بۇ يازمىنى ئاخىرىدا بەھرام تەھرىرلىگەن. ۋاقتى 2013-1-28 00:26
ئەسسالامۇئەلەيكۇم تورداشلار ، ياخشى تۇردۇڭلارمۇ ؟
ھەممىمىزگە ئايان ، دۆلىتىمىز بولسا كەڭ بەلباغ تورى (宽带) ئابونېنتى ناھايىتى كۆپ دۆلەتلەرنىڭ بىرسى ، لېكىن تور سۈرئىتىنى سېلىشتۇرساق ئارقىدىن سانىساق بولىدۇ . بىز مەيلى ئۆيدە بولسۇن ياكى ئاممىۋى سورۇنلاردا بولسۇن ، تور سۈرئىتى بەزىدە ئىتتىك بەزىدە ئاستا دېگەندەك ئىشلارغا يولۇقۇپ ، بۇنىڭدىن تازا رازى بولۇپ بولالمىدۇق . شۇنىڭ بىلەن بىرگە ، تۇرمۇش سەۋىيەرىمىزنىڭ ئېشىشىغا ئەگىشىپ ، ھازىر ھەممە ئۆيدە دېگۈدەك سىمسىز روتېر (سىمسىز تور تارقاتقۇچ) بار بولۇپ كەتتى ، سىمسىز روتېردىمۇ يۇقارىدا سۆزلەپ ئۆتكەن تورسۈرئىتى مۇقىم بولماسلىقتەك مەسىلە مەۋجۇت ، يىلتىزىدىن ئېلىپ ئېيتقاندا ، تورسۈرئىتىنىڭ ئىتتىك ياكى ئاستا بولىشى بىزنىڭ ئۆيىمىزنىڭ ئىلتىماس قىلغان بەلباغ كەڭلىكى (1MB,2MB,4MB,8MB,20MB) بىلەن مۇناسىۋەتلىك بولىدۇ ، بۇنىڭغا سۈرئەت كۈچەيتىش ئامالى يوق ، لېكىن Wi-Fi سېگنالىنى ئېلىپ ئېيتقاندا ، بەزىدە ئۆزىمىزنىڭ ئەمەلىي تور سۈرئىتىمىز بىلەن نەزەرىيىۋى تور سۈرئىتىمىز ئارىسىدىكى پەرق بەك چوڭ بولىشى مۇمكىن . بۇنداق مەسىلە سىم يولىنىڭ راۋان بولماسلىق تۈپەيلىدىنمۇ كېلىپ چىقىدۇ ۋە سىمسىز روتېرنىڭ Wi-Fi سېگنالىنى بىر مۇقىم رايونغا زور مىقتاردا يىغالماسلىق سەۋەبىدىنمۇ كېلىپ چىقىدۇ . خوش ، ئۇزۇن گەپنىڭ قىسقىسى ، تۆۋەندە مەن دوستلارغا سىمسىز روتېرنىڭ Wi-Fi سېگنالىنى بىر مۇقىم رايونغا يىغالماسلىق سەۋەبىگە قارىتا ھەل قىلىش ئۇسۇلىنى سۆزلەپ ئۆتەي ، نۆۋەتتە بۇ ئۇسۇل دۆلەت ئىچى ۋە سىرتىدا مودا بولۇپ كېلىۋاتقان بولۇپ ، بۇ خىل مەسىلىنى ھەل قىلىش ئۈچۈن مەلۇم تەڭشەكنى تەڭشەش كەتمەيدۇ ، بىز پەقەت پاسىلداق قۇتىدىن پايدىلىنىپ بىر قوشۇمچە ئەسۋاب ياساپ چىقساقلا بولىدۇ ، كىچىك دەرىجىدە بولسىمۇ بىزنىڭ ئۆيىمىز ياكى ئىشخانىمىزدىكى سىمسىز روتېرنىڭ تارقىتىش كۈچىنى ئاشۇرالايدۇ.
لازىملىق قوراللار :
1 دانە پاسىلداق قۇتا (ئاليومىن ئىچىملىك قۇتىسى) ، 1 دانە قايچا ، 1 دانە پىچاق (قىڭراق پىچاق بولسىمۇ بولىدۇ) .
ياساش ئۇسۇلى :
1. ئالدى بىلەن پاسىلداق قۇتىنى سۇدا پاكىز يۇيۇۋېتىمىز ، بولۇپمۇ قۇتا ئىچىدىكى ئىچىملىك قالدۇقىنى پاكىز چايقىۋېتىمىز.
2. قۇتىنىڭ ھالقىسىمان ئېغىزىنى ئېلىۋېتىمىز .
3. ئەمدى خۇددى رەسىمدە كۆرسىتىلگەندەك ، قىزىل سىزىقنى بويلاپ پىچاق بىلەن قۇتا ئاستى تەرەپ رايونىنى پۈتۈنلەي كېسىپ ئېلىۋېتىمىز .
4. خۇددى رەسىمدە كۆرسىتىلگەندەك ، پىچاق بىلەن قۇتا ئۈستى تەرەپتىكى قىزىل سىزىقنى بويلاپ كېسىمىز ، لېكىن ئېسىڭىزدە بولسۇن ، ئاق سىزىق رايونىنى كەسمەيمىز ( چۈنكى بۇ رايون قۇتىنىڭ ئاساسىي قىسمىنى تىكلەش ئۈچۈن تىرەش رولىنى ئوينايدۇ ) .
5. ئەمدى رەسىمدە كۆرسىتىلگەندەك ، قايچا بىلەن ھېلىقى ئاق سىزىق رايونىنىڭ قارشى تەرىپىدىن قۇتىنىڭ ئاساسىي قىسمىنى قىزىق سىزىقنى بويلاپ كېسىپ ئاچىمىز .
6. ئەڭ ئاخىرىدا كېسىپ ئېچىپ بولغان قۇتىنى رادارسىمان قىلىپ ئىگىپ ، سىمسىز روتېرنىڭ ئانتېنناسىغا قاپلاپ قويساقلا ئىش پۈتىدۇ . ئېسىڭىزدە بولسۇن ، سىز ياسىغان بۇ رادارسىمان قۇتىنىڭ يۆنىلىشىنى چوقۇم سىز كۈچەيتمەكچى بولغان رايونغا قارىتىپ قويۇڭ .
خۇلاسە :
بۇ ئۇسۇلنىڭ پىرىنسىپىنى چۈشەندۈرۈپ ئولتۇرمىساممۇ تورداشلار ھەقىچان بىلىپ بولدى ، شۇ پاسىلداق قۇتىنىڭ ئىچكى تەكشى يۈزىدىن پايدىلىنىپ Wi-Fi سېگنالىنى قايتۇرۇش ئارقىلىق مەلۇم بىر رايونغا قارىتا سىمسىز روتېرنىڭ ئانتېنناسىنىڭ تارقىتىش ۋە قوبۇل قىلىش كۈچىنى ئاشۇرۇشتىن ئىبارەت . دۆلەت ئىچى ۋە سىرتىدىكى كۆپلىگەن تورداشلارمۇ سىناق قىلىش ئارقىلىق بۇ ئۇسۇلنىڭ ھەقىقەتەن ئۈنۈملۈك ئىكەنلىكىنى ئىسپاتلاپتۇ . مەسىلەن :
- لەپتوپ كومپىيوتېردا ئەسلى تۆت كاتەك سېگنال بار بولۇپ ، تورداشلار بۇ ئۇسۇلدىن پايدىلىنىپ Wi-Fi سېگنالىنى بەش كاتەك تولۇق قىلىپ كۈچەيتىپتۇ .
- يانفوندا بولسا ، سىمسىز روتېر بىلەن ئۈچ مېتىر ئارىلىقتا ، قارشىلىق دەرىجىسى 58dBm- بولغان سېگنالنى بۇ ئۇسۇلدىن پايدىلىنىپ 44dBm- غا كۆتۈرۈپتۇ . (dBm بولسا Wi-Fi سېگنالىنىڭ بىرلىكى) .
قېنى ، قىززىقسىڭىز سىزمۇ بۇ ئۇسۇلنى سىناپ بېقىڭ . كەڭ تورداشلارنىڭ مېنىڭ ئىلگىرى يېزىپ قويغان ‹‹ يانفون سېگنالىنىڭ كۈچلۈك ياكى ئاجىزلىقىنى تەكشۈرۈش ئۇسۇلى ›› مەزمۇندىكى يازمامدىن پايدىلىنىپ ، ئېنىق ھەم توغرا سانلىق مەلۇمات ئارقىلىق تەجرىبە ئېلىپ بېرىپ ، بۇ ئۇسۇلنىڭ نەتىجىسىنى بەھرىمان قىلىپ قويۇشۇڭلارنى ئۈمۈد قىلىمەن .
ئاخىرىدا باشقا تورداشلارنىڭ '' ئەسەر'' لىرىدىن ھوزۇرلىنىپ باقايلى ...
تامام
مۇنبىرىمىزنىڭ تەرەققىياتى ئۈچۈن ئېلانلارنى چېكىپ قويۇڭ . كۆپ رەھمەت! | 
قۇربان ھېيت ئۆتۈپ كەتتى .. 
ئەمەلنىڭ ساۋابى تەڭداشسىز بولغان تەشرىق كۈنلىرى يەنە بىر يىللىق مۇساپە [em:26: ...
يوللىغان ۋاقتى 2013-1-28 00:16:51
نامسىز
يوللىغان ۋاقتى 2013-1-28 10:25:50
