ئەرـ خوتۇن رىمغا ساياھەتكە مېڭىش ئالدىدا ، ئايال چاچلىرىنى چىرايلىق ياساتماقچى بولۇپ ساتىراچخانىغا كەلدى . بۇ يەردىكى ساتىراچنىڭ تېخنىكىسى خېلىلا يۇقىرى بولسىمۇ ، لېكىن ھەسەتخور بولۇپ ، باشقىلار خوشال بولسا ئۇ بەكمۇ ئازاپلىناتتى . بۇ قېتىممۇ دەل شۇنداق بولدى . چېچىنى ياساتقىلى كەلگەن ئايالنىڭ رىمغا ساياھەتكە بارماقچى بولغانلىقىنى ئاڭلىغان ساتىراچ :

　　-رىم ؟ نېمىشقا ئۇ يەرگە بارماقچى بولغانسىلەر ؟ ئۇ ھەم مەينەت ھەم قىستا-قىستاڭ شەھەر . سىلەر ئۇ يەرگە بارىمىز دەپ ساراڭ بوپسىلەر . قانداق بارايلى دەۋاتىسىلەر؟- دەپ سورىدى .

　　-بىز چوڭ قۇرۇقلۇق ئاۋىياتسىيە شىركىتىنىڭ ئايروپىلانىغا ئولتۇرماقچى ،-دېدى ئايال ، -مەنزىلگە بېرىشقىمۇ ئۇزۇن ۋاقىت كەتمەيدىكەن .

　　-چوڭ قۇرۇقلۇق ئاۋىياتسىيە شىركىتى ؟ –ساتىراچ بەكمۇ ئەجەپلەنگەن ھالدا ، -بۇ شىركەت بەك ناچار ، ئايروپىلانلىرى كونا ھەم بۇزۇق ، مۇلازىمەتچىلىرىمۇ ھەم قېرى ھەم سەت ، تېخى ئايروپىلانلىرى دائىم ۋاقتىدا ئۇچالمايدۇ . رىمغا بارغاندىن كېيىن قايسى مېھمانخانىغا چۈشمەكچى بولدۇڭلار؟

　　-تىبىر دەرياسىنى كۆرگىلى بولىدىغان تەيسىت مېھمانسارىيىغا چۈشمەكچى بولدۇق، –دېدى ئايال .

　　-ئەخمەق بولماڭلار ، ئۇ مېھمانساراينى بىلىمەن . باشقىلار ئۇ يەرنى ياخشى دەيدۇ ، ئەمما مەن قارىسام ئۇ يەر ئەخلەتخانىنىڭ ئۆزى ، پۈتۈن رىم شەھىرى بويىچە ئەڭ ناچار مېھمانساراي ، ياتاقلىرىنىڭ كىچىكلىكى ، مۇلازىمىتىنىڭ ناچارلىقى ، باھاسىنىڭ يۇقىرلىقى . سىلەر رىمنىڭ قايسى يەرلىرىنى كۆرۈپ كەلمەكچى ؟-دەپ يەنە سورىدى ساتىراچ.

　　-بىز ۋاتىكانغا بارماقچى ، ئاندىن رىم پاپاسى بىلەنمۇ كۆرۈشەيلى دېگەن .

　　-ۋاي بولدى قىلىڭلار،- دېدى ساتىراچ قاقاقلاپ كۈلۈپ ،-ھەر كۈنى ئونمىڭلىغان ساياھەتچى ئۇنىڭ بىلەن كۆرۈشمەكچى بولىدۇ، سىلەرگە قانداقمۇ نۆۋەت تەگسۇن ؟ پۇل خەجلەپ كۆڭۈل ئاغرىقى تېپىۋالمىساڭلارلا بولدىغۇ . بوپتۇ، سىلەرگە ئامەت تىلەيمەن،- دەپ قوشۇپ قويدى .

　　بىر ئايدىن كېيىن ھېلىقى ئايال يەنە ساتىراچخانىغا كىرىپ كەلدى . ساتىراچ ئۇستام ئۇنىڭدىن رىم سەپىرىنىڭ قانداق بولغانلىقىنى سورىدى.

　　-بەك ياخشى بولدى ،-دېدى ئايال ئاغزى قۇلىقىغا يېتىپ ،-بىز چوڭ قۇرۇقلۇق ئاۋىياتسىيە شىركىتىنىڭ يىپ-يېڭى ئايروپىلانىغا ئولتۇردۇق ، ئايروپىلانمۇ ۋاقتىدا ئۇچتى . ئادەتتىكى بۆلۈملىرى توشۇپ كەتكەچكە بىز ئالىي دەرىجىلىك بۆلۈمىگە ئورۇنلاشتۇرۇلدۇق . ئايروپىلاندىكى تاماق ۋە ئىچىملىكلەرمۇ بەك ياخشى ئىكەن . ئۇنىڭ ئۈستىگە كۈتكۈچى قىزلارنىڭ چىرايلىقلىقى ، مۇلازىمىتىنىڭ ئەتراپلىقلىغىنى دېمەيلا قويۇڭ . يەنە بىز چۈشكەن مېھمانساراينى يېڭىدىن بېزىگەچكە كۆركەم-ھەيۋەتلىك ، ئېسىل-نەپىس ئىكەن .ياتاق زاكاس قىلغانلار بەك كۆپ بولغاچقا مېھمانساراي دىرېكتورى بىزدىن ئەپۇ سوراپ، ھىچقانداق باھا قوشماستىن بىزنى زۇڭتۇڭ دەرىجىلىكلەر ياتىدىغان يۈرۈشلۈك ياتاققا ئورۇنلاشتۇرۇپ قويدى .

　　-ھە ھە بۇ ياخشى بوپتۇ ، پەمىمچە رىم پاپاسىنى چوقۇم كۆرەلمىدىڭلار،-دېدى ساتىراچ.

　　-ۋاي-ۋۇي بىزنىڭ قانداق تەلەيلىك ئىكەنلىكىمىزنى بىلمەيسىز . بىز ۋاتىكاندا ساياھەت قىلىۋاتساق ، بىر مۇھاپىزەتچى ئەسكەر مۇرەمگە قېقىپ « پاپا بىر قىسىم ساياھەتچىلەرنى قوبۇل قىلماقچى » دېدى . پاپا بەكمۇ مېھرىبان ئىكەن ، ئۇ بىزنى خاس بۆلىمىسىدە قوبۇل قىلدى ، بىز بىلەن قىزغىن قول ئېلىشىپ كۆرۈشتى ، مەن بىلەن بىردەم پاراڭلاشتى تېخى .

　　-راستما؟ ئۇ نېمىلەرنى دېدى،- دەپ سورىدى ساتىراچ قىزىققان ھالدا .

　　- ئۇ ماڭا،-دېدى ئايال ، ئادەم كەيپىنى ئۇچۇرۇشقا ئامراق ساتىراچقا بىر قارىۋەتكەندىن كېيىن ،-چېچىڭىزنى قانداقمۇ بىر چاكىنا ساتىراچقا لايىھەلەتكەنسىز ، –دەپ مېنى خىجىل قىلىۋەتتى .