ئۈرۈمچى لىنىيسى خەۋىرى، تەتىل كىرىپ،  بالىلارغا ساغلام بولغان تورغا چىقىش مۇھىتى قۇرۇپ بېرىش ئاتا-ئانىلار كۆڭۈل بۆلىدىغان مەسىلىگە ئايلاندى، جەمىئىيەتنىڭ بۇ مەسىلىسىگە قارىتا، تېكەس ناھىيىسى 600 مىڭ يۈەن مەبلەغ سېلىپ« يېشىل ئېلىكترونلۇق قىرائەتخانا » قۇرۇپ چىقىپ، بالىلارنى ھەقسىز، مەدەنىي، ساغلام تورغا چىقىش مۇھىتى بىلەن تەمىنلىگەن.
ھەقسىز ئېچىۋىتىلگەن« يېشىل تورخانا » غا مەخسۇس خادىم مەسئۇل بولىدىغان بولۇپ، يامان تور بېكەتلەر ۋە ساغلام بولمىغان ئۇچۇرلارنى ئۆچۈرۈپ، قۇرامىغا يەتمىگەنلەرنى ساغلام بولمىغان تور بېكەتلەردىن يىراقلاشتۇرىدىكەن، شۇنىڭ بىلەن بىرگە ، بىر بالا كۈندە پەقەت 2 سائەتلا تورغا چىقالايدىكەن.
ئېگىلىنىشىچە، تېكەس ناھىيىسى بۇ قېتىم يەنە، كىتاب، گېزىت-ژورنال، ئېلىكترون، كۆپ ۋاستىنى ئۆز ئىچىگە ئالغان 5 قىرائەتخانىنىمۇ ھەقسىز ئېچىۋەتكەن.
بۇ ناھىيىدىكى ئېلىكترونلۇق قىرائەتخانىغا مەسئۇل كىشىنىڭ دېيىشىچە،  ھەقسىز ئېلىكترونلۇق قىرائەتخانىنىڭ ئېچىلىشى ئاممىنىڭ مەنىۋى تۇرمۇشىنى يەنە بىر بالداق بېيىتقان، ئۇلار پۇقرالارنىڭ تەلىپىگە ئاساسەن، ئاممىۋىي مەدەنىيەتنى مۇھىم نۇقتا قىلغان ھالدا، قورامىغا يەتمىگەن ياش-ئۆسمۈرلەر، ياشانغانلار، دېھقان ئىشلەمچىلەر قاتارلىق ئالاھىدە ئاممىغا مۇلازىمەت قىلىدىكەن.