1901- يىلى (كونا كالىندار بۇيىچە شىنچيۇ يىلى) يى گۇاڭ، لى خوڭجاڭلار چىڭ سۇلالىسى ھۆكۈمىتىگە ۋاكالىتەن روسىيە، ئەنگىلىيە، گېرمانىيە، فرانسىيە، ئامېرىكا، ياپونىيە، ئىتالىيە، ئاۋىستىرىيە قاتارلىق دۆلەتلەر بىلەن دۆلەتنى مۇنقەرز قىلىدىغان «شىنچيۇ شەرتنامىسى» نى ئىمزالىدى. شەرتنامىنىڭ ئاساسىي مەزمۇنى:

(1) چىڭ سۇلالىسى ھۆكۈمىتى 450 مىليۇن سەر كۈمۈش تۆلەم تۆلەيدۇ. بۇنىڭغا تامۇژنا بېجى، تۇز بېجى ۋە ئادەتتىكى تامۇژنا بېجى قاتارلىقلارنى زاكالەتكە قۇيىدۇ.

(2) چىڭ سۇلالىسى ھۆكۈمىتى ھەرقايسى ئەللەردىن كەچۈرۈم سۇرايدۇ، يېخۇتيەن ھەركىتى داۋامىدا جاھانگىرلار بىلەن قارشىلاشقان ئەمەلدارلارنى جازالاپ، جاھانگىرلارغا قارشى تەشكىلات ۋە قارشى كۈرەشلەرنى چەكلەشكە كاپالەتلىك قىلىدۇ.

(3) بېيجىڭنىڭ دوڭجاۋمىن كوچىسىنى ئەلچىخانا رايۇنى قىلىپ ئايرىپ، ھەرقايسى دۆلەتلەرنىڭ ئەسكەر تۇرغۇزۇپ قوغدىشىغا رۇخسەت قىلىدۇ. جوڭگۇلۇقلارنىڭ بۇ رايۇندا ئولتۇراقلىشىشىغا رۇخسەت قىلىنمايدۇ.

(4) چىڭ سۇلالىسى ھۆكۈمىتى داگۇ پوتىيىنى بۇزۇپ تاشلاپ، جاھانگىرلارنىڭ بېيجىڭدىن شەنخەيگۇەنگىچە بولغان ئارلىقتىكى تۆمۈر يول بويلىرىدىكى مۇھىم جايلاردا ئەسكەر تۇرغۇزىشىغا رۇخسەت قىلىدۇ.

«شىنچيۇ شەرتنامىسى» نىڭ ئىمزالىنىشى جوڭگۇنىڭ پۈتۈنلەي يېرىم مۇستەملىكە، يېرىم فېئوداللىق جەمىيىتىگە ئايلانغانلىقىنى كۆرسىتىپ بەردى.