تونۇشمىساق بوپتىكەن ئەسلى
ساداقەتجان ھاجى
تونۇشمىساق بوپتىكەن ئەسلى.
يېتەلمىدۇق ۋىسالغا زىنھار.
بىلگەن بولسام بۇنى ئىلگىرى،
قىلماس ئىدىم كۆڭلۈمنى ئىزھار.
سەن ئازاپتا، مەنمۇ ئازاپتا.
ئاستىمىزدا غازاڭ نالىسى.
سۇندى ئىچمەي ۋىسال چېيىنى
مۇھەببەتنىڭ زەر پىيالىسى.
باھار بولۇپ ياشنىمىدى ھەم
بىزگە مەنسۇپ مۇھەببەت پەسلى.
ئازاپ چېكىپ قالدۇق بىمەھەل،
تونۇشمىساق بوپتىكەن ئەسلى.
