سىز ھېس قىلدىڭىزمىكىن ، بىرىنى ياخشى كۆرۈش ھېسسىياتى يېڭى باشلانغاندا ناھايىتى تاتلىق بولىدۇ ، ھامان بىر ئادەم سىزگە ھەمراھ بولىدۇ ، جاپالىرىڭىزنى بىللە ئۈستىگە ئالىدۇ ، سىز يالغۇزلۇق ھېس قىلمايسىز ،چۈنكى بىر ئادەم سىزنى سېغىنىدۇ ، سىزنى ئاسرايدۇ ، مەيلى قانداق بولۇشىدىن قەتئىينەزەر سىلەر بىللە يۈرسەڭلەرلا ياخشى بولغىنى .......ئەمما بارا- بارا ئىككىڭلار ئارىسىدىكى چۈشىنىش چوڭقۇرلاشقانسېرى سىز قارشى تەرەپنىڭ بەزى كەمچىللىكلىرىنى بايقاپ قالىسىز ، مەسىلىلەر بىرىنىڭ كەينىدىن بىرىگە ئەگىشىپ يۈز بېرىشكە باشلايدۇ ، سىز قارشى تەرەپتىن زېرىكىشكە ، چارچاشقا ھەتتا ئۆزىڭىزنى ئۇنىڭدىن ئەپ قېچىشقا باشلايسىز . بەزىلەر مۇھەببەتنى خۇددى تاش تېرىشقا ئوخشىتىدىكەن ، كىشى ھامان ئۆزىگە ماس كېلىدىغان بىر تال تاش تېرىۋېلىشنى ئارزۇ قىلىدۇ ، ئەمما شۇ تاشنى قاچان تېپىۋالالايدىغانلىقىنى بىلمەيدۇ ، ئۇ سىزگە ماس كېلىدۇ ، ئەمما سىز ئۇنىڭغا ماس كېلەمسىز ؟ ئەمەلىيەتتە ، مۇھەببەت ، تاشنى سىلىقلىغانغا ئوخشايدۇ ، بەلكىم ، سىز قولىڭىزدىكى تاشنى دەسلەپ تېپىۋالغاندا ئۇنىڭدىن ئانچە رازى بولماسلىقىڭىز مۇمكىن ئەمما ئېسىڭىزدە بولسۇنكى ئادەم ئېلاستىكلىققا ئىگە ، تۇرمۇشتا نۇرغۇن ئىشلارنى ئۆزگەرتىشكە بولىدۇ ، سىز  ھەممە يەردىن تاش تېرىپ يۈرگەندىن كۆرە ئىشەنچ ۋە غەيرەت بىلەن قولىڭىزدىكى شۇ تاشنى سىلىقلاڭ ، قانداق ؟ سىز سىلىقلاشقا باشلىدىڭىزمۇ ؟ نۇرغۇن ئادەملەر مۇھەببەت ھېسسىياتىنى سۇسلىشىپ كەتتى دەپ ئويلايدۇ ، شۇڭلاشقا بارا – بارا قارشى تەرەپكە ئانچە ئەھمىيەت بەرمەيدىغان ، قەدىرلىمەيدىغان بولۇپ قالىدۇ ، ھەتتا ھۇرۇنلىشىپ كېتىدۇ ، ئەمەلىيەتتە بۇ ناھايىتى خاتا ئادەت ،چۈنكى ئادەم ھۇرۇنلۇق تەرىپىدىن بويسۇندۇرۇلىدۇ شۇڭا مۇھەببەت سۇسلىشىپ كەتكەندەك تۇيغۇ بېرىدۇ ، بىرىنى ياخشى كۆرۈش ئۈچۈن ئۇنى چۈشىنىش كېرەك ، ئۇنىڭ ئۈچۈن ئۆز كەمچىللىكلىرىنى ئىمكانقەدەر تۈزىتىش كېرەك ،كەڭ قورساق ،  ئەپۇچان ۋە سەۋرچان بولۇش كېرەك ، باشقىلار بىلەن ئاسانلىقچە قول تۇتۇشماڭ ، قول تۇتۇشقان ئىكەنسىز ئاسانلىقچە قويۇۋەتمەڭ ، مۇھەببەتنىڭ ئۆمرى سىزنىڭ كۆيۈنۈشىڭىز ئارقىلىق ئۇزۇنغا بارىدۇ .