شىنجاڭ قانۇنچىلىق گېزىتى خەۋىرى:
كۆپىنچە كىشى ئەر-خوتۇننىڭ تالاغا قاراپ قېلىشى نىكاھنىڭ بۇزۇلۇشتىكى تۈپ ئامىل دەپ قارايدۇ، لېكىن نىكاھنى بۇزىدىغان بۇنىڭدىنمۇ قورقۇنچلىق ئامىللار مەۋجۇت.
1. بىخەتەرلىك تۇيغۇسى بولماسلىق. نىكاھ تۇرمۇشىدا ئەر-خوتۇننىڭ بىر بىرىگە بولغان ئىشەنچىسى، مەسئۇلىيەتچانلىقى ئىنتايىن مۇھىم. ئىككى تەرەپ بىر-بىرىنى بىخەتەر ھېس قىلماي، بىر-بىرىگە ئىشەنمىسە، ئۇنداقتا بۇ نىكاھ تۇرمۇشنىڭ ئۇزۇن داۋاملىشىشى ناتايىن.
2. تايىنىش، ئاجىزلىق. ئاتا-ئانىسى ھەممىلا ئىشنى قىلىپ كۆندۈرۈپ قويغان بالا چوڭ بولغاندا باشقىلارغا تايىنىۋالىدۇ، بىر ئىشنى مۇستەقىل قول سېلىپ قىلالمايدىغان بولۇپ قالىدۇ. نىكاھ تۇرمۇشى ئەر-خوتۇن ئىككى تەرەپنىڭ تەڭ كۈچ چىقىرىش ئاساستا مۇكەممەللىشىدۇ، شۇڭا ئەر خوتۇننىڭ خالىغان بىرىدە تايىنىش خاھىشى بىرقەدەر كۈچلۈك بولسا، قارشى تەرەپتە بىزارلىق تۇيغۇسى پەيدا قىلىدۇ، ۋاقىت ئۇزارغانسېرى بۇ خىل كەيپىيات كۈچىيىپ نىكاھ بۇزۇلىدۇ.
3. مۇھەببەت ئاساسى ئاجىز بولۇش. بۇمۇ نىكاھنىڭ بۇزۇلۇشىغا ئىنتايىن چوڭ تەسىر كۆرسىتىدۇ. شۇڭا ئەر-خوتۇنلار ھەر ۋاقىت سىردىشىشى، مۇھەببەت ئاساسىنى پۇختىلاشقا ئەھمىيەت بېرىشى كېرەك.
4.ئۆزىنى كەمسىتىش. قىسمەن كىشىلەر ھەرقانداق ئىشتا ئۆزىگە ئىشەنمەيدۇ كەمسىتىدۇ. بۇنداق ئادەم تۇرمۇش قۇرغاندىن كېيىن ئەر-خوتۇن مۇناسىۋىتىگە كۆپ ئاۋارىچىلىق تۇغدۇرىدۇ. مەسىلەن: قارشى تەرەپنىڭ ھەر قانداق گېپىنى ئۆزىنى ئەيىبلەۋاتقاندەك ھېس قىلىپ جېدەللىشىش قاتارلىقلار.
5. ياخشىچاق بولۇش. كىچىكىدىن باشقىلارغا ياخشىچاق بولۇشقا ئادەتلەنگەن ئادەم توي قىلغاندىن كېيىنمۇ بۇ ئادىتىنى ئۆزگەرتەلمىگەچكە، خوتۇنى ياكى ئېرى، قېينئاتا، قېينئانىسىغا ياخشىچاق بولۇشنى ئويلاپ، بىرەر ئىشنى ھەقىقى چىن يۈرىكىدىن قىلىشنى خالىمايدۇ، بۇ كېيىنچە ئىككى تەرەپنىڭ نارازىلىقىنى كۈچەيتىپ، نىكاھ مۇناسىۋىتىنىڭ يىرىكلىشىشنى كەلتۈرۈپ چىقىرىدۇ.
6. مۇكەممەللىكنى قوغلىشىش. دۇنيادا ھەرقانداق ئىش ۋە نەرسە مۇكەممەل بولمايدۇ. بىراق قىسمەن كىشىلەر دەل مۇشۇ مۇمكىن بولمايدىغان مۇكەممەللىكنى قوغلىشىپ، قارشى تەرەپكە ئېغىر بېسىم پەيدا قىلىپ ھاردۇرۇپ قويىدۇ.
7. ئۆزىگە زىيادە ئىشىنىش. بۇنداق كىشىلەر ناھايىتى مەنمەنچى بولۇپ، باشقىلاردا بىزارلىق تۇيغۇسى پەيدا قىلىدۇ. ئائىلىدىمۇ مۇشۇنداق بولغاچقا، ئەر-خوتۇن ئارىسىدا سەسكىنىش كەيپىياتنى شەكىللەندۈرىدۇ.
