«تۇرپان يازغۇچىلىرىنىڭ كىتاپ ئوقۇش كۇرسى» باشلاندى   [ئۇلانما كۆچۈرۈش]

تۇرپاندىكى قەلەمداش دوستلاررغا مۇبارەك بولسۇن!دوستۇم ئۆمەرجان سىدىقنىڭ پائالىيەتچانلىقى ئىزچىل داۋاملاشقاي!

قالتىس ياخشى پائالىيەت بوپتۇ . تۇرپانلىق قەلەمداشلارغا  سالام ... قەلىمىڭلار تېخىمۇ چاپچىپ تۇرغاي ...

تۇرپانلىق قەلەمداش دوستلارنىڭ بۇ قېتىمقى پائالىيىتىنىڭ مۇۋاپىقىيەتلىك بولىشىغا تېلەكداشمەن.

ئۆمەر ئابدۇللا ئەرقۇت قاتارلىق دوستلارنىڭ تاغتۇراغا جەم بولغانلىقىنى قىزغىن تەبرىكلەيمەن

ئالىمجان قاسىم  يۇققۇ؟  بەلكىم بىرەر سەۋەپ باردۇ؟

قوشماق ئۆمەر دوستلىرىمنىڭ بۇ پائالىيەتنى تەشكىللەپ، گۈزەل مەنزىرە، ساپ ھاۋادىن نەپەسلەنگەنلىكىنى كۆرۈپ ،سەبداشلىرىڭلارغا سالام قىلدىم.

      ھەقىقەتەن ياخشى پائالىيەت بوپتۇ، تۇرپاندىكى ئەدىپلەرنىڭ بۇ كۇرس داۋامىدا يېڭى بىلىملەرگە ئېرىشىشىگە، بۇنىڭدىن كېيىنكى ئىجادىيەتلىرىنىڭ تېخىمۇ مول ھوسۇللۇق بولىشىغا تېلەكداشمەن!
     كۇرس داۋامىدىكى رەسىملەرنى ئۈزۈلدۈرمەي يوللاپ تۇرغايسىلەر.

قەلەمكەش دوستلارنىڭ، ئىجادىيەت بازىسىدا يېڭى «قان» تولۇقلاپ، يېڭىچە روھ، يېڭىچە كەيپىياتتا دىيارىمىز ئەدەبىيات - سەنئەت ئىشلىرىغا تۆھپە قوشۇشىنى ئۈمىد قىلىمەن.

تۇرپانلىق قەلەمكەشلىرىمىزنىڭ ساپ ھاۋادا تۇيغۇلىرىنى يەنىمۇ پاكىزلاپ، ئەدەبىياتىمىز ئۈچۈن تېخىمۇ زور ئىلھام ۋە قۇۋۋەت تېپىپ كېلىشىنى ئۈمىد قىلىمەن.

   تۇرپان دىيارىدىكى قەلەمكەش دوستلارنىڭ تېنىنىڭ ساغلام، قەلىمىنىڭ يەنىمۇ بەرىكەتلىك بولۇشىغا سەمىمىي تىلەكداشمەن!

ھەممىڭلارنىڭ ئىجادىيەت بازىسىدىكى كۈنلىرىڭلارنىڭ ئەھمىيەتلىك، مەنىلىك ئۆتۈشىگە تىلەكداشمەن. مول ھاسىلاتلار بىلەن قايتىپ كەلگەيسىلەر.

                 تۇرپان يازغۇچىلىرىنىڭ كىتاب ئوقۇش كۇرسى(1)


                                   ئۆمەر ئابدۇللا ئەرقۇت


جەنۇبىي تاغ ئىجادىيەت بازىسىغا سەپەر

2012 ـ يىلى 7 ـ ئاينىڭ 27 ـ كۈنى چۈشتىن كېيىن تۇرپاننىڭ نومۇر تاختىسى ئېسىلغان ئۈچ ماشىنا ئۈرۈمچى ناھىيەسىنىڭ  جەنۇبىي تاغ رايونىدىكى شۈيشىگۇ (غەربىي ئېقىن جىلغىسى) بازىرىغا كىرىپ كەلدى. ماشىنىنىڭ دېرىزىسىدىن كىرگەن سالقىن ھاۋا ماشىنىدىكى قىزىقىش ئىچىدە ئولتۇرغان كىشىلەرنىڭ تېنىنى راھەتلەندۈردى. ئۇلار قانماسلىق بىلەن چوڭقۇر نەپەس ئېلىشىپ ئەتىراپتىكى ئارامگاھلارغا، يېشىللىقلارغا نەزەر سېلىشتى. بايىلا تۇرپاندىكى قىرىق نەچچە گرادۇسلۇق ئىسسىقتا تەرلەپ ـ پىشىپ ئارانلا بولۇپ قالغان تۇرپانلىق بۇ كىشىلەرگە بۇ يەرنىڭ گۈزەل مۇھىتى، سالقىن ھاۋاسى، ئەلۋەتتە، تومۇز ئىسسىقتا تۇرپاننىڭ كونا بازىرىدا مۇز سۈيى ئىچكەندەك خۇشياقىدۇ ـ دە.
بۇ ئۈچ ماشىنا كىشى شىنجاڭ يازغۇچىلار جەمئىيىتىنىڭ شۈيشىگۇدىكى ئىجادىيەت بازىسىغا كىتاب ئوقۇش كۇرسىغا قاتنىشىش ئۈچۈن كەلگەن تۇرپان يازغۇچىلىرى ئىدى. بۇ كۇرسنى تۇرپان ۋىلايەتلىك ئەدەبىيات ـ سەنئەتچىلەر بىرلەشمىسىنىڭ مۇئاۋىن رەئىسى، تۇرپان ۋىلايەتلىك يازغۇچىلار جەمئىيىتىنىڭ رەئىسى، «تۇرپان» ژۇرنىلىنىڭ باش مۇھەررىرى ئۆمەرجان سىدىق شىنجاڭ يازغۇچىلار جەمئىيىتى بىلەن ئالاقىلىشىپ، تۇرپان ۋىلايەتلىك ئەدەبىيات – سەنئەتچىلەر بىرلەشمىسى پارتگۇرۇپپىسىنىڭ قارارىدىن ئۆتكۈزۈپ، تەشكىللەپ، كۇرسانتلارنى ئۆزى باش بولۇپ ئېلىپ چىققان ئىدى.
ئۇلارنىڭ ئىىسملىكى تۆۋەندىكىچە:
1. ئۆمەرجان سىدىق ــ تۇرپان ۋىلايەتلىك ئەدەبىيات ـ سەنئەتچىلەر بىرلەشمىسىنىڭ مۇئاۋىن رەئىسى، «تۇرپان» ژۇرنىلىنىڭ باش مۇھەررىرى. بۇ قېتىمقى كۇرسنىڭ ئۆمەرك باشلىقى. (شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك يازغۇچىلار جەمئىيىتىنىڭ رەئىسى)
2. ئۆمەر ئابدۇللا ئەرقۇت ــ تۇرپان ۋىلايەتلىك تەجرىبە ئوتتۇرا مەكتەپنىڭ ئوقۇتقۇچىسى، كۇرسنىڭ سىنىپ باشلىقى، ئەدەبىي خاتىرە يېزىشقا مەسئۇل. (جۇڭگو يازغۇچىلار جەمئىيىتىنىڭ ئەزاسى، شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك يازغۇچىلار جەمئىيىتىنىڭ مۇئاۋىن رەئىسى)
3. ئەكبەر نىياز پەتتارى ــ «تۇرپان گېزىتى»نىڭ مۇخبىرى. (شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك يازغۇچىلار جەمئىيىتىنىڭ دائىمىي ھەيئەت ئەزاسى)
4. ياقۇپ ئىسمايىل قۇرۇلچى پىچان ناھىيە لۈكچۈن مەركىزىي مەكتەپنىڭ ئوقۇتقۇچىسى، ياردەمچى سىنىپ باشلىقى. (شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك خەلق ئەدەبىيات ـ سەنئەتچىلەر جەمئىيىتىنىڭ مۇئاۋىن رەئىسى، تۇرپان ۋىلايەتلىك يازغۇچىلار جەمئىيىتىنىڭ دائىمىي ھەيئەت ئەزاسى)
5. ئابدۇراھمان ئېلىنىياز ــ پىچان ناھىيە تۇيۇق يېزا ياڭخىي ئوتتۇرا مەكتەپنىڭ ئوقۇتقۇچىسى. (شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك يازغۇچىلار جەمئىيىتىنىڭ ئەزاسى)
6. مۇھەممەتجان مەھمۇت ــ تۇرپان شەھەر سىڭگىم يېزا ئۇلۇغكۆل كەنتىدە دېھقان. (شىنجاڭ يازغۇچىلار جەمئىيىتىنىڭ ئەزاسى، تۇرپان ۋىلايەتلىك يازغۇچىلار جەمئىيىتىنىڭ ئەزاسى)
7. ئابلىتىپ ئىمىن ــ تۇرپان شەھەر يار يېزا چوڭ كۆۋرۈك مەكتەپنىڭ مۇدىرى، كۇرسنىڭ تۇرمۇش باشلىقى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
8. مۇھەممەتئىمىن ئابدۇقەييۇم ــ تۇرپان شەھەر يار يېزىسى چاجاڭ كەنتىدە دېھقان. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
9. ئابدۇخالىق ئابلىمىت ــ تۇرپان خەلق رادىيو ئىستانسىسىنىڭ مۇخبىرى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
10. مۇھەممەت ئابدۇرېھىم ــ تۇرپان تېلېۋىزىيە ئىستانسىسىنىڭ مۇخبىرى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
11. كېپەيتۇللا ئەرشى ــ توقسۇن خەلق رادىيو ئىستانسىسىنىڭ باشلىقى. (تۇرپان ۋىلايەتلىك يازغۇچىلار جەمئىيىتىنىڭ مۇئاۋىن باش كاتىپى)
12. پەرھات باھايىدىن ــ توقسۇن ناھىيە زوقلان فىلىم ئىشلەش مەركىزىنىڭ غوجايىنى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
13. ياسىن ئۆمەر ــ پىچان ناھىيە تۇيۇق يېزا مەركىزىي مەكتەپنىڭ مۇئاۋىن مۇدىرى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
14. ھەلىمىگۈل مەھمۇت ــ پىچان ناھىيە تۇيۇق يېزا مەركىزىي مەكتەپنىڭ ئوقۇتقۇچىسى. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)
15. پاشاگۈل نىياز ــ توقسۇن ناھىيەلىك دۆلەت زېمىن بايلىقى ئىدارىسىدە. (تۇرپان ۋىلايەتلىك يازغۇچىلار جەمئىيىتىنىڭ ئەزاسى)

    ئادەمگە راھەت بېغىشلايدىغان سالقىن ھاۋادىن ھوزۇرلىنىۋاتقان يازغۇچىلار ماشىنىلارنىڭ بىر قاتار داچىلار سېلىنغان رايونغا كېلىپ سولغا بۇرۇلۇشى بىلەن قاتتىق ھاياجانغا چۆمۈلۈشۈپ ماشىنىنىڭ دېرىزىسىگە يېپىشتى. چۈنكى شىنجاڭ يازغۇچىلار جەمئىيىتى ئىجادىيەت بازىسىنىڭ ئىككىنچى قەۋىتىنىڭ يولغا قارىغان تېمىغا سىزىلغان چوڭقۇر، ئېغىر ئويغا پاتقان گىگانت ئەدىب لۈشۈن ئەپەندىنىڭ سۈرىتى كۆزگە روشەن چېلىققان ئىدى.
ــ مانا بىز كېلىشكە تەققەززا بولغان يازغۇچىلار ئائىلىمىز!ــ دېدى ماشىنىدىن ئالدىراپ چۈشكەن يازغۇچى ئۆمەر ئابدۇللا ئەرقۇت ھاياجان بىلەن.
ــ ۋاھ، داچىغا ئوخشاشكەنغۇ!ــ دېدى نۇرغۇن شېئىرىلىرى ناخشا قىلىپ ئېيتىلغان مۇھەممەت مەھمۇت ھەيران بولۇپ. يازغۇچىلار ماشىنىدىن ئالدىراپ چۈشۈشۈپ يازغۇچىلارنىڭ بۇ ئىللىق، مېھىرلىك، ئىلھامبەخش ھويلىسىغا ئۆزگىچە تۇيغۇلار ئىلكىدە قەدەم بېسىشتى. شۇ چاغدا خانە ئىچىدىن چىققان ئەدەبىياتىمىز ئۈچۈن ھارماس ئاتتەك چېپىۋاتقان، تۇرپاننىڭ شىپالىق ئاپتىپىدەك، شۈيشىگۇنىڭ راھەتلىك يامغۇرىدەك ئۆزىنى بېغىشلاۋاتقان ئەيبۇ ياقۇپ ئەپەندى بۇ يازغۇچىلارنى قىزغىن كۈتىۋالدى.

                تۇرپان يازغۇچىلىرىنىڭ كىتاب ئوقۇش كۇرسى(2)

                             ئۆمەر ئابدۇللا ئەرقۇت


مېھىرلىك بازا

    دىلكەش دوستلار، مەن بۇ يەردە بىر مۇھىم قىستۇرمىىنى بېرىشنى لايىق تاپتىم. يولدا كېلىۋاتقاندا تۇرپاندىن كۇرسقا قاتناشقىلى كەلگەن يازغۇچىلار بۇ يازغۇچىلار ئائىلىسىنىڭ ئەھۋالىغا بەكلا قىزىقتى. مەن بۇرۇن بۇ يەرگە بىر قېتىم غەيرىي رەسمىي يوسۇندا كەلگىنىم ئۈچۈن ئۇلارغا بىلگىنىمچە سۆزلەپ بەردىم. شۇنداقلا شىنجاڭنىڭ ھەرقايسى جايلىرىدىكى مەن بىلەن ئەسرارلىشىۋاتقان نۇرغۇن ئەدىبلەرنىڭ بۇ ئىجادىيەت بازىسى ھەققىدىكى قىزىقىشىنى يادىمغا ئالدىم. ئەپسۇسكى، بۇ ئىجادىيەت بازىسى قۇرۇلۇپ ھازىرغىچە بۇ يەردە 16 قېتىم كىتاب ئوقۇش كۇرسى ئۇيۇشتۇرۇلۇپ، نۇرغۇن تاتلىق، ئۇنتۇلغۇسىز ئەسلىمىلەر قالغان، بۇ ئەسلىمىلەر يېزىلغان، توردا، قەغەز مەتبۇئاتتا ئېلان قىلىنغان بولسىمۇ، لېكىن بۇ ئىجادىيەت بازىسى تەپسىلىي تونۇشتۇرۇلمىدى. شۇڭا مەن بۇ يازغۇچىلار ئائىلىسىنى تونۇشتۇرۇپ ئۆتۈشنى لايىق تاپتىم.
     بۇ ئىجادىيەت بازىسى ــ يازغۇچىلار  ئائىلىسى شىنجاڭ ئۇيغۇر ئاپتونوم رايونلۇق ئەدەبىيات ـ سەنئەتچىلەر بىرلەشمىسىنىڭ قوللىشىدا شىنجاڭ ئۇيغۇر ئاپتونوم رايونلۇق يازغۇچىلار جەمئىيىتى 2011 ـ يىلى4-ئايدا بەرپا قىلغان، ئۈرۈمچى ناھىيەسى شۈيشىگۇ بازىرى پىڭشىلياڭ كەنتى 1 ـ ئەتىرىتىگە جايلاشقان 55 ـ نومۇرلۇق قورو ــ داچىدۇر. يىراقتىنلا كۆزگە روشەن كۆرۈنىدىغان لۈشۈن ئەپەندىنىڭ جانلىق ئوبرازى يارىتىلغان رەسىم كىشىگە بۇ قورونىڭ ئالاھىدىلىكىنى دەرھاللا ھېس قىلدۇرىدۇ. قورو ئىچىگە خىش ۋە سېمۇنت يېيىتىلغان. خىش ئارىلىقىدىن ئۆسۈپ چىققان ئوت ـ چۆپلەر ئادەمگە بىر خىل ھاياتىي كۈچنى ھېس قىلدۇرىدۇ. قورو ئىچىگە كىرگەندە ئادەمنىڭ دىققىتى سىرتقى تەرىپىگە ھەر مىللەتتىن بولغان ئەدىبلەرنىڭ قىممەتلىك ئىمزالىرى يېزىلغان چېدىرغا چۈشىدۇ. چېدىرغا تىكتاك توپ تاختىيى، شاھمات قويۇلغان بولۇپ ئارام ئېلىش، چېنىقىش مەقسەت قىلىنغان. شۇنداقلا ئادەم بىر قەدەر كۆپ بولۇپ كەتكەندە زىياپەت تاماق قىلىنىپ، قىزىغان سۆھبەتلەر روياپقا چىقىدۇ. چېدىرنىڭ ئالدىغا يامغۇردىن، چۆچۈپ كەتكەندەك بولۇپ قالىدىغان ئىسسىقتىن دالدىلىنىش ئۈچۈن چوڭ كۈنلۈك قويۇلغان بولۇپ، ئاستىدىكى توقۇلما ئورۇندۇقلاردا ئۈچ ـ تۆتتىن بولۇپ كۆڭۈلگە شېرىنلىك بېغىشلايدىغان گۇڭۇر ـ مۇڭۇر سىردىشىشقا تولىمۇ ئەپلىك. بەزى كۈنلىرى سەھەردە ئىشچان، قولى تەملىك قازاق كېلىنچەك ئاينۇر تەييارلىغان ھەقىقىي ئەتكەن چاينى ئېلىپ چىقىپ كۈنلۈك ئاستىدا پۈۋلەپ، ئاستا ئىچىش تولىمۇ ھوزۇرلۇق. دەرۋازىدىن كىرگەن يەردە كۆزگە ئىسسىق كۆرۈنىدىغىنى كىچىك، كونا كاۋاپدان. قازاق يىگىتلەر چىۋەرلىك بىلەن سويۇپ تەييار قىلغان يېڭى گۆش تەييار. ئەگەر ئارىدا قولى كاۋاپقا كېلىدىغان بىرەرى بولىدىغان بولسا، بۇ كاۋاپداندا پىشقان كاۋاپلار قۇرساقنى تويغۇزمايدۇ، ئەكسىچە ئىشتەينى تېخىمۇ ئاچىدۇ. (ئەيبۇ ياقۇپنىڭ دېيىشىچە ئېھتىياج ئۈچۈن چوڭراق، ئېگىزرەك كاۋاپدىن بىرنى بۇيرۇتۇپ قويۇپتۇ. ھازىرچە بارى ئەۋزەل، قېنى،ئۇنى ئەكەلگەندە كۆرەرمىز.) داچىنىڭ بىرىنچى قەۋىتىنىڭ تاملىرىغىمۇ ئەستايىدىل مۇئامىلە قىلىنغان بولۇپ، تامغا تۆگە، قۇملۇق، قۇرىغان توغراقلىق، بوستانلىق ۋە كۆپكۆك ئاسمان سىزىلغان. بىر كۆرگەن ئادەم گىرەلەشكەن مەدەنىيەتنى دەرھاللا بىلىپ يېتەلەيدۇ.  بىرىنچى قەۋەتكە ئىشىكتىن كىرگەن كىچىك خانە تاماق، يېمەك ـ ئىچمەك تەييارلاش ئۆيى، ئۇدۇلى قىشلىق ئاشخانا. سول تەرەپ بۇ داچىنىڭ ــ ئىجادىيەت بازىسىنىڭ كۆزنەك ئورنى. يەنى بۇ يەرگە نۇرغۇن كىتاب ئىشكابى قويۇلۇپ، تۈرلۈك ژۇرنال، كىتاب تىزىلغان. ياخشى بىر كۇتۇپخانا. كىتابلار قوينىدا سۆھبەت قۇرۇش بۇ يەرنى كۈچلۈك ئىلىم مۇھىتىغا تولدۇرغان. شۇڭا ئىلمىي سۆھبەت، دەرس، يىغىنلار تولاراق بۇ يەردە بولىدۇ. ئەسكەرتىدىغان ئىش: يازغۇچى ــ شائىرلار بۇ ئىجادىيەت بازىسىغا كېلەر بولۇپ قالسا كىتابلىرىنى تەقدىم قىلىش ئالقىشلىنىدۇ. (بۈگۈن كەمىنە ھاياجانلىنىپ تۇرۇپ تۆت رومانىمنى تەقدىم قىلدىم. ئەيبۇمۇ سەمىمىيلىك بىلەن:«ھىممەتلىرىگە ھەشقاللا» دېدى.) كۇتۇپخانىدىن ئۆتۈپ يەنىمۇ ئىچىگە ماڭغاندا ئوڭ ـ سول تەرەپتە ئىككى خانە بار. بۇلار ياتاق بولۇپ، ھەر بىر خانىدا ئالتىدىن 12 كارۋات بار. ئەمما كارىۋاتلار ئۈچتىن ئىككى قەۋەت بولۇپ، ياتقاندا ئوقۇغۇچىلىق ۋاقتىڭىزنى ئەسلەپ تەگسىز ئويلارغا چۆمىسىز. كۇتۇپخانا بىلەن بۇ ئىككى ياتاق ئوتتۇرىسىدا ئىككىنچى قەۋەتكە چىقىدىغان پەلەمپەي بار. پەلەمپەي بويلاپ نۇرغۇن فوتۇ سۈرەتلەر ئېسىلغان بولۇپ، داڭلىق يازغۇچىلىرىمىزنىڭ تۈرلۈك پائالىيەتلىرى ئەكس ئەتتۈرۈلگەن. بۇ يەردە تۇرۇپ پەخىرلىك يازغۇچىلىرىمىزغا ھۆرمەت ۋە پەخىر ئىلكىدە نەزەر سالالايسىز، ئىلھامغا، كۈچكە تولىسىز. ئىككىنچى قەۋەتكە چىقىپ سول تەرەپتە مۇدىر ئىشخانىسى بار. داچىنى باشقۇرىدىغان، مۇدىر بىلەن كىتاب ئوقۇش كۇرسىنىڭ چوڭ ـ كىچىك «ئەمەلدارلىرى» باش قوشىدىغان، كۇرس ماتېرىياللىرى تەييارلىنىدىغان بۇ ئىشخانىغا ئەيمىنىپ قارىغۇڭىز كېلىدۇ. ئىككىنچى قەۋەتكە چىقىپ ئوڭ تەرەپتە ئىككى كىشىلىك بىر ياتاق بار. بۇمۇ ئالاھىدە ئېھتىياجلارغا ئاساسەن تەييارلانغان. (مەسىلەن: پىشقەدەم ئەدىبلەر ياكى قىز ـ ئايال ئاپتورلار قوشۇلۇپ قالسا دېگەندەك.)  ئىككىنچى قەۋەتتە سىرتقا چىقىدىغان يەنە بىر ئىشىك بار. بۇ ئىشىكتىن چىقسىڭىز... ئىككىنچى قەۋەتكە جايلاشقان بۇ يەرگە لەمپە قىلىنغان، قاتار ئۈستەل ۋە ئورۇندۇقلار تىزىلغان. بۇ يەردە تۇرغان ئادەمگە قارغايلىق تاغلار يېقىنلا يەردە كۆرۈنىدۇ، رەڭدار، يېشىل يايلاق  شائىرانە تۇيغۇڭىزغا «يېشىل» كاتالىزاتور بولىدۇ، يايلاق ھاۋاسى دىمىقىڭىزغا ئۇرۇلىدۇ. قىسقىسى، بۇ بۇ يەر كۆڭۈلگە ھوزۇر، كۆزگە نۇرئەلى بېغىشلايدىغان يىغىنخانا. بۇ يەرگە تېخى نام قويۇلماپتىكەن، بىز ھازىرچە «ھاۋايى مۇئەللەق يىغىنخانىسى» دەپ ئاتاپ تۇردۇق. بۇ يەر ھەقىقەتەن سۆھبەتكە لايىق، سۆھبەت قىزىيدىغان ئورۇن. پەلەمپەينىڭ ئاستىدا بىر يەر ئاستى ئۆيى بولۇپ، تېخىمۇ سالقىن. گۆش ساقلايدىغان تەبىئىي توڭلاتقۇ. چېدىر ئۆينىڭ كەينى تەرىپىدە يازلىق ئاشخانا بىلەن كۆمۈرخانا بار. بۇ يەردە ئارتۇقچە ئوتۇن بولمىغاچقا كاۋاپنى نېمىدە پىشۇرىدىغاننىڭ غېمىنى قىلىۋىدۇق، ئەيبۇ:«كۆمۈرخانىدا بەش يىل كاۋاپ قىلىپ يېسە يەتكۈدەك بەش توننىچە كۆمۈر بار» دېدى.

كىتاب ئوقۇش كۇرسىغا قاتناشقان بارلىق ئەزىزلەرگە سالام. ئەزىزلەرنىڭ ئىجادىيەت بازىسىدا يېڭى ئىلھاملارغا ئېرىشىپ قايتىشىغا تىلەكداشمەن. بولۇپمۇ دېھقان يازغۇچى ئاكىلىرىمدىن مۇھەممەتجان مەھمۇت، مۇھەممەتئىمىن ئابدۇقەييۇملارنىڭ ئىجادىيىتىگە مول نەتىجە تىلەيمەن. بۇنداق ياخشى پۈرسەتلەر ھەممەيلەنگە نېسىپ بولغاي...