ئاي كۈنلەرنى بوش قويماي رەتكە تىزار چېيىمىز،
ئەسەبى جاز ۋاڭ-چۇڭدا كۆكنى يارار چېيىمىز،
ماڭسا مۇشۇ سۈرئەتتە نەگە بارار چېيىمىز ،
چەكتىن ئېشىپ ئاخىرى ئۆينى بۇزار چېيىمىز ،
كەڭ جاھانغا پۇر كەتتى بىزنىڭ قاتار چېيىمىز.
ئاشۇ چاينىڭ ۋەجىدىن ئۆيدە تاماق ئەتمەك يوق،
تەرلەپ-تەپچىپ ئولتۇرۇپ سۇيۇق -سەلەڭ ئىچمەك يوق،
چاي قوغلىشىپ پەرزەنىتكە ،ھېچبىر مىھىر -شەپقەت يوق،
بوش كۈن نەدە بىزلەردە، زادى ئارام -پۇرسەت يوق،
ئۆگەنمەك يوق مېھنەت يوق،كۈندە قىزار چېيىمىز .
ئەرلەر ماڭسا بىر ياققا ،ئايال باشقا بىر چايدا ،
خەقلەر ئەجەپ شان قۇچتى بىز ئاشۇنداق <<ناي-ناي>>دا ،
ئايلاپ ،يىللاپ چاي ئويناپ تاپتۇق قېنى نە پايدا ،
ئىلىم-ئىرپان ئۆگەنمەي قالدۇق شوڭا ئاھ!داغدا ،
تالايلارنى پۇشايمان دەرىتتە قويار چېيىمىز .
ئەجدات جەڭدە ئات چاپسا ،شان ئىزدىدۇق بىز چايدىن،
ئۆينى تاشلاپ جاي تۇتتۇق رېستۇراندىن-پىنھاندىن ،
چايغا باردۇق خوتەنگە ،غۇلجا ،ئاقسۇ ،تۇرپاندىن ،
كۈلدى خەقلەر بىزلەردەك چاي خۇمارى ئىنساندىن،
زېھنىمىزنى ئۇپراتتى بىلسەك تەكرار چېيىمىز .
<<ساۋاقداشلار>><<بويتاقلار>><<ياشانغانلار>>چېيى دەپ ،
يۈزلەپ چاينى تۈرلەرگە ئايرىۋەتتۇق بىر -بىرلەپ ،
قاندا ماي،قەنت كۆپەيدى كۈندە ئىچىپ ،كۈندە يەپ،
چەبدەسلىكتىن خوشلىشىپ ،قورساق سالدۇق سېمىزلەپ،
ھۇشىمىزنى تاپمىساق گۆرگە تارتار چېيىمىز .
تەڭشەلمىگەن جاھان بۇ ،دېھقان يەرگە ئالدىراش،
ئەمما بىزنىڭ ئىشىمىز كۈندە چايغا قاتىراش ،
چايچىلارنى ياساشقا ئاندىن جىددى ساتىراش،
ئەقلىمىزگە كەلمەيدۇ ئۈزىمىزنى ئاسىراش ،
قاچانغىچە توختىماي يەنە قاينار چېيىمىز.
مەنبەسى :ئابدۇۋەلى راخمان ھەققانىي شىئىرلىرىدىن
