرۇمغا ھەسرەت بولۇپ كىرگەن مىھمانلارنى قوغلىۋىتەلمەيتتىم .ئىختىيارسىز ئۇلارغا يېقىنلىشاتتىم.قاچاندىن بېرى شۇنچە قارا پەردىلەرنى ئۆيۈمگە ئېسىۋالدىم؟ھاياتىمدا يالقۇندەك سەكرەش بولىۋاتقان سېزىملىرىمغا ھەر كۈنى كەچتە قارا ياغلىق ئارتىپ قويىمەن.قارا ياغلىق ئىچىدىكى تولۇن ئايدەك رۇخسارىدىن ھەسرەت تېمىپ تۇرغان نازىنىنغا مىھمانلار شۇنداق ئاشىقكىن ،بۇ مېنىڭ يالغۇزلىقىمغا بېرىلگەن خاتىمە سۈپىتىدە، ھەر كۈنۈمنىڭ كېچىلىك سائەتلىرىدىكى ئويۇن قويۇش ۋاقىتلىرىم،ھالبۇكى بۇ ئويۇنۇم ھىجران سەھنىسىدە ئوينىلىۋاتقاندا، ۋىسال يۈرىكىمىزنى شۈمىگەنچە كۈلۈمسىرەيتتى.كۆڭلۈمدىكى ھەسرەتلەرنى چاچتىم. ئۇلار "سەن مېنىڭ،مەن سېنىڭ "دىيىشىپ ئۇسۇلغا چۈشتى. 64 ھارغىن ئورمانلىق ئارىسىدا تىنەپ يۈرمەيمەن، بەس،يېتەر! ياز بۇلۇتلىرىدەك نەمخۇش تۇيغۇلارغا چىلانغان ئەركىمنى دالىلارغا قويۇۋەتتىم،ئەسەبىي ھاياجاندا،زۈمرەت خۇشاللىقلاردىن تاج تاقىۋالغان سۆيگۈمنىڭ ئۇسۇلى بارچىنى تاڭ قالدۇردى. سۈزۈلگەن تاڭنىڭ ئاراچلىرىدا،قاناتلانغان دولقۇنلار ئۇ قىرغاقتىن بۇ قىرغاققا سۆيگۈ يوللاۋاتقان ۋاقىتتا، زەڭگەر كۆزلىرىمنىڭ گىرۋىكىدە سېنى ئۇچرىتىپ قالدىم. -نىمە ئىزدەۋاتىسەن؟ -ئەركىمنى . ئاشۇ چاغدا ئالتۇن رەڭلىك بۇ جاۋابىڭغا مەپتۇن بولۇپ قالدىم. 65 چۈش دۇنياسىغا ئات چاپتۇرۇپ كىرىپ كېتىۋىتىپ ساڭا ئۇچقاشتىم .سەن ھېلىقى جايدا مېنى مىدىرلىماي ساقلىغانلىقىڭنى ئېيتتىڭ. ئامرىقىم، قوللىرىمىزنى يىتىلىشىپ چۈش دۇنياسىغا تېخىمۇ ئىچكىرىلەپ كىرىپ كەتتۇق.بىز كىرىش بار چىقىش يوق دەپ خەت يېزىلغان ئۆڭكۈر ئېغىزىدىن، ئىككىلەنمەي كىرىپ كېتىۋىتىپ كۆكسىمىزدە مىڭلىغان ئاتلارنىڭ تۇياق تىۋىشىنى ئاڭلىدۇق ،قايرىلدۇق،كۈلۈشتۇق.مۇھەببەتنىڭ بىر تال گۈلى، بىرلەشكەن ئالقانلىرىمىزدا يالتىرايتتى.بىز گۈلگە "بەخىت ئازابى" دەپ ئىسىم قويۇۋالدۇق. شۇندىلا چۈشىمىزدىن مەڭگۈ ئۇيغانمايتتۇق.بۇ تاللاشتا ھەسرەت ئاغرىقى يوق ئىدى. 66 سەھەر نىمانچە نازلىق... مۇھەببەت بىلەن ئۇيغانغان ھەر سەھىرىمگە رەھمەت دەيمەن. قوياشنىڭ كەينىدىن ئالدىراش يۈگۈردۈم. 67 كۆڭلۈمنىڭ چوڭقۇر يېرىدىن كېلىۋاتقان مۇھەببەتلىك ئۆكسۈشنى قاراڭغۇ كېچىلەرگە چېچىۋەتتىم، دېرىزەڭ تۈۋىدىكى گۈلنىڭ قات-قاتلىرىدكى شەبنەمگە ھەيران بولما،كىم ئېيتقان ساڭا گۈلنىڭ كۆز يېشى بولمايدۇ دەپ؟ گۈلنىڭ كۆز يېشى بەرگىدە ،ئۇنىڭ ھەسرىتى رەڭگىدە،ئۇنىڭ مۇھەببىتى دىلنى ئەسىر قىلغان پۇرىقىدا. سەن بەرگىدىكى شەبنەمنى كىرپىكلىرىڭ ئارىسىغا ئالالامسەن؟ئۇنىڭ رەڭگىگە قېنىڭدىن رەڭ بېرەلەمسەن؟ئۇنىڭ بىر ئۆمۈرئۈزۈلمەي خۇشپۇراق چېچىپ تۇرالىشىغا ئىمكان ئاتا قىلالامسەن؟ بەرگىلەردىن پۈتۈلگەن يۈرەك ئىچىگە لىپاپ سېلىپ قويدۇم.ئۇنى ئوقۇپ باققىن! 68 ماڭا بەرگەنلىرىڭ ئازمىتتى؟ ئاچكۆزلۈكۈم ئۈچۈن پەقەت خېجىل بولۇشۇم يوق.يەنە ئازراق بەرگىنچۇ!ئىلتىجا بىلەن كۆزلىرىڭگە تەلمۈرەتتىم.تەلمۈرۈشلىرىمدە ئېرىپ، يوقاپ كېتىۋاتقانلىقىڭنى سەنمۇ ،مەنمۇ ھىس قىلىشاتتۇق.لېكىن بۇ ئاچكۆز ئىنتىلىش يەنىلا سەندىن تەلەپ قىلاتتى، ئەركىلەيتتى، خۇيلىناتتى، ناز قىلاتتى. ئالقىنىڭنى ئاچ ،گۈل تۆكۈمەن !دىدىڭ يۈرىكىڭنى ئاچ،سۆيگۈ تۆكىمەن !دىدىم . شۇندىن بېرى يۇلتۇزلار سەن ۋە مەندەك چاراقلاپ باقمىدى. 69 -ياق ماڭا سوۋغاڭ كېرەك ئەمەس! تەئەججۇپتا تىكىلىۋاتىسەن. -ئەجىبا ياقتۇرمىدىڭمۇ؟ مىھىر بىلەن كۆزلىرىڭنى يىدىم. -ماڭا پەقەت ماڭا ئايلانغان سەن كېرەك! دەل شۇ چاغ ئىككىلىمىز نۇرغا ئايلىنىپ كەتتۇق.نۇرلار كېسىشكەن بۇشلۇقتىن، مەڭگۈلۈك سۆيگۈنىڭ كۈيى ياڭرايدىغان بولدى. 70 دېڭىزدا سۈرەن سېلىۋاتقان كىم؟ ناخشىلىرى توختىمايۋاتقان كىم؟ ئۇ بېلىقچىمۇ؟غەۋۋاسمۇ؟ كېمىچىمۇ؟ قۇشلار بۇژغۇنلار قېتىدا ئومۇمىخور قىلىپ جاۋاب بەردى. -ياق،ئۇ ئاشىق! چاراسلىغان ئازابلار ئىسكەنجىدىن بوشاپ، سەلكىن شامال كېلىپ مېنى سۆيدى. مەن كۈلۈمسىرەپ تۇرۇپ خاتىرەمگە ئەي قىز،،، رەڭلىك دېڭىز دەپ يازدىم. بۇ يازمىنى ئاخىرىدا بەرگىيە تەھرىرلىگەن. ۋاقتى 2013-9-28 10:38

شەرق · ۋاقتى: 2013-9-28 13:17:05


	بەرگىيە قۇرلارغا بەرگىڭىز توكىلىپ تۇرسۇن . پىچىرلاشلىرىڭىز ئوزۇلۇپ قالمسۇن

قەلبىنۇر ئېلياس · ۋاقتى: 2013-10-1 20:08:34


	تاتلىق پىچىرلاشلىرىڭىزدىن مەرىىمنى ئۈزەلمەي قىلۋەتىمەن . نازۇك تۇيغۇدىن باشلىنىپ قەلىب چوڭقۇرلىقىغا سوزۇلۋاتقان بۇ پىچىرلاشلىرىڭىزغا رىياللىقنىڭ چىرايلىق لېرىك تەپسىلاتلىرى ئۇستىلىق بىلەن سىڭدۈرۈلۈپتۇ.