ئۈرۈمچى كەچلىك گېزىتى خەۋىرى:
ئەل ئىچىدە «چىلان بىلەن قارا شېكەرنىڭ قان تولۇقلاش ئىقتىدارى قالتىس، چۈنكى ھەر ئىككىسىدە تۆمۈر ماددىسى مول، ئۇنىڭ ئۈستىگە رەڭگىمۇ قانغا ئوخشايدۇ» دەيدىغان گەپ بار.
بىراق مۇتەخەسسىسلەر يېقىندا مۇنداق دېيىشتى: بۇ ئىككى خىل يېمەكلىكتە ھەقىقەتەن تۆمۈر ماددىسى مول، بىراق ئۇلاردا قىزىل قان ئېلېمېنتى يوق، تۆمۈر قوبۇل قىلىنىش مىقدارىمۇ %5دىن ئاشمايدۇ، قوبۇل قىلىنغان تەقدىردىمۇ باشقا يېمەكلىكلەردىكى يېمەكلىك تالاسى قاتارلىق تەركىبلەرنىڭ توسالغۇسىغا ئۇچرايدۇ.
مۇتەخەسسلەر چىلان بىلەن قارا شېكەرنىڭ ئوزۇقلۇق قىممىتى ھەققىدە توختىلىپ مۇنداق دېيىشتى: چىلان يېمەكلىك تالاسى ۋە مېنرال تەركىبلەر مول، ئوزۇقلۇق قىممىتى يۇقىرى مېۋە. شۇڭا پارچە يېمەكلىكلەر ئورنىدا يېيىشكە بەكمۇ ماس كېلىدۇ؛ قارا شېكەرنىڭ ئوزۇقلۇق قىممىتى ئاق شېكەرنىڭكىدىن يۇقىرى، شۇڭا ئاق شېكەرنىڭ ئورنىدا تەم تەڭشەشكە ئىشلىتىشكە بولىدۇ، بىراق بىر كۈنلۈك مىقدارى 25گرامدىن ئاشمىغىنى ياخشى.
