ئۈرۈمچى كەچلىك گېزىتى خەۋىرى:
يېقىندا بىر قىسىم ئوقۇغۇچىلارنىڭ ئاتا-ئانىلىرى گېزىتخانىمىزغا تېلېفون بېرىپ بالىلىرىنىڭ زۇكامداپ قالغانلىقىنى ئىنكاس قىلدى.
مۇخبىر 1-مارت بۇ ھەقتە ئۈرۈمچى شەھەرلىك كېسەللىكلەرنىڭ ئالدىنى ئېلىش-كونترول قىلىش مەركىزىدىكى گاۋ فېڭنى زىيارەت قىلدى، ئۇ مۇنداق دېدى: يېقىندىن بۇيان كۆرۈلگەن زۇكام ئاساسەن ئادەتتىكى زۇكام، ئاز بىر قىسىم مەكتەپلەردە كىچىك دائىرىدە يۇقۇملۇق زۇكام بايقالدى، بۇ ناھايىتى نورمال ئەھۋال، ۋاقتىدا بايقاپ داۋالانسا خەتىرى يوق. ئاتا-ئانىلار ئەنسىرىمىسىمۇ بولىدۇ، مەكتەپ ۋە يەسلىلەر ئەتىگەنلىك تەكشۈرۈش خىزمىتىنى چىڭ تۇتۇشى كېرەك، بالىلاردا نورمالسىزلىق كۆرۈلسە، دەرھال ئايرىش ۋە داۋالىتىش كېرەك.
مۇخبىر 1-مارت شەھىرىمىزدىكى بىر قانچە دوختۇرخانىلارنى زىيارەت قىلىش جەريانىدا، نەپەس يولى سىستېمىسى كېسەللىكى بىلەن ئاغرىغان ئاغرىقلارنىڭ كۆپەيگەنلىكىنى، بۇنىڭ ئىچىدە بالىلار ۋە ياشانغانلارنىڭ كۆپلىكىنى بىلدى.
شەھەرلىك «دوستلۇق» دوختۇرخانىسىنىڭ بالىلار بۆلۈمىدىكى دوختۇر مۇنداق دېدى: يېقىندىن بۇيان ھاۋارايى ئۆزگىرىشى كۆپ بولدى، بالىلار بەك قېلىن كىيىنىۋالسا ئاسان تەرلەيدۇ، بۇ چاغدا ئازراق شامال تەگسىلا زۇكام بولىدۇ، شۇڭا ئاتا-ئانىلار بالىلارنى مۇۋاپىق كىيىندۈرۈشى كېرەك.
